**موضوع متميز**العيش البلدى المصري(ابو رده) والشامي الابيض من مطبخ نور بالصور
[CENTER]اخواتى فى الله اقدم لكم اليوم العيش البلدى المصرى والعيش الشامى طبعا مفيش كلام ان النوعين لا يمكن الاستغناء عنهم فى البيت المصرى ياريب يعجبكم
اولا العيش البلدى المصرى
(ابو رده )
طريقه العيش سهله جدا ولكن يجب الالتزام بمجموعه ملحوظات حتى ينجح العيش
المقادير
2 كوب ونصف دقيق
نصف كوب ماء دافىء
ربع كوب ماء دافىء مذوب به ملعقه طعام خميره ويترك جانبا
ملح
3 ملاعق طعام رده او كما تسموها ( نخاله )
الطريقه
نذوب الخميره فى ربع كوب الماء ونتركها عشر دقائق الى ان تختمر فى الكوب كما فى الصوره
ننخل الدقيق مع الرده نضع المكونات كلها فى العجانه ونضيف الماء المذوب به الخميرهوتعجن عشر دقائق
وهذا شكل العجين نتركه يخمر حوالى ساعه الا ربع
بعد ما اختمر العجين نحضر صينيه ونفرشها بالرده فقط ونقطع العجين كور بالحجم اللى بتحبيه
بعد ذلك نفرد الكور على سطح منثور عليه الرده ابتداءا باول واحده قطعناها وكورناها اهم حاجه ان الرغيف يكون وسط لا رقيق جدا ولا سميك
نضع الخبز المفرود فى صوانى مرشوشه بالرده ونغطيه ونتركه يخمر مره اخرى وهذه المره نصف ساعه تقريبا
طبعا وزعت العيش المفرود على صوانى
على فكره الكميه دى عملت 16 رغيف بالحجم اللى انتوا شفتوه وطبعا الحجم اختيارى
نشغل الفرن على حراره عاليه جدا بعد ما تركناه يختمر مره اخرى نبدأ بوضع العيش فى صاج الفرن يعنى نحمله بكف اليد ونقلبه على وجهه على الصاج وانتبهى لان الصاج سخن ونضعه فى الرف السفلى القريب من النار
ملحوظه لنجاح الخبز
1- لنقل الخبز من الصينيه الى الصاج ننقله بكف ايدنا وبحذر شديد راعى الا تلمسه الاصابع من فوق
لانها لو لمسته لن ينتفخ ابدا او اذا اتجرح الرغيف فسينتفخ فى الفرن ويهبط مره اخرى
هنا وضعناه فى الصاج
نغلق الفرن ونتركه خمس دقائق وبعدها نراقبه
شوفوا بعد خمس دقائق بدأ العيش ينتفخ
وهذه ملحوظه اخرى
بعد ما ينتفخ العيش هذا معناه انه استوى ننتظر حوالى 10 ثوانى حتى يستوي تماما
(التحمير زياده بيخلي الخبز ناشف )
وبعدها نخرجه من الفرن انا بصراحه محبتش احمره تحت الشوايه لانى عوزاه طرى
وده شكله
ودى باقى الكميه
يارب يكون الشرح واضح
العيش الشامى
او الابيض كما نسميه
بصراحه العيش الشامى انا نزلته قبل كده فى المنتدى ولذلك ساستعين بالصور مره اخرى
المقادير
نفس المقادير فى الخبز البلدى ولكن نستغنى عن الرده تماما تماما
وهنا اضفت الماء للطحين
وهنا انتهيت من العجن
نتركه يخمر وبنفس الخطوات السابقه ولكن يفرد على سطح مرشوش بالدقيق ويوضع فى صوانى مرشوشه دقيق ايضا
ده الخبز بعد الخبز وهذه المره حمرته من فوق تحت الشوايه ثوانى معدوده فقط لا غير حتى لا ينشف
وخدوا بالكم انا عملته احجام مختلفه وده اختيارى طبعا
وصوره اخرى
يارب يكون عجبكم العيش وانتظرونى فى وصفات اخرى
ملحوظه اخيره
سواء للعيش البلدى او الشامى لو عوزاه طرى يبقى بعد خروجه من الفرن هويه شويه ولفيه فى اكياس ولو عوزاه يقرمش اتركيه فى الهواء الطلق
رجاء خاص
عوزاكم تدعولى لانى تعبانه ادعولى ربنا يشفينى ولكم جزيل الشكر
