لا تقولوا كان زايد .. قولوا زايد لا يزال
بسم الله الرحمن الرحيم
وشحالهمـ العربان ؟؟
قريت هالقصيده في منتد ى ثاني و واااايد عيبتني
هي عن ابونا زايد اللي بيظل اسمه محفور في عقولنا و قلوبنا
الله يرحم ابونا زايد و يرحمه و يجعله في الفردوس يارب
ولو بنكتب الشعر و النثر ما بنوصف حبنا و حزنا على بابا زايد
.................................................. .........................
عظّم الله اجر عالم من جنوبه للشمال
في وفاة اللي تربّع في القلوب اغلى حبيب
والله اني في حياتي ما فتحت ايّة مجال
للدموع و للهموم و للجروح و للنحيب
ياما مرتني بلاوي و كنت ثابت كالجبال
ما بكيت ولا شكيت و كل جرح ٍ بي يطيب
لكن اني يوم قالوا مات صار الحال حال
هزني زلزال حزني و الشعر غطاه شيب
ابكي كل ما مر اسمه ..دمعي من عيني همال
من بعد ما كنت اقول الدمــع للرجّال عيب
خايف اكفر لو اقول الموت هو رابع محال
حـق مــن رب البريه و كل بيومه يغيب
لكن اني كيف اصدق شي ما يخطر في بال
من كثر ما كنت احبه كنت متناسي النصيب
الحزن كان بحياتي بس مجرد احتمال
ما هقيت انه يجيني و ينقلب ليلي كئيب
آه يا مصعبها جمله ( شيخنا شد الرحال )
آه يـا مقواها صدمه سهمها عيا يخيب
صابني و اختار يبقى بقلبي لو طال المطال
منهو منا بعد موته ما شكى قلب ٍ صويب ؟
كـان زايد .. لأ لحظه .. قصدي زايـد لا يزال
شمس مـا تعرف غروب و لا تدل درب المغيب
نخله ما وقّف عطاها من ثمر ولا ظلال
غيمه في كل الفصول و دونها سهل ٍ رطيب
حكمة ٍ نمشي عليها تصد عن درب الظلال
نعمةٍ مــن رب عالي للقريب و للغريب
نسألك يا رب رحمه يوم ناديته تعال
يوم خذته في جوارك يا سميع و يا مجيب
بالبرَد و الثلج و الما تغسله يا ذو الجلال
كلنا ندعيـــك يالله و لدعانا تستجيب
تســكنه جنات عــدن ٍ يرتوي شهـد و زلال
يهنى في رحابك و فرشـه مسك ٍ وعنبر و طيب
لأنْ زايد شخص غالي و الغلا مابه سؤال
و كلنا راضين عنه و في القلوب اغلى حبيب
عاش كل عمره مْتواضع .. حط معنى الإعتدال
كم عطانا من يمينه ما مسك عـن شعبه جيب
شيــخ ٍ بكل المعاني للعروبـه و الرجـال
ضايع ٍ وصفي و مقصر و ما بهالتقصير ريب
و القصيده اللي توفّـي حقه( هـي رابع محال)
و الشعر بعد الله يشهد وصف مـن مثله صعيب
راس مالي دمع غالي هل من عيني همال
اعترف غيرت رايي دمعتي ما هيب عيب
دامها جت من فراقه ببكـي سنين ٍ طـــوال
و ادعـي بركعات فرضي جهر كانت ولا غيب
و انتوا ياللي تسمعوني رددوا صبح و ليال
يرحم الله بو خليفه و يشفي الجرح العطيب
و لا تقولوا كان زايد .. قولوا زايد لا يزال
شمس ما تعرف غروب و لا تدل درب المغيب
الله يرحمه
إلـــThe WorlD wilL nOt fOrGet You Zayedـــــ جنة الخلد يا زايدــى
" منــقول "
