في سبيل الله نمضى (الجزء السادس ....حملة هانتغير بجد)

[ghofran2009]

(امسح كل ذنوبك)
+ايه الاخبار
=ده انت عملت امبارح فيا
حتة مقلب قعدت تحمسنى
وفى الاخر علقتنى ومشيت
+عارف وكان قصدى
=ايه!!
=طيب ليه كده؟
+لان لو اخدت كل حاجة مرة واحدة
هتتحمس شويه وبعديها بساعة
ولا كأن فى اى حاجه
=كلامك مظبوط
+وخلى بالك كل حلقة هيكون
نفس النظام
=بس على الله يجى بفايده
+قلتلك امبارح ثق فى الله
وما تحملش هم
=ماشى..مش ندخل فى الموضوع بقى
+ماشى..يلا
.3.
.2.
.1.

+السلام عليكم ورحمة الله
=وعليكم السلام ورحمة الله
+ايه الاخبار
=تمام..الحمد لله
+طبعا زى ماانت عارف ان حلقتنا
النهاردة عن ازاى نمسح كل ذنوبنا
+فى البدايه لو قلتلك
ممكن تعد ذنوبك اللى عملتها
من يوم ما اتولدت
=ايه ..
=انت بتكلمنى انا..
+طب بلاش ..
ممكن تعد ذنوبك اللى عملتها
طول الاسبوع ده
=يا عم انا ماشى ...
انت جاى تفكرنى باللى فات
+استنى انا قصدى ان انت
ماتعرفش تعد الذنوب اللى
عملتها النهاردة اساسا
+ومحدش يقدر يعدها الا
الله
=صح
+اذن ماحدش يقدر يمسحها
الا الله
=ونعم بالله
+ولكن ازاى نخلى ربنا يغفر (يمسح)
لنا كل ذنوبنا
=ازاى ..قول انت؟؟
+بصراحة مش انا اللى هقولك
=امال مين ..؟
+اللى هيقولك هو اللى هيغفرلك
كل ذنوبك..حيث قال
عز وجل
(فقلت استغفرو ربكم انه كان غفارا)
=صدق الله العظيم
=يعنى ربنا ممكن يغفر لى
ذنوبى كلها
+انت مش مصدق ربك ولا ايه ؟؟!!
=انا مصدق والله
ده حتى كلام ربنا
بس انا مش متخيل
يعنى ربنا هيسامحنى فى
كل اللى عملته؟
+انا عارف انك فرحان اوى
علشان كده اسمع الحديث القدسى
الجميل ده
(يابن ادم لواتيتنى بقراب الارض
خطايا ثم لقيتنى لا تشرك بى شيئا
اتيتك بقرابها مغفرة)...

=طب ولو ذنوبى اكتر
+ممكن ما تقاطعنيش تانى
=انا اسف بس انا فرحان اوى
+عارف بس اسمع للاخر
=ماشى انا اسف
+(يابن ادم لو بلغت ذنوبك
عنان السماء ثم استغفرتنى
غفرت لك ولا ابالى)
+انت واخد بالك من حاجه
=ايه ؟؟
+ان ربنا بيقول غفرت على طول
يعنى ما فيش قبلها ثم ولا حتى
فاغفر
=طب ودى فيها ايه
+فيها كتير
+ان الله لو قال ثم قبل غفرت
معنى كده ان فى فترة ما
ما بين استغفارك لربنا و
ان ربنا يغفرها لك
ونفس الكلام فى لو كانت فاغفر
مع ان اللغه بتقول ان الفاء
تدل على سرعة التنفيذ
ولكن خلى بالك ان حتى لو فى
سرعة فى عمل شئ
برضه هتاخد وقت حتى
لو ثانية واحدة
بس اخدت وقت
ولكن ربك عظيم
اووووووووى
ان معنى ان ربك ما يقولش
ولا (ثم )ولا(ف)
معنى كده ان مفيش اى وقت
ما بين نطقك للاستغفار
وان ربنا يغفرها لك
=ياه ..اد ايه رينا كريييم اوى
+والله ربك عظيم جدا ولكن احنا
اللى مش واخدين بالنا
+ولو تاخد بالك ان
فى جميع ايات القران
ربك بيقدم صفة الغفران عن اى شئ
يعنى مثلا
(ان الله غفورا رحيما)
ربنا قدم صفة الغفران عن الرحمة
لان استحاله ربنا يرحم شخص
كثيرالذنوب وبالتالى ربنا
هيغفرله ذنوبه وبعده ربنا يرحمه
ولو افترضنا ان قلبك حتة قماشة
بيضة وكل لما تعمل ذنب الذنب ده
يعمل نقطة سوداء على القماشة
اظن كده حتة القماشة بتاعة كل واحد
اتحرقت مش اسودت
=صح
+وخلى بالك ان حبيبك النبى
شبه القلب كأنه حتة حديده
والذنوب كأنه الصدأ اللى على الحديده
والاستغفار هو المنظف لهذا الصدأ
طب ما تجى نلمع قلوبنا بقى
= والله انا نفسى بس التلميع
هيجهدنى اوى وهيتعبنى
+اهم حاجه انت ازاى بتستغفر ربنا
هل بتستغفر من فمك ولا من قلبك
=طب ازاى استغفر من قلبى
+بأنك وانت بتستغفر تكون واثق من ان ربنا هيغفرلك
=ونعم بالله
=طب ازاى استغفر ربنا ؟؟
+فى اذكار كتييير جدا
يعنى مثلا
(استغفر الله )
(استغفر الله العظيم واتوب اليه)
(استغفرك اللهم واتوب اليك )
وفى اذكار كتييير
ولكن لو تلاحظ ان النصف الاول
لو مشيت على حلقة النهارده
اتحقق وهو ان ربنا يغفرلك
ولكن ازاى تتوب لربنا بجد وازاى
تعرف ان ربنا تاب عليك
=اه ..ازاى ؟؟
+ده للى هتعرفو فى الحلقة الجاية
ولكن واجبك من النهاردة تكثر من الاستغفار
علشان نتظف قلبك من اى قذارة
واكيد القذارة على قلوبنا كتيير
+وفى الحلقة التالتة هنتوب بجد لربنا
=طب ما تقول اى حاجه
+انا قلت بكرة ان شاء الرحمن
+يلا..السلام عليكم
=برده بتعلقنى..
=وعليكم السلام

[rola_05]

السلام عليكم ورحمة الله وبركاته

كيف تتحول أحزانك إلى عبادة

ما الذي تحتسبه في صبرك؟
لماذا أنت حزين هكذا ؟

وما هذه الهموم التي تخفيها بين أضلعك ؟

لقد أتعبك الأرق والسهر، وذوى عودك وذهبت نضرتك

لماذا كل هذه المعاناة ؟
فهذا أمر قد جرى وقدر، ولا تملك دفعه إلا أن يدفعه الله عنك

ولا يكلف الله نفساً إلا وسعها فلا تكلف نفسك من الأحزان مالا تطيق

استغل مصيبتك لصالحك لتكسب أكثر مما تخسر كي تتحول أحزانك

إلى عبادة الصبر العظيمة

عــفـــواً
إنها عبادات كثيرة وليست واحدة

كالتوكل ... والرضى.. .. والشكر.

فسيبدل الله بعدها أحزانك سروراً في الدنيا

قبل الآخرة لأن من ملأ الرضا قلبه
فلن يجزع من مصيبته
ألا تري أن أهل الإيمان أكثرالناس بشاشه مع أنهم أكثر الناس إبتلاء

الدنيا لا تصفو لأحد وكلما انتهت مصيبة أتت أختها

أيها الصابر .. أيتها الصابره

ربما وجدت نفسك فجأة في بحر الأحزان تغالب أمواج الهموم القاتلة
وهي تعصف بزورقك الصغير... بينما تجدف بحذر يمنة ويسرة...
ولكن الأمواج كانت أعلى منك بكثير ولم يبق إلا أن تطيح بك...وفــي
تلك اللحظات السريعة أيقنت بأن لا مفر لك من الله إلا إليه فذرفت عيناك...

وخضع قلبك معها...

واتجه كيانك كله إلى الله يدعوه يــآرب ...
يا فارج الهم فرج لي...
فـهنـآ قــد سكن بحر الأحزان...

وهدأت الأمواج العالية...

وسار قاربك فوقه بهدوء واطمئنان...
إن شيئاً من الواقع لم يتغير سوى ما بداخلك...

قال الله تعالى:

{ إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ }
(الرعد: 11)

لقد تحول جزعك إلى تسليم، وسخطك إلى رضى ...

فاجعل هذه الهموم والأحزان أفراحا لك في الآخرة
فهي والله أيامك في الدنيا ولياليك فاصبر واحتسب:

1- أجــر الـصـابرين ،،،

فالصابر يكب عليه الأجر بلا عد ولا حد،،،

قال الله تعالى:

إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ
(الزمر : 10 )

2- أن تفوز بمعية القوي العزيز،

قال الله تعالى:
اصْبِرُوا إِنَّ اللَّهَ مَع الصَّابِرِينَ

( الأنفال: 46 )

3- أن يحبك الله وما أنبلها من غاية،

قال الله تعالى:
وَاللَّهُ يُحِبُّ الصَّابِرِينَ
(آل عمران:146)

4- أن تكون لك عقبى الدار

قال الله تعالى:
وَالَّذِينَ صَبَرُوا ابْتِغَاءَ وَجْهِ رَبِّهِمْ وَأَقَامُوا الصَّلاةَ وَأَنْفَقُوا
مِمَّا رَزَقْنَاهُمْ سِرّاً وَعَلانِيَةً وَيَدْرءُونَ بِالْحَسَنَةِ السَّيِّئَةَ
أُولَئِكَ لَهُمْ عُقْبَى الدَّارِ (22) جَنَّاتُ عَدْنٍ يَدْخُلُونَهَا وَمَنْ صَلَحَ
مِنْ آبَائِهِمْ وَأَزْوَاجِهِمْ وَذُرِّيَّاتِهِمْ وَالْمَلائِكَةُ يَدْخُلُونَ
عَلَيْهِمْ مِنْ كُلِّ بَابٍ (23)سَلامٌ عَلَيْكُمْ بِمَا صَبَرْتُمْ فَنِعْمَ عُقْبَى الدَّارِ
( الرعد:22-24 )

5- احتسب في صبرك على مصيبتك أن ينصرك الله

ويجبر كسرك وأن تكون العاقبة لك

قال الله تعالى:

فَاصْبِرْ إِنَّ الْعَاقِبَةَ لِلْمُتَّقِينَ
(هود:49)

6- أن تكون من المفلحين الناجين،

قال الله تعالى:
يَا أَيُّهَا الَّذِينَ آمَنُوا اصْبِرُوا وَصَابِرُوا وَرَابِطُوا وَاتَّقُوا اللَّهَ لَعَلَّكُمْ تُفْلِحُونَ
(آل عمران:200)

7- المغفرة والأجر الكبير،

قال الله تعالى:
إِلَّا الَّذِينَ صَبَرُوا وَعَمِلُوا الصَّالِحَاتِ أُولَئِكَ لَهُمْ مَغْفِرَةٌ وَأَجْرٌ كَبِيرٌ
(هود : 11)

8- أن تنال صلوات من ربك ورحمة وهداية لما يحبه ويرضاه...

قال الله تعالى:
وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ
وَالْأَنْفُسِ وَالثَّمَرَاتِ وَبَشِّرِ الصَّابِرِينَ (155)
الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ (156)
أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ
( البقرة:155-157 )

9- انظر إلى الأشجار في فصل الخريف كيف

تتساقط أوراقها ما أروع هذا المنظر!..

إن احتسابك للمعصية سيجعل ذنوبك

تتساقط كما تحط الشجرة ورقها

قال رسول الله صلى الله عليه وسلم:

"ما من مسلم يصيبه أذى من مرض

فما سواه إلا حط الله [ به] سيئاته كما تحط الشجرة ورقهـآ"

كلمة أخيرة...

الــصــبــر --- يا آخـــوانــي --- وآخـــواتي ---
ليس فقط على أقدار الله المؤلمة…

إنما هناك أيضا الصبر على طاعة الله وتنفيذ أوامره

كذلك الصبر عن فعل المعاصي … فلا تنسى أن تحتسب تلك

الأجور في جميع أنوع الصبر....

(( في امان الله وحفظه ))

منقول مع الاختصار

مشاركه رائعه من ماما بنت النيل... جزاك الله خيرا

[rola_05]

نحو الخشوع 2



رسالة أوجّهها إلى نفسي وإلى الأكثرية الغالبة من المصلين في وقت قلّ من يقيم للصلاة ركوعها وسجودها وخشوعها ولقول الرسول – صلى الله عليه وسلم – " أول شيء يرفع من هذه الأمة الخشوع حتى لا ترى فيها خاشعا " حديث صحيح




قال الإمام أحمد بن حنبل " إنما قدرهم من الإسلام على قدر حظهم من الصلاة ورغبتهم في الإسلام على قدر رغبتهم في الصلاة فاعرف نفسك واحذر أن تلقى الله ولا قدر للإسلام عندك فإن قدر الإسلام في قلبك كقدر الصلاة في قلبك "




ورجائي في الله كبير أن يغيّر حالكم ويورثكم الخشوع لتحسّ بقول النبي – صلى الله عليه وسلم – " وجعلت قرة عيني في الصلاة "


أخي ... الخشوع تذلل القلوب لعلام الغيوب والقلب أمير البدن فإذا خشع القلب خشع السمع والبصر والوجه وسائر الأعضاء وما نشأ عنها حتى الكلام



الخشوع يقظة حتى لا يلتفت القلب وهو من أنفع العلوم وأجلّها لذا كان النبي – صلى الله عليه وسلم - يستعيذ من قلب لا يخشع لأن القلب الذي لا يخشع علمه لا ينفع ودعاؤه لا يسمع


ولكن ... أطمع في أكثر من الخشوع بكثير فلي هدف أبعد من الصلاة وهو الإقبال على الله في سائر الشئون فلا تقطع أمرا دونه وتكمّل حقوق العبودية على الوجه الذي يرضي الرب سبحانه وتعالى


تغرس بذور التربية الذاتية في قلبك فتخشع ولو كنت الخاشع الوحيد في مسجدك فتتربى على أن تستقيم ولو انحرف الكون كله ويضيء قلبك ولو عمّ الظلام قلوب من حولك

تربي نفسك على المسئولية الفردية والمحاسبة الفردية والتهيؤ للوقوف بين يدي الله سبحانه وتعالى يوم القيامة كما وقفت بين يديه في الصلاة في الدنيا

تشارك في إحياء الأمة ونصرتها عن طريق صلاة الخاشعين وتضرعهم وما أحوجنا لدعوة صادقة من قلب منيب

فليست الصلاة حركات تستغرق ساعة من اليوم وينقضي الأمر وتنسى معاني الصلاة لكنها حركة تصحيح وثورة تغيير تستهدف تعديل مسار الحياة لتعيد صياغتها على عين الله ... والله أسأل التوفيق والسداد وادراك غايتنا القريبة والبعيدة من هذه الرسالة

[OM-ZYAD]

عندما تزل قدمك وتقول : غدًا أتوب ، وتزل ، وتتوب بهذه البساطة ‍‍‍‍‌‍‍‍‍‍‍‍!!! لا ، الله عز وجل عزيز ، أول توبة سهلة جداً ، لمجرد أن تقول : يا رب ، تبت إليك ، يقول لك : عبدي ، وأنا قد قبلت ، ويزيح عنك همومًا كالجبال ، أما كلما تبت إليه نقضت التوبة ‍‍‍!! فالله عز وجل عزيز ، فقد تجد الطريق مغلقاً ، والباب مسدوداً ، والإقبال عسيرًا ، " فاعلموا أن الله عزيز حكيم " ، يعني إن زللتم قبل أن تأتيكم البينات فالقضية سهلة جداً ، وأما إن زللتم بعد أن جاءتكم البينات ، فتوبة الذي يعلم أصعب من الذي لا يعلم ، قال العلماء: لو أن الإنسان دخل في الدين في رمضان ، ولم يعلم أن مقاربة الزوجة تنقض الصيام ، فلا شيء عليه ، ما دام هناك جهل فالقضية سهلة جداً ، ولكن ترتكب المعصية بعد العلم ، عندئذٍ صار الطريق إلى الله صعبًا فالتوبة مع الجهل سهلة جداً ، أما العائد إلى ذنبه كالمستهزئ بربه باستمرار ، عندئذٍ فالله عزيز ، وقد لا تجد إليه الطريق سالكاً ، قد تجد عقبات وعقبات ، هذا معنى كلمة : " فإن زللتم من بعد ما جاءتكم البينات فاعلموا أن الله عزيز حكيم " ، وإذا تعامل الإنسان مع الله ينبغي له أن يعامله بإخلاص ، وبصدق ، وافتقار ، ووفاء ، قال تعالى : " وما وجدنا لأكثرهم من عهد وإن وجدنا أكثرهم لفاسقين " .

( سورة الأعراف : 102) .

أنت حينما تعاهد الله عز وجل فالشيء الرائع أن تكون عند حدود هذا العهد ، أما حينما تعاهد وتنقض ، وتعاهد وتنقض ، " فاعلموا أن الله عزيز حكيم " ، ربما لا يسمح لك أن تقبل عليه ، وقد يصرفك عن أهل الحق .
مثلاً : إنسان يحضر ، و يغيب ، ويحضر ، ويغيب ، ويؤثر أتفه سبب على درس العلم ، إذا زاره إنسان ترك الدرس ، وإذا كان جالسًا مع زوجته ترك الدرس ، يأتيه وقت ما لا يحضر الدرس ، ويكون الله قد طرده ، " فاعلموا أن الله عزيز حكيم "، أتاك ضيف فاحضر وإياه ، ما معنى قوله تعالى :" تتجافى جنوبهم عن المضاجع " .

( سورة السجدة : 16 ) .

لا يركن للدنيا ، وقاف عند كلام الله ، مطبق للسنة ، يلتزم دروس العلم ، ويضبط شهوته ، ويعرف أنه بعد المعرفة لو زلَّت قدمه لكانت المشكلة كبيرة ، فعد للمليون قبل أن تقترف معصية وأنت تعلم ، إن كنت لا تعلم فالقضية سهلة جداً ، أما حينما تعلم فقد وقعت في مشكلة كبيرة ، ومع ذلك لو زلت القدم - مع العلم أنْ ليس لنا غير الله عز وجل - فإني أقترح على الإنسان إذا كان يعلم وزلَّت قدمه أنه يحتاج إلى عمل صالح ليمحو السيئة ، لقول الله عز وجل : " إن الحسنات يذهبن السيئات " .

( سورة هود : 114) .

إذًا إذا تاب الإنسان ، ثم عاد إلى ذنبه فإنّ التوبة الثانية أصبحت صعبة ، فيحتاج أن يدعمها بعمل صالح ، بإنفاق المال ، وبصيام طويل ، حتى تُرَمَّم نفسه ، والإنسان حكيم نفسه ، أجمل حالة يعيشها المؤمن أن يكون مع الله ، وأن تكون العلاقة بالله عامرة

[OM-ZYAD]

الف مبروك على الحمله الجديدة
هذا من كتابات د / راتب النابلسى

[أم جورى]

أم زياد جزاكى الله خيرا

رولا انا عاوزة اعرف منك انتى زعلانة مننا فى حاجة مش بتيجى عندنا ليه

[rola_05]

جوجو... اقسم بالله ما زعلانه
بالعكس والله انتو امامير وحلوين
بس والله مودي زي الزفت وعندي كبشه مشاكل
ادعيلي بالفرج

[أم جورى]

أنا بس بنكشك يا رولا بشوف مش بتدخلى ليه ربنا يفك كربك والمسلمين أجمعين وييسرلك امرك يارب عليكى بالاستغفار

[ghofran2009]

حمله هنتغير بجد
يقدمه لكم : محمد عيد



الحلقه السادسه
بعنوان
اياك نعبد

+ السلام عليكم ورحمه الله وبركاته

= وعليكم السلام ورحمه الله وبركاته

+ ايه اخبارك ؟؟

=الحمد لله كاه تمام

ايه محضر لنا ايه النهارده ؟

+ طالما انت دخلت فى الموضوع على طول

انا كمان هدخل على طول

= ماشى ..ياريت

+ حافظ سوره الفاتحه ؟

= امشى روح ياريتك ما جيت

+ *********ه

بجد مش بهزر

شكلك كده حافظها

=تصدق اه

+ انا مصدق بدون ما تقسم بالله ...

= هو انا قسمت بالله ؟!

+ لاء بس انا بقولك احسن تحلف بالله تانى

= هو انا حلفت اولاعلشان احلف تانى

ابدأ يا عم الحاج

+ ماشى

اقرأ كده سوره الفاتحه

من اولها

= ماشى

اعوذ بالله من الشيطان الرجيم

بسم الله الرحمن الرحيم

الحمد لله ب العالمين

الرحمن الرحيم

مالك يوم الدين

إياك نعبد وإياك نستعين ...

+ صدق الله العظيم

يا ترى المفروض نقول السوره دى

كام مره فى اليوم؟

= اممممممم

مرتين فجر وتمانيه ظهر وعصر

تلاته مغرب

واربعه عشاء

يعنى 17 مره

+ يعنى بنقول اياك نعبد وإياك نستعين

17 مره

احنا مش هنتكلم دلوقتى عن ازاى نعبد ربنا وحده

مع اننا كنا لمحنا قبل كده

ولكن هنتكلم ازاى نستعين بربنا بجد

= ياااااااااااااااه

ديما بقول انا استعنت بربنا بس

بصراحه وبكل عفويه

من جوا لسه مش اوى

يعنى بخلى اللسان يشتغل

ولكن القلب مش عارف كده ماله

+بص يا باشا شئ جميل جدا اننا نعرف اننا غلطانين

والاجمل اننا نصلح الغلط

واحنا حملتنا اسمها هنتغير بجد

وعاوزين نتغير بجد

ولكن الاول كده نعرف احنا هنستعين بربنا فى ايه بالظبط ؟!

=طبعا فى كل حاجه

+ماشى ايه هى الكل حاجه دى

= النجاح والفشل السعاده والقلق والحزن والشده

و..و..و..

+ جميل اوى وده اللى ربنا امرنا بيه

لما حبيبنا قال

( واستعينوا بالصبر والصلاه )

وربنا ما حددش حدود الاستعانه بيه

وخلاها مفتوحه

استعين بيه فى كل حاجه

وفى اى حاجه

استعين بيه

وربنا زى ما احنا عارفين جاب لنا من الاخر

لان انا ممكن اقعد اتكلم واقولك اعمل وخلى وسوى

وتتخنق منى ومن كلامى

ربنا لخص لك الكلام كله

فى كلمتين

الصبر والصلاه

وعلى فكره الصبر 3 انواع

صبر على الطاعه

وصبر عن المعصيه

وصبر عن البلاء والابتلاء

وبكده الصبر يبقى مهم

لانك مثلا جبت تقدير كويس فى الدراسه

يبقى لازم تستخدم النوع الاول

وهو الصبر على الطاعه

وهى طلب العلم يعنى المذاكره

ولما يحصل لك محنه معينه صاحبك يموت

او تحصل اى مشكله هتستخدم النوع التالت

الصبر على البلاء او الابتلاء

ومثلا احنا معظمنا شباب وبنقابل مشاكل كتيير فى حياتنا

مثلا منظر مش كويس

هنستخدم النوع التانى

الصبر عن المعصيه

وطبعا صبر ده هيكون علشان مين ؟؟؟

=طبعا علشان حبيبى يرضى عنى

+طيب اثبت ...

= ازاى ؟؟

+ بالصلاه ...

= مش فاهم

+ غيرك كتيييييييييييير اوى بيصبروا

ولكن هل ينالوا الاجر

هل ممكن يثبتوا ولا ممكن بل واحتمال كبير ينهاروا

يشوف كذا منظر مش كويس

يغض بصره مره واتنين والتالته يقع

= طيب والحل ايه؟

+ الحل قلناه ..

(اياك نعبد واياك نستعين )

و

( استعينوا بالصبر والصلاه )

ده الحل

انك ديما تستعين بيه

فى كل حاجه واى حاجه بتعملها

وديما يكون فى نيتك الاستعانه بالله فى كل شئ

لاننا قولنا خلاص الحل بقى متمثل فى كلمتين

الصبر والصلاه

= كده انا فهمت انت كنت بتسأل انا حافظ السوره ليه

+الحمد لله انك فهمت

انا خصيت ايه واحده بس من السوره نتكلم عنها

وان شاء الله اكيد هنرجعلها تانى

علشان نخص الكلام كمان فى اياك نعبد ونتكلم فيها بتوسع اكتر

بس موضوع الاستعانه بالله كان مهم وكان لازم ناخد فيه حلقه خاصه بيه لوحده علشان نتكلم فيه

= طب يلا نكمل كلامنا ونقول اياك نعبد كمان

+ اللى انت مش واخد بالك منه

ان حلقتنا خلصت وانا هقولك

السلام عليكم

= بقى ده كلام انت مش هتبطل حكايه انك تعلقنى كده دى

+ لا طبعا مش هبطلها

يلا السلام عليكم ورحمه الله وبركاته

=ماشى يا عم خليها عليا

وعليكم السلام ورحمه الله وبركاته

+سبحانك اللهم وبحمدك نشهد ان لا اله الا انت نستغفرك ونتوب اليك

= سبحانك اللهم وبحمدك نشهد ان لا اله الا انت نستغفرك ونتوب اليك

انتظرونا وحلقه جديده من هنتغير بجد
يوم السبت القادم ان شاء الله

[ghofran2009]

برنامج خليكـى اجمــل " للبنات وبس "

يقدمه لكم

همسات قلب & ASMAA

الحلقه السادسه

بعنوان
الموضه

_السلام عليكم ورحمه الله وبركاته

_وعليكم السلام ورحمه الله وبركاته

_ازيك يا جميل ... إيه الاخبار؟!!

_الحمد لله بخير... وانتى ؟!!

_الحمد لله تمام ...

_ ...ها إيه رأيك بقى كده ؟!!

_ما شاء الله عليكى ... لبسك بقى فى منتهى الجمال ..
. وكمان شكله حلو اوى عليكى ...

_طيب كويس ... الحمد لله طمنتينى ...
أصلى كنت خايفه يكون وحش عليه ...

_طول ماأنتى مع ربنا وعايزه تتغيرى متخفيش أبدا ...
لأنك عمرك ماهتكونى وحشه ...

_ولسه كمان لما أتابع موضه اللبس الاسلامى هـــ .......

_ممكن ثوانى ...؟!!!

_نعم ... أنا قلت حاجه غلط ولا إيه ..؟!!!

_قولتى الموضه... وكلامنا النهارده كله عليها ...

_... طيب ما أنا قولت موضه اللبس الاسلامى ...
يعنى مش أى موضه كده وخلاص ....!!!

_عارفه يا حبيبتى ... انا مقولتش حاجه ....

بس أنا سمعت حديث مسند فى ما معناه إن لبس المرأه لازم يكون فضفاض وميكونش خفيف و......و

_طيب ماأنا لبسى واسع أهو ومش خفيف واحنا ظبطناه خلاص ....!!!

_أنا لسه مكملتش الحديث ... هتزعلينى منك ليه ..؟!!

_لالالالا ... خلاص كملى ...

_ .... باقى معنى الحديث إنه ميكنش متبع موضه لقومما ...

_يعنى انتى تقصدى ان اللبس علشان
يكون زى اسلامى لازم ميكونش على الموضه ...؟!!!

_ تمام ... الحديث فيما معناه بيقول كده ....

_ازاى بقى ألبس على كده ...
ماهو كل موديل بينزل بيكون موضه وقتها ...
يعنى انتى عايزانى لما ينزل موديل معين استنى لما يكون مش موضه وألبسه ؟!!!

_لالالا ... انا مقولتش كده ... الحل سهل أوى ....

_طيب قوليلى ازاى لأنى قلقت ...!!!

_أقولك ازاى ومن غير قلق خالص ...

احنا كل اللى هنعمله
هنستغل الموضه صح وبس مش أكتر ....

_ طيب وأنا معاكى ... فهمينى بقى ازاى
أستغلها...؟!!!

_اسمعى كده رسولنا الكريم صلى الله عليه وآله وسلم بيقول إيه
( إنما الأعمال بالنيات وإنما لكل امرء مانوى ....) ...

_عليه الصلاه والسلام ...
منا عارفه الحديث ده بس هو ماله ومال موضوعنا ؟!!!

_ازاى ... ده هو اساس موضوعنا ...

_طيب ممكن تفهمينى بالراحه ....!!!

_حااااضر ... بصى مثلا أنا أهو ... هنزل اشترى لبس
وعايزاه لبس إسلامى ... ولقيت أكتر من موديل والمفروض أختار منهم ...
لكن كلهم موضه نزله السنه دى...أعمل إيه ؟!!!

_ ......؟!!!

_أقولك يا ستى ...

هختار الموديل إللى عجبنى
وإللى يناسب شروط لبسى إللى اتفقنا عليها قبل كده ...

_ماشى .... وبعدين ...!!!

_ .....مانا جايلك فى الكلام أهو ...

هختار إللى أناعايزه واللى عجبنى واقتنعت بيه
بس وانا بشتريه بقى وبختاره من اول هغير نيتى ...

_ يعنى ايه ؟!!!

_ يعنى هشتريه وهختاره بنية انه لبس إسلامى مناسب ليه
وانى جايباه وهلبسه طاعة لربنا ولأوامره ...
وبكده تكون المشكله اتحلت ...

_ يااااااااه ... بس كده دى سهله خالص ...

كل ما عليه انى اغير نيتى ....

_ أيووووون .. تمام ...
وطبعا لازم تكون النية موجوده فى كل حاجه بتعمليها ...
يعنى اى حاجه تعمليها لازم تكونى حاطه فى نيتك انك عملاها لله
وطاعه ليه عشان ربنايوفقك ديما لأحسن ما فيها ....

_ خلاص ... النية هتكون موجوده فى كل حاجه بإذن الله ...

_ بإذن الله ...

كده بقى احنا حلينا كل حاجه عن اللبس
وبقينا نتبع اللبس اللى امرنا بيه حبيبنا النبى
علية الصلاة والسلام ...

_ آه ... تمام كده الحمد لله ....

_ الحمد لله ...

نقول بقى السلام عليكم ورحمه الله وبركاته
وأشوفك قريب بإذن الرحمن ...

_ خلاص ماشى ...
وعليكم السلام ورحمه الله وبركاته
بس مش تتاخرى عليه علشان هحتاجك كتير معايه ...

_ متقلقيش خالص ...
على طول هكون معاكى بإذن الله ...

يلا فى رعايه الله وأمنه ...

_ ماشى يا قمر فى حفظ الله .

_ سبحانك اللهم وبحمدك ..
نشهد ان لا اله الا انت ...
نستغفرك ونتوب اليك
_سبحانك اللهم وبحمدك ..
نشهد ان لا اله الا انت ..
نستغفرك ونتوب اليك



انتظرونا الاحد القادم وحلقه جديده من
خليكى اجمل