بنات المنصورة برجاء الدخول

[jomana8090]

ربنا يتمم لك بخير بأذن اللة
لآ هو حمام البخار ب 50 مش 500 ولا حاجة
دة عبارة عن بخار بيتوجة على الوش بيفتح كل مسام الوش علشان يطلع منها اى تراب وبعد كدة بيعملوا لك ماسك
يعنى يا دوب 50 حلو اوى

ولو عايزة تسألى على اى ماركات ميك اب او حاجة قوليلى وانا هاقولك ممكن تستعملى انواع اية كويسة
ومتنسيش بقى تشترى برفانات من دلوقتى علشان على الفرح تكون بقت ريحتها شديدة شوية

وطبعا ماسكات الشعر فى ماسك للشعر حلو اوى اوى اسمة صانسيلك للشعر التالف مش عايزة اقولك انة تحفففة بس يستحسن تشترية من السعودية
لو تعرفى حد يبعتلك الحاجات دى قوليلى وانا هاقولك على كام حاجة كدة مش موجودين غير من السعودية

[همس الملائكة]

جمانة كل كلامها صح بالنسبة لجونتنياس تحفففففففففة بمعنى الكلمة اختي خطوبتها كانت في العيد الكبير مش عايزة اقولك انها كانت تحففففة ومكياج جنان وكمان لفة الطرحة وبيهتموا بالحمامات قبلها وبالبديكير والمنكير جربيه بجد ومش حتندمي والفففففففف مبرووووك وربنا يتمملك بخير ويبعد عنك العيون ويحفظك يا قمر.

[jomana8090]

واللة يا همس انا مش عايزة اقولك فى كام عروسة راحوا لجونتنياس بعد ما شافوا الميك اب والشغل اللى كان معمول لى يومها
صاحب المحل بس انا مش فاكرة اسمة واللة العظيم فنان
عملى طرحة مع فستان الخطوبة زى النظام الاسبانى قالى هاعملك شغل ديفليهات يعنى هو مش حافظ كام تسريحة وخلاص
لآ بيبص لوشك وفستانك ويحدد وقتها هايعملك اية
عقباااااااااااااااااااااااااااال كل البنات يا رب
وعقبالك يا همس لو كنتى لسة متخطبتيش

[kind_heart2008]

همس وجومانا ميرسي ياحبايبي على الرد
تصدقي انا اللي كان في بالي انه الحمام المغربي للجسم كله هو اللي ب 50 ماخدتش بالي انه حمام البخار اصله كده بقى غالي فعلا
انا كنت عامله من فتره عند كوافير نجاة لو تعرفيه اللي حنب كلية اداب وكان ب15 بس !!
جومانا والنبي اي حاجه تعرفيها حلوة قوليهالي
سواء عن ماركات مكياج او حماما ت كريم او اي منتجات للشعر وبرفانات قوليلي عليها
أنا أصلا كنت في السعودية بس للأسف ماجاش في دماغي اني اشتري الحاجات دي من هناك
فقوليلي على الحاجات الكويسه اللي اقدر اجيبها من هنا

وميرسي ياحبيبتي وعقبال فرحك ان شاء الله

[jomana8090]

بصى يا ستى
انا هاديكى اسماء لماركات تعتبر تقريبا الافضل
هى غالية شوية بس صدقينى هاتعجبك اوى
انا بستعمل بودرة اماندا رقم 18 هى ب 18 جنية
بس اكتشفت بعدها بودرة اسمها دوفdove
دى تحففففففة على الوش بتنورة انا اشتريت الدرجة رقم 1 والبودرة دى سعرها 15 جنية هتلاقى العلبة بيضا وليها مراية من ورا
وفى طبعا كريم اساسا مالوش حل اللى هو اماندا برضة انا بستعمل برضة الدرجة رقم 18 ودة سعرة 50 جنية بس الحقى اشترى من دلوقتى لآنة تقريبا بيزيد كل شهر 5 جنية
دول انا بشتريهم من محل اسمة بيوتى ف نص السكة الجديدة او بشندى وحاولى تفاصلى ف اسعار البودرة بس كريم الاساس سعرة ثابت

بالنسبة بقى لل اى شادو والروج والجليتر والكلام دة
انا بشتريهم من محل جملة ف نص العباسى هاحاول اتأكد لك من عنوانة تانى بكرة
بصراحة المحل دة عندة كل ماركات الاى شادو والشامبوهات والروج بس بأسعار جملة
انا اشتريت من عندة اى شادو جليتر بس بحطة على جسمى كدة بيدى لامعة تحفة
ودة انصحك تشترية لآن بيدى للجسم لامعة حلوة اوى لو لابسة حاجة كت
بالنسبة للشامبو انا بحب اوى شامبو سباركل بحس انة خفيف على شعرى وبينعمة
اة نسيت اقولك محل الجملة اللى بقولك علية دة لازم تشترى من عندى حمام كريم للشعر اسمة hair silk
هو عندة منةانواع انا بستعمل اللى بالنخاع تحففففففففففففففة بينعم الشعر خالص
ممكن تحطية على شعرك لحد ما تاخدى الشاور بتاعك وبعدين تغسلية

فى بقى وصفة كمان
انتى تجيبى معلقة سكر ومعلقة زيت زيتون ومعلقة جلسرين ونص ليمونة
وتخلطيهم على بعض
وتدعكى بيهم وشك بحركات دائرية
ولو عندك صبر شوية اعملى الخلطة دى لجسمك كلة بس زودى المقادير
دى بتشيل اى خلايا ميتة وبتفتح البشرة خالص

بصى كمان
اوعى تكونى بتستعملى الصابون العادى ف غسيل اوشك
انا مبحطوش على وشى خالص
اشترى صابونةديتول الزرقا او الصفرايا سلام بقى لو جايلك من السعودية
وتدعكى بالليفة على بسيط
عايزاكى كمان قبل ماتنامى تكونى محضرة قزازة فيها جلسرين ودة بشترية من الطرشوبى وتعصرى عليها نص ليمونة واتعودى قيل ماتنامى تدهنى وشك منة
واول ما تصحى الصبح اغسلية بصابونة ديتول
مش عايزة اقولك على التعومة والبياض
وعلى فكرة دة الروتين اليومى بتاعى يعنى لازم اعمل كدة كل يوم

يا رب مكنش صدعتك ولو عايزة تسألى على اى حاجة فانا موجودة

[kind_heart2008]

ياحبيبتي ده انا الليصدعتك مش انتي
ميرسي ياجومانا
قوليلي البودرة وكريم الاساس اشتريهم منين بالظبط ؟ انا بشتري من مكياج العروسه بس مبتعجبنيش حاجته
ومحل الجمله فين برده بالظبط واسمه ايه؟
والجليتر اللي بيدي لمعه للجسم اسمه ايه؟
وكريم هير سلك اللي بتقولي عليه فين وبكام؟والاحسن هو ولا كريمات صانسيلك لتجديد الشعر التالف

انا بستعمل لوشي دايما صابونة كلين كلير
وبتهيالي انا ماينفعش احط جلسرين على وشي لان بشرتي دهنيه شويه

[jomana8090]

انا كمان بشرتى دهنية بس الجلسرين بينعم البشرة ومش بيسيب اى اثار للدهون بمجرد ما بتغسلية بالصابونة الصبح بيبقى مفيش اى اثر للدهون ف البشرة
ودة هتلاحظى اثارة اوى لما تكونى حاطة بودرة او كريم اساس هتلاقى مفيش اى قشر ف وشك او خلايا ميتة ودة هيساعدك ان مكياجك يطلع حلو وطبيعى وميقشرش

بالنسبة للبوردة وكريم الاساس من محل بيوتى اللى ف نص السكة الجديدة او من عند بشندى اللى ف نص السكة الجديدة برضة

كريم هير سلك بشترية من بتاع الجملة اللى هاجيبلك وصف عنوانة بكرة لآنى منزلتش النهاردة وبشترية ب11 جنية
ودة بتحطية على شعرك وانت بتاخدى الشاور وتغلسية ف الاخر
بالنسبة لهو احسن ولا كريم صانسيلك؟
لآ طبعا صانسلك افضل
بس صانسلك وصل ل40 جنية دلوقتى بستعملة لما يكون خطيبى هايجى واحب شعرى يبقى شكلة حلو قدامة
انما فالايام العادية بستعمل هير سلك هو مقارب اوى لصانسيلك

بالنسبة للجليتر انا هاصورهولك وانتى هتلاقية ف محلات كتير بس هو اساسا جليتر للوش بس انا بحطة على جسمى كلة وفى منة الوان كتير بس انا اشتريت منة الابيض لآنة لمعتة على الجسم تحفةوهتلاقى منة كتير عند بتاع الجملة اللى بقولك علية

هاحول اصورهم ويا رب الصور تظهر

[jomana8090]

[kind_heart2008]

ميرسي ياحبيبتي على مجهودك معايا
بس ايه اللي في علبتين صانسيلك ايه الفرق بينهم؟
ومعلش اقرايلي اسم الجليتر لاني مش عارفاه

[jomana8090]

الاولانى الاصفر دة كريم صانسيلك بتحطية على شعرك وهو ناشف ودة بديل للزيت بيطرى الشعر وبيخلية حلو اوى بالاضافة لآنة مش بيسيب دهون ف الشعر زى الزيوت العادية

التانى دة بقى ماسك صانسلك اللى بقولك علية بيتحط على الشعر وهو مبلول بتسيبة حوالى ربع ساعة او على اد ما تقدرى على شعرك وبعدين تغسلية
بالنسبة لآسم الجليتر سيبك من اسمة احفظى بس شكلة لآنك لو سألتى بالاسم عمر ما حد هايعرفة
احفظى شكلة وشوفية ف محل الجملة اللى بقولك علية ف العباسى
انا عارفة المكان بس مش عارفة اوصفة فهاحاول اشوفلك حاجة معروفة قريبة منة علشان تعرفى توصلى لة على طول