|
للبحث في شبكة لكِ النسائية:
|
النجم الفضي
كتبت بواسطة ام اروى 86
جداااااااااااا يا أم أروي خصوصا انها حدثت بالفعل وعندما يأتي أدهم مش هقولك بقي ههههه
فعلا ربنا يحفظ بناتنا ونسائنا يا رب ولا يقعوا في معصيه ابداااااااااا تسلم دعواتك
عموما النساء كمان مش البنات فقط
ضعيفات تجاه الكلمه الحلوه
قد يكون قله ثقه ،ضعف ديني وتربوي واسري حسبي الله ونعم الوكيل في الشباب المستهتر اللي بيتسلي
تابعينا لسه القصه ما بدأت بعد
النجم الفضي
الجزء الخامس
يوم السبت فعلا كان يوم المفاجآت
منى خلصت المحاضرة الاولى وطلعت تقعد فى الكافتريا قبل ما تدخل المحاضرة اللى بعدها
وهى مش مصدقه نفسها أنها بقت بتحضر وتواظب على الحضور أمتحانات آخر السنة على الابواب ربنا يستر
الموبايل رن أيه ده سماح قررت تتعطف وتكلمنى
ألو يا هانم
سماح بسرعة:أنتى فين
منى بسخرية:هكون فين فى الكلية طبعا
سماح بتكمل بسرعة :أطلعي لى بره بسرعة بسرعة
منى باستغراب:بره فين هو فى ايه
سماح مستعجلة:بطلى لماضه واطلعى بره بسرعة مستنياكى عند الباب الحته اللى بنتقابل فيها
منى باستغراب أكتر:يابنتى فى ايه بس قولى
سماح يالابقى يا منى خلصى هقولك لما أشوفك
خرجت منى وأتجهت ناحيه المكان اللى بيتقابلوا فيه
لقت سماح منتظراها
منى بصوت عالى :أيه يابنتى فى أيه
سماح مدتهاش فرصه مسكتها من أيدها وشدتها وجريت بيها لعبور الطريق
منى بتجرى معاها فى ايه يا سماح فهمينى واخدانى فين
طب حاسبى العربيات هتخبطنا حاسبى
بعد ما عبروا الطريق بسلام والحمد لله
منى شدت ايدها من سماح بالعافيه وأتكلمت بانفعال شديد: ايه يا سماح كنتى هتموتينا يا مجنونه فى ايه بتسحبينى وراكى كده ليه مش هتبطلى جنان بقى
سماح بضحك والله أنا ماليش دعوى انا بنفذ الاوامر وأدت التحية العسكريه وهى بتبص ورا منى
ألتفتت منى وجدت سامح واقف وراها بابتسامته الجذابه
أزيك يا منى
منى تنحت وردت بلخبطه:الحمد لله
للمرة الثانية شدتها سماح من ايدها اربع خمس خطوات أخرى
منى باستنكار ايه يا سماح
سماح بتشاور على شاب واقف أمام عربيه سبور وبتقول أعرفك ده بقى محمد صاحب أخويا
محمد بعد نظرة متفحصة قال بابتسامه: أهلا وسهلا أنتى بقى منى ومد ايده عاوز يسلم عليها
منى تركته ويده ونظرت لسماح كان سامح حصلهم ووف جنب منى
سماح باستنكار ايه يا منى محمد بيسلم عليكى
منى لسه بدون شعور بتبص لسامح كأنها بتقوله أعمل أيه
سامح بتشجيع:ده محمد صاحبى يا منى متقلقيش
مدت أيدها وسلمت
محمد بهزار:هو انا هخطفك يعنى
لف محمد بسرعه وركب العربيه وجلس خلف عجلة القيادة وقال :يالا يا جماعه
منى لسماح :يالا فين
سماح فتحت الباب الخلفى وتقريبا دفعت منى :اركبى بس دلوقتى يالا هنتمشى شويه متخافيش
سامح:يالا يا منى الطريق واقف(طريق ايه العربيه عند الرصيف)
محمد :بيب بيب بيب بيب بيب
ركبت منى ورا جنب سماح وركب سامح جنب صاحبه
منى بقلق واضح لسماح:احنا هنروح فين دلوقتى
التفت اليها سامح من الكرسى الامامى ووجه يده لها على هيئة مسدس وقال بجديه مضحكة :أنتى مخطوفه يا آنسه نيااهههههههااااااااا عمليه نظيفه ميه الميه
سماح ومحمد فطسانين من الضحك
منى بتبتسم بقلق
(يا ترى هنروح فين انا خايفه حد يشوفنى يارب استر يارب انا ايه اللى خلانى اعمل كده لو حد شافنى هتبقى مصيبة)
أيه ده أحنا رايحين الاهرامات؟
سماح :أومال يعنى هنروح باريس
سامح ملتفتا لها :أيه مش بتحبيها هى كمان ؟
أبتلعت منى ريقها وردت عليه: يعنى ايه هى كمان دى
سامح مداعبا :ايه نسيتى الشاى المسكين اللى سايباه يتعذب
محمد :شاى؟شاى ايه ده اللى بيتعذب على أخر الزمن
سامح :خليك فى حالك
(خفق قلب منى بشده من القلق والكسوف )
وأخيرا وصلوا
بصراحة منى أول مرة تشوف الاهرامات فى الواقع مش فى التلفزيون بس بصراحة روعة والاروع والاجمل هذا الهواء العليل وكأن هذا النسيم شعر بقلقها فقرر ان يداعبها ويحوم حولها ويتخلل الى رئتيها بهدوء ولطف
قررت سماح فجأة أن تركب الجمل وجريت ورا الراجل زى الطفله :أستنى يا عم أستنىىى
صاحب الجمل: نخخخخ نخخخخ
ظل الجميع يضحكون على منظرها خايفه بس عاوزة تجرب
قرر محمد ان يفعل مثلها وركب جمل آخر :أستنى يا سماح تيجى نعمل سباق
سماح تلتقط أنفاسها وتتكلم بصعوبة :سباق ايه ده كفايه بس يمشى
فى هذا الوقت وقف سامح ومنى وحدهما يلوحان لراكبى الجملين
التفت سامح لمنى قائلا: تحبى تركبى زيهم
منى بسرعه :لالالالالا مينفعش
سامح :ليه بس
منى :معلش انا هتفرج بس
سامح متابعا حديثه :طيب أتفرجى بقى على صلاح الدين الايوبى ده :ركب سامح على الحصان بخفه ورشاقه واخذ يلف بيه حول منى بهدوء وكأنه خيال منذ زمن
منى ضاحكه :ايه أنت بتحارب ولا ايه
سامح بنبره جاده :فعلا أنا بحارب
منى : ها وبعدين كسبت المعركه ولا خسرتها
سامح بنفس النبرة :انا عمرى ما أخسر أبدا
منى تضع يدها على عنينها :بطل بقى تلف حوليا انا دخت كده
سامح:مينفعش أبطل أنتى خلاص وقعتى فى الأسر
نظرت منى اليه وهو يكمل حديثة ( أنتى خلاص بقيتى أسيرتى )
كملت منى كلامها شكل الحوار عجبها: طيب معلش أطلق سراحى ومش هعمل كده تانى
سامح :بقى تحاربينى وتقولى معلش
منى :أنا ؟وانا معايا ايه بقى أحاربك بيه
سامح وقد أقف الحصان : عنيكى الحلوة دى
(منى غرقت فى شبر ميه وأحمر وجهها خجلا وقالت :أناااا هروح أتمشى شوية)
مشيت منى بسرعه وكأنها تركض كانت عاوزه تهرب من قدامه بأى شكل
باعدت منى خطواطها ورغم الهواء حولها من كل جانب الا أنها شعرت بسخنه شديدة فى جسدها وكأنها محمومة
قلبها كان بيدق بسرعة وبتحاول تسيطر على نفسها مش عارفه حتى وجدت بعض الصخور فجلست تلتقط أنفاسها
(أعذروها يا جماعة أول مرة حد يقولها كلمة حلوة )
شوية والموبايل رن
ألو
سماح: أيه يا منى أنتى فين
منى :أنا بتمشى شوية
سماح : كده هنتوه من بعض أرجعى من نفس الطريق وقابلينا يالا
منى باستسلام طيب
رجعت منى من نفس الطريق لحد ما شافتهم جايين عليها مقدرتش تبص لسامح خالص
حاولت تتماسك وتركز على سماح
سماح بانزعاج: كده يا منى قلقتينى عليكى أفتكرتك توهتى ايه اللى خلاكى تسيبى سامح وتمشى لوحدك كده
رد سامح بسرعه :منا قولتلك راحت تتمشى أهمدى بقى
منى بتوتر: ايوه ايوه بتمشى خلاص يا سماح متعمليش فيها بنت خالتى
محمد :طب يالا ناكل بقى أنا مت من الجوع
خلصت الفسحة وهما راجعين طلب محمد من سامح أنه يسوق مكانه شوية
وطول الطريق وهما راجعين سامح عينه على منى الجالسه خلفه
كل ما تبص تشوفه باصصلها فى المرايه تدور وشها
محمد : أه الجمل ده مرهق أوى
سماح : أنا حاسه انى لسه راكباه وبتمرجح بجد دوخت
محمد متابعا : ها يا منى الاهرامات عجبتك
منى : اه اه جميلة
محمد : ده أنتى اللى جميلة
(منى أتكسفت جدا جدا تقريبا ده يوم الغزل العالمى)
سامح بنبرة حادة موجها كلامه لمحمد : جرى أيه يا أمورأنت مستغنى عن لسانك ولا أيه
محمد : ايه يا عم انا قولت حاجة والتفت الى منى خلاص يا ستى أنتى مش جميلة أنتى قمر بس
ضغط سامح فرامل السيارة وتكلم بنبرة أكثر حدة : أنا ما بهزرش يا محمد
ساد جو من التوتر داخل السيارة تكلم محمد معتذرا : خلاص يا سامح انا اسف يا سيدى مكنتش أعرف
سامح بحدة : مكنتش تعرف أيه
محمد : لا ولا حاجة
سماح تكلمت محاولة لتخفيف جو التوتر : يالا يا سامح بقى أحنا واقفي فى نص الشارع
خبطت محمد بخفه على كتفه : أتلم
ثم غمزت بعينيها لمنى قالت بصوت منخفض جدا :يا جامد انت
أدار سامح محرك السيارة وأنطلق بها من جديد وهو لا يدرى أنه أنطلق أيضا بالقلب لذى يقبع خلفه وقد أبتلعها الكرسى من كثرة أنكماشها فيه تعصف بها مشاعر عديدة بين التوتر والقلق والحب
دلفت منى الى سريرها وتدثرت بالغطاء بشكل كامل لتخفى الابتسامة التى لا تريد ان تفارقها منذ ودعتهم بالقرب من بيتها
أغمضت عينيها لتنام فشعرت باهتزاز الموبايل تحت الوسادة فاحتارت هل هذه أهتزازات الفيبريشن أم قلبى هو الذى يرتعش
أخرجت الموبايل ونر فيه فوجدت رسالة من رقم غريب فتحت الرسالة فوجدت فيها جملة واحدة من كلمتين
(( أيوا بغير ))
مربية ناجحة
مين ادهم ده كمان ؟
بقولك ايه انا عارفة قصدك ايه
بلاش تشوقينا
احنا متشوقين على الجاهزههههههههه
النجم الفضي
النجم الفضي
نيهااااااااااااااااااااااي أدهم كان سبب خناقه صغيورة كدة بيني وبين زوجي ههههههههه
بس بش هقووووووولك عشان محرقش القصه هههههه
شوووفي انا بحط اجزاء كتير اهي كده حلو والا هتبقي كتير عليكم ؟؟
النجم الفضي
الجزء السادس
آخر يوم فى الامتحانات
يااااااااه يا منى هو احنا بنذاكر ولا داخلين سبق انا حاسه ان المواد كانت بتجرى ورايا
منى ضاحكة: طبعا يا بنتى بنذاكر فى شهر اللى مذاكرناهوش فى سنه
بس خلاص الحمد لله الامتحانات عدت على خير انا متفائلة
سماح بتدعى يارب خالينى متفائلة زيها كده....كملت بشغف طفولى ها ياجميل النهاردة آخر يوم مش هنحتفل بقى
منى بتضحك ايه هنعمل عيد ميلاد يعنى علشان خدنا الاجازة
سماح لا يا ماما اكتر من عيد ميلاد......ششششش أحنا هنروح السينما
منى : يا سلام مين بقى اللى قال كده
سماح بثقه:أنا هو انتى تقدرى تقولى لاء
منى : ولو قولت لاء يعنى هتعملى ايه هتعلقينى
سماح مش لوحدى مرفت وأسماء هيعلقوكى معايا ده احنا متفقين من أسبوع حرام عليكى
مش شايفاهم جاين مظبطين نفسهم النهارده ازاى
منى :أاااااااه علشان كده ووانتى بقى مش مظبه نفسك ليه ولا أه صحيح انتى مظبطه نفسك على طول
سماح بغرور:تنكرى
منى :لالا منكرش طبعا
سماح: ها يامنى قولت_______ قاطعتها رنة تليفونها
سماح مستغربة ايه ده دى ماما
منى : طب وفيها ايه مالك أستغربتى كده
سماح:مفيش أصلها مش متعوده تكلمنى وانا بره ......ألو أزيك يا حبيبتى عامله ايه
وفجأة نطت من مكانها مفزوعه:ايه بتقولى ايه سامح ..أمتى ......أزاى
منى أتفزعت هى كمان ومش عارفه ايه اللى حصل :فى ايه يا سماح ماله
سماح قفلت وبتلم حاجتها بسرعه:انا ماشيه يا منى ها سلام
منى جريت وراها أستنى يا سماح قوليلى فى ايه
سماح وهى بتمد جامد مش عارفه يا منى ماما بتقول سامح أتصاب فى التدريب ونزلوه أجازه
منى أتخضت وأتفزعت جدا ايه اتصاب وهو عامل ايه دلوقتى
سماح وهى بتشاور لتاكسى مش عارفه لما اشوفه هبقى اكلمك
منى :وانا لسه هستنى انا جايه معاكى
_________________________________
راحوا على البيت هما الاتنين
خدوا السلالم جرى
سماح خبطت بلهفه وهما الاتنين بياخدوا نفسهم بصعوبه
محمد فتحتلها الباب وأتخض من منظرهم وهما مش عارفين ياخدوا نفسهم
فى ايه يا محمد سامح فين وحصله ايه
محمد:براحه شوية مالكوا كده أهو جوه فى أوضته
مامتها :متخافوش كده يا بنات الحمد لله أنها جت على أد كده
دخلت سماح ومنى وراها من غير تفكير وبمنتهى اللهفه
سامح حصلك ايه يا خويا ايه ده دراعك ماله
سامح وهو عينه على منى:متخافيش يا سماح متخافيش انا كويس
سماح :مخافش ازاى ايه اللى حصلك
محمد دخل وراهم :متخافيش يا ستى أخوكى ده عامل زى القطط بسبع ترواح دى أصابه خفيفه فى كتفه ايه هتعملوه قطز
سامح بصله وشاور لسماح عليه :لو شوفتوه فى المعركه اقتلوه
سماح بتضحك:الحمد لله ده انا اتخضيت حتة خضة عليك...التفت لمحمد طب هو اتصاب انت بقى نزلوك اجازة ليه
محمد باستعراض:اومال يابنتى انا محدش يقدر يقولى لاء هناك
سماح بتضحك:لا يا شيخ
منى انتبهت انها واقفة ساكته وابتدت تهدى شويه خصوصا بعد ما اتطمنت عليه:حمدالله على السلامة
سامح :الله يسلمك
منى:بسيطه الحمدلله ؟
سامح:الحمد لله ...اطمنى
سماح بابتسامه لئيمه لمحمد:منى اول ما سمعت الخبر جات جرى قولتلها يا بنتى خاليكى وانا هطمنك قالتلى لاء هو انا لسه هستنى وصممت تيجى معايا...وضحكوا هما الاتنين
منى اتحرجت جدا ونظرت لسماح نظرة سريعه بعتاب وقالت :طيب أستأذن انا بقى وبتلف علشان تمشى أستوقفها سامح :أيه يا منى بسرعه أستنى شويه
منى بأحراج:معلش أصلى...أصلى مقولتش لماما انى هتأخر
دخلت أم سماح فى اللحظة دى قائله :ايه يا حبيبتى ماشيه بسرعه كده انتى لحقتى تاخدى نفسك حتى
منى: معلش يا طنط أصل ماما متعرفش أنى هتأخر
الأم:طب ما تكلميها فى التليفون ميصحش تيجى وتمشى كده بسرعه حتى متشربيش كوباية ميه
تدخلت سماح خلاص يا ماما انا هتصرف وأخدت منى بره الاوضه :متكلمى مامتك قوليلها انك هتتأخرى عندى شويه
منى : لا يا سماح هتقولى ليه ومش ليه أقولها ايه بقى
سماح:قوليلها انى تعبت بعد الامتحان وانتى اضطريتى تروحى معايا البيت
منى :لا طبعا انا مش بحب أكدب على ماما
سماح:دى كدبه بيضه مش هتضر
منى :لا ياستى
سماح :والله يا منى لو مشيتى دلوقتى هزعل منك جدا وبعدين يعنى هو الواد اللى مرمى جوه ده مش يستحق انك تقعدى معاه شويه اطمنى عليه هى دى الصحوبيه برضه
منى متردده جدا وعاوزه تمشى بس من جواها عاوزه تقعد
حسمت منى قرارها :أتصلت بمامتها وقالت لها صحابى ماسكين فيا عاوزين يخرجوا بعد الامتحان يتمشوا شويه وأستأذنت انها تروح معاهم _(ياسلام على الادب)
مامتها وافقت طبعا لانها كانت شايفاها بتذاكر ازاى وقت الامتحانات
بس على شرط انها متتأخرش ومتروحش فى حته بعيد
منى فرحت جدا طبعا قفلت مع مامتها وهى ضميرها مستريح( قال يعنى كده مكدبتش)
سماح ده صوت الباب: أهلا أزيك يا طنط أزيك يا ياسمين عاملين اتفضلوا
جات مامة سماح رحبت بالضيوف سماح بتعرفهم على بعض :دى طنط جارتنا يا منى ودى ياسمين بنتها تانيه جامعه أمريكية
دى منى صاحبتى الانتيم جدا جدا : أهلا....أهلا
أم ياسمين:خير يا أم سامح ..سامح عامل ايه دلوقتى
أم سماح:الحمد لله كويس الاصابه بسيطه ده انا اول ما شوفته كنت هموت من الخضه عليه وافتركتها حاجه كبيرة
ام ياسمين:ربنا يخليهولك وتفرحى بيه عن قريب
ام سماح :يارب
ياسمين:ممكن ندخله يا طنط
ام سماح:اوى اوى يا حبيبتى أتفضلوا اتفضلوا
دخلت أم سماح فى الاول وبعديها ياسمين ومامتها
سماح:ايه يا منى وقفه هنا ليه تعالى
منى :لالا أجى فين هى صحيح الاوضه كبيرة بس مش للدرجادى يعنى
سماح :يعنى هتقعدى هنا لوحدك
منى:يوه بقى يا سماح مش انتى اللى صممتى انى اقعد منا كنت عاوزه امشى علشان الاحراج ده
سماح بعتاب:ايه يا منى اللى بتقوليه ده هو انتى غريبه ولا ايه احراج ايه.....خلاص يا ستى انا هقعد معاكى هنا ده حتى مبطيقش أم ياسمين دى أصلها لزجه اوى
منى ضحكت على التعبير اللى استخدمته سماح:ايه لزجه دى
...بقولك ايه يا سماح هى ياسمين دى مخطوبه
سماح :لا ليه عندك ليها عريس ولا ايه
منى :لا بس ...بسأل يعنى أصلها حلوة أوى شكلها كده بنت ناس فتصورت يعنى انها مخطوبه
سماح لا يا ستى وقربت من منى وقالتلها فيكى من يكتم السر
منى بصتلها باستغراب :سر ايه
كملت سماح: أصلها متعلقه بواحد صاحبنا
منى :يعنى ايه
سماح: يعنى بتشحب
منى بحذر:بتحب مين
سماح ههههههههه:شوفى انتى بقى ....اه يا قلبى يانى
طبعا الموضوع مكنش محتاج توضيح البت جايه ملهوفه علشان تطمن عليه
صوت الباب مره تانيه:يوه مش هنخلص ...أهلا يا طنط أهلا أتفضلى
ماما.... يا ماما طنط هدى جات
أم سماح :هدهود حبيبتى أتأخرتى أوى تعالى تعالى ادخلى.... وخادتها على الصالون
سماح :دى طنط هدى أنتيمة ماما بس أيه ألزج من اللى جوه .......خنقه وايه بقى لسه خارجه من ليالى الحلميه طازة
منى بتضحك: يخربيت عقلك يا سماح أنتى شركتيها خالص
سماح :دى لما بتيجى ماما تنسانا خالص
منى :ليه يعنى
سماح :كل مره تبقى جايبلها كاتلوجات شكل مره ديكور وأسكسسورات وبرفانات وميكب
على كل لون يا بطسطا
منى بضحك:أنتى مش معقوله ..والله انتى لسه خارجه من ليالى الحلميه بس من عند العوالم
أم سماح : يا سماح أعملى لطنطك هدى النسكافيه بتاعها ومتنسيش الضيوف اللى عند اخوكى قدميلهم حاجه
سماح بتأفف :حاضر ماأنا الروم سيرفيس النهارده تعالى يا منى
دخلوا المطبخ وعملوا شوية عصاير والنسكافيه طبعا
سماح:منى تحبى تقدمى طلبات قسم الطوارىء ولا قسم نازج الصلحدار
منى:لا انا معرفش طنطك هدى دى روحى انتى قدميلها
سماح :ماشى يا نيرس اتفضلى على قسم الطوارىء
دخلت منى قصم الطوارىء قصدى عند سامح وضيوفه
وقدمتلهم العصير :شكرا يا حبيبتى ....ميرسى ..... شكرا يا منى....... مأنتى عارفه أنا ماليش فى العصايروبغمزه خفيفه أنا بحب الشاى
محدش خد باله غير محمد فضحك وقال لمنى هاتى كوباية العصير بتاعته خساره فيه
منى كانت خارجه من الاوضه لقت سماح دخله وقفوا هما الاتنين عند باب الاوضه
والحوار كله كان عباره عن سلامات وتحيات ويارب نفرح بيك قريب يابنى ولسه بدرى يا طنط
لسه عاوز أكون نفسى وأعمل بيت معقول الاول ومتقلقش أنوى أنت بس وهتشوف ده انت الف واحده تتمناك
الحوار ده كله معجبش منى خالص وقاعده تكلم نفسها (الست باين عاليها عاوزة تجوزوا بنتها وتجهزوا كمان ...والبت كمان شكلها بتحبه عينها مش بتنزل من عليه..... لا وايه زى القمر .جاتنا نيله فى حظنا .......لا لا يامنى انتى برضه حلوه متقلليش من نفسك كده ..صحيح هى أحلى وصحيح ناعمه وبسكوته وصحيح جامعه أمريكيه وصحيح شكلهم أغنيا وهيقوموا بالليله كلها....بس انا برضوااا ....لالا يا منى خاليكى واثقة من نفسك ... يا شيخه روحى كده)
النجم الفضي
الفصل العاشر
منى حست بغليان وخافت يبان عليها والست سماح مصممه تفضل واقفه معاهم مش عاوزاها تقعد لوحدها بره
الحمد لله منى لمحت البلكونه :سماح انا هقف فى البلكون شويه لحد ما الناس تمشى
سماح موافقه :طيب يالا
أتحركوا بهدوء وسماح دخلت منى البلكون وخرجت للناس
البلكونه حقيقى تحفه واضح ان سامح عامل فيها شغل عالى بما انها بلكونة أوضته
ومساحتها ساعدته يعمل فيها اللى هو عاوزه
تكعيبة عنب قفص عصافير كرسى هزاز أصارى فل وبنفسج وورد
منى أخدها المنظر أوى :الله ده سامح ذوقه عالى وشكله فنان دى لو البلكونه دى عندى فى البيت مخرجش من البيت ابدا
ايه عجبتك......هههههايه يا بنتى اتخضيتى كده ليه
أخص عليكى يا سماح فزعتينى.......
سماح :أنتى اللى سرحانه.....مش ملاحظه انك بقيتى تسرحى كتير الايام دى
منى :أسكتى بقى قطعتيلى الخلف
سماح انتى لسه هتتخضيى قوليلى بسرعه تحبى تورته ولا ميلفيه
منى :لالالا ماليش فى الحلويات خالص
سماح مصممه :خلصى محمد واقف على الباب أقوله يجيب ايه
منى :هما مشيوا
سماح :ايوه ومحمد نازل يجيب حاجه حلوه علشان سامح يعنى
.... هاااااا قولى
منى :بجد ماليش فى الحلويات مش عاوزه
سماح سابتها وقامت :مش بمزاجكك هقوله يجبلك زي ....وخرجت
منى كان نفسها أوى تجرب الكرسى الهزاز طول عمرها بتشوفوا فى التلفزيون بس
قعدت عليه براحه وهى بتضحك زى الاطفال اللى اول مره يركبوا مرجيحه
حقيقى حصلها استرخاء غمضت عنيها بهدوء ..الهز الخفيف وريحة الفل والنسمه الجميله دواء لاى متوتر
شعرت منى بأنامل بتلمس كتفها فتحت عيونها والتفت :حاولت تقوم مسك كتفها وقالها ارجوكى خاليكى
منى شعرت بحياء شديد من اللمسه وفضلت فى مكانها
سامح : انا واقف من شويه ...تعرفى لو كنت بعرف ارسم كنت رسمتلك صورة وانتى فى حالة الاسترخاء الجميله دى
منى :ابتسامه خجوله :أنت قومت ليه من السرير كنت خاليك مرتاح
سامح: انا برتاح لما بشوفك
منى : هى .هى فين سماح
سامح بلوم:بتسألى عليها ليه
منى بتحاول تبقى طبيعيه قالت:لا ابدا عادى
سامح بيشاور على ديكور البلكونه :مقولتيش ايه رايك فى ذوقى
منى بابتسامه :ذوقك حلو أوى
سامح :مش أحلى منك...وكمل أنتى جيتى قعدتى هنا لوحدك ليه
منى :ابدا عشان الضيوف ياخدوا راحتهم
سامح بنية الاغاظه:كنتى جيتى قعدتى معانا دى ياسمين قعدتها حلوه اوى
صاحبتنا بما أنها معندهاش خبرة فى عمايل الرجاله أتغاظت فعلا وانفعلت كمان كأنه شط عود كبريت:اه منا عارفه علشان كده قولت اسيبك تشبع من الحلاوة براحتك
ضحك سامح ضحكه كبيره غاظت منى أكتروخالتها تنفعل أكتر
منى قالت بعصبيه بتضحك على ايه على فكره بقى انا ميهمنيش
سامح بثقة :منا عارف
منى اندهشت ومن غير ما تحس قالتله بانفعال:على فكرة بقى انت مغرور
ابتسم وقال لها :يااااه ده انتى شكلك مضايقه منى اوى
منى سكتت بتحاول تظبط انفعالتها بس بعد ايه: ولا مضايقه ولا حاجه وبعد أذنك بقى عدينى عاوزة أمشى
سامح بعناد:مش هاعديكى انتى نسيتى ولا ايه ولا كنتى فاكرانى بهزر
منى :نسيت انفعالها:نسيت ايه
سامح:هو انا مش قولتلك انتى بقيتى أسيرتى
منى اتلخبطت وغارقانه فى شبر ميه قالت أقوم أحسن وجات تقوم مسك ايدها وحالفها بحياته أنها تقعد
(كل ده حرام اصلا يعنى هى جات على الحلفان )
قعدت منى وهى مرتبكه جدا وكانت متوقعه انه يسيب ايدها بعد ما تقعد لكن محصلش
فضل ماسك ايديها ومركز على عيونها ولو كان نبض القلب بيتسمع كان صوت نبض قلبها أخترق أذنه وهى بتقوله :سيب ايدى لو سمحت
هو مسكها أكتر :وقالها مش هسيبك يا منى أنتى كل مرة تهربى منى وبسيبك وبقول معلش بلاش اضغط عليها ...المره دى مش هسيبك ... مفيش هروب المره دى بالذات
وأكمل :عارفه ليه .. علشان أتأكدت ان القلب التانى اللى كان حيران بقى هو كمان غيران
وطالما بقى غيران يبقى لازم تتحط نقطه ومن أول السطر
منى بتبلع ريقها بصعوبها وبتحاول تفلت ايديها من ايده :سيبنى يا سامح
سامح زى ماهو مصمم :مش هسيبك ..يامنى أنتى متعرفيش انتى بقيتى ايه عندى ايوا اتعرفنا على بعض من فترة بسيطه وايوا مشوفناش بعض الا مرات قليلة وايوا متكامناش الا مرات أقل
لكن المشاعر مش بعدد المرات المشاعر حسابتها مختلفه ومقايسها مش عاديه
منى حرارتها ارتفعت جدا لدرجة ان وشها أحمر جدا وهو حس بحرارتها دى من مسكة ايديها
لفت وشها لتخفى انفعالتها وقالت:سامح انت عاوز ايه دلوقتى
سامح زاد ضغطه على ايديها واتلكم بنبرة زاد فيها الحنان على الحسم:منى انا مش هلاقى وقت أنسب من الوقت ده علشان أعبر عن مشاعرى ...أنا فى الاول كنت قلقان علشان مكنتش متأكد منك
لكن بعد ما شوفت لهفتك عليا وغيرتك من واحده تانيه أنا بقيت متأكد خلاص
وبعد كده زى ما قولتلك يبقى لازم نقطة ومن اول السطر
وزى ما أتاكدت من مشاعرك لازم انتى كمان تتأكدى من مشاعرى .. انا اديتك القلب المره اللى فاتت مش علشان هديه وبس لاء.. ده كان تعبير رمزى علشان تتأكدى أنى قلبى معاكى وتعرفى أنى _______ يا منى أنا....
ايه أتأخرنا عليكوا : دخلت سماح وهى بتقول الجمله دى حصلت انفعالات كتيرة فى اللحظة دى
(ههههه يا بنت اللذين يا سماح)
سماح تنحت لما شافت سامح ماسك ايد منى وقاعد قريب اوى منها ومنى وشها احمر على الاخر وعنيها ابتدت تظهر فيها الدموع
ومن الناحية التانيه :منى شدت ايدها بسرعه من ايد سامح ومسحت وجهها بأديها الاتنين وكانت تمسح حمرة خجلها
لكن اللى مقدرش يمسك نفسه من الانفعال حقيقى هو سامح :انطفض فجأه وهو بيلف لسماح وبيشخط فيها وهو بيدور على كلمات مناسبه يدارى بيها غضبه من أخته اللى دخلت فى وقت مش مناسب خالص: ايه ده فى حد يدخل كده فزعتينا يا شيخه حرام عليكى
سماح بقى موقفها محرج جدا ومعرفتش تعمل ايه غير انها تمد العلبة الجاتوه اللى فى ايديها لقدام وتقول:جبت الجاتوه
ورجعت لورا فى اتجاه محمد اللى كان واقف وراها بخطواط قليله وسمع اخوها وهو بيشخط فيها
فى نفس اللحظه اللى منى خرجت جرى من البلكونه وبقى موقفها أشد أحراج من اى حد تانى
وحاولت تدارى وهى بتقول:انى كنتى فين يا سماح سايبانى لوحدى كل ده ليه
سماح وهى مزبهله:روحت مع محمد نجيب الجاتوه
منى عامله عبيطه:ايه خرجتى من غير ماتقوليلى طب كنتى قوليلى كنت جيت معاكوا
سامح خرج من البلكونه وهو بيتحاشى النظر للجميع
محمد :ايه يا سامح مالك اتعصبت كده ليه
سامح بعصبية: وانت مالك انت
محمد :لا مالى طبعا بتشخط فى خطيبتى ليه
سامح برق لمحمد :ايه خطبتك
محمد وهو بيرفع صباعه مهددا :مفيناش من ضرب ما انا عارفك ايدك تقيله
سماح عامله مكسوفه: روق يا اخويا يا حبيبى علشان اقولك على المفجأة
سامح بنفاذ صبر:قولى هاا سامعك
سماح: لسه هتكلم ____محمد أستوقفها بأشارة من يده أستنى
محمد أتنحنح : تسمحلى يا عمى أطلب أيد أختك اللمضه ....فى الحقيقه يا عمى انا عامل حسابى على خطوبه أكتر من كده تبقوا طمعانين فيا
أبتسم الجميع وضحك سامح وهو بيقوله :وهتكلم ابوها امتى بقى
سماح:البركه فيك بقى يا سامح تفتح معاه الموضوع هو بيثق فيك
سامح :ماشى يا أختى لما نشوف ابوكى هيقول ايه
محمد بشغب:طب يالا بقى مش هتأكلونا الجاتوه بقى ولا ايه
وفى النهاية كل واحد أخد طبقة ومحدش بيتكلم لكن النظرات كانت كفايه جدا كل واحد بيعبر عن مشاعره فى هدوء
منى أكلت شويه من الجاتوه وشربت شويه من عصير الفراوله وفجأة حست ان الدنيا بتلف بيها والانوار بتنطفى وبرودة شديده تسرى فى جسدها وآخر حاجه شافتها سامح وسماح ومحمد بينظروا لها ثم ينظروا لبعض نظرات معينه لم تستطع ان تفسرها الا بعد ما فاقت بعدها بساعة
النجم الفضي
يالا يا بنات لا تنسي وردك من القراءن
أم قائدة
وردي والحمد لله كان بعد الظهر الله يثبتني
ولكن قولي روحو ناااااااااااااااااااااامو
تعرفي انه في كلا القصتين عامل مشترك
أصدقاء السوء أو بالأحرى الصاحب ساحب .........
الوصيفة الأولى
طيب الحمد لله على كده النهارده
اقوم اصلى ركعتين لله واللهم تقبلهم
نسلمى يا ام رودى وشكرا على الشاى والجاتو الموس
واضح ان حد فتن على وقالك انى بحبه جدا
ويا ريت الحلقه الى جيه تجبلنا لب ههههههههه
أعضاء قرؤوا هذا الموضوع: 0
رد مع الاستدلال
الروابط المفضلة