" عروسات المستقبل تعالوا اقولكم".. جزء ( 4 )

[سماح عزت]

ازيك يانودى ياسكره الحمد لله كدا نطمن هيكون لينا اخوات فى السعودية وزى ما ربنا جمعنا على ارض واحدة وسماء واحدة فى مصر يجمعنا على خير فى السعودية ويجمعنا فى الجنة ان شاء الله ولو متقابلناش فى مصر نتقابل فى السعودية ان شاء الله لانى والله بجد بجد نفسى اشوفك عشان اكمل صورتك الى جوايا وانا متاكدة انى هى اجمل بكتير من الى بتخيله ..ويارب يارب يارب يكملك ورقك على خير عشان تروحى عند جوزو باه وتفرحى وتتهنى ان شاء الله..وتكونى اجمل زوجة فى عيون جوزو ويرزقك بالذرية الصالحة شهادة حب وتقدير.. وبوووسة كمان

[ملوكة 12]

أزيك يا هنووودة وحشتينى ....عايزة اسئلك فى حاجة هو زيت اللوز لو
جه عليه مياه ممكن يسود الجسم زى زيت الزيتون ولا لأ
انا عارفة انى بطمع فى كرم اخلاقك كتيررررر

[مرمرالمصريه]

السلام عليكم ورحمه الله وبركاته
ازيك يا هنودة انا مروة اول مرة اكتب بس بصراحه استفدت كتير منك بارك الله فيكى
وفرحى قريب ان شاء الله وجربت الليكوسيد وحلو اوى انا يمكن مش بدخل نت كتير من فترة بجد انا حبيتك جدااااااااااااااا وربنا يكرمك مع جوزك يا رب وادعيلى ربنا يتمملى على خير ويتمم لكل بنت على الف خير وبجد رتبتيلى افكارى وخصوصا ان وقتى مزنوق بجد شكرا اوى

[رفوووووع]

جزاكِ الله خير ..على الموضوع الرائع والمفيد جدا ..

[* ام شهد]

ازيك يا ام شهد ؟؟؟ حبيبتى انا جربت ليكوسيد r وجاب معايا نتيجة حلوة بس فيه بنات طلع مش مناسب معاهم عملهم حساسية بس ده اللى جربته ونفع وحتلاقى فى موضوع انا كاتبه عنه
الاكواع مفيش احلى من الليمون لانها مش حتبقى غامقة زى الركب كل يوم امسحى بليمونة عليها وسبيها تنشف بعد كدا اغسليها وحطى جليوسليد حتلاقى لونها بيفتح

كريم بوهلى بصراحة انا معرفهوش معرفش اذا كان حلو ولا وحش بس المهم انك تتجنبى اى احتكاك لرجلك ولكوعك عشان ميرجعش السواد كمان الترطيب مهم كل يوم عشان لما تجف بيحصل جفاف وبعده يتقلب سواد

الف شكر حبيبتي علي ردك لي وحاجرب لوكسيد ار باذن الله وفعلا انا قريت موضوعك عنه ...بس المشكله بالنسبه للاكواع انا بستخدم الليمون بصفه يوميه بس للاسف مافي اي جديد السواد هو هو ومارديتي علي بالنسبه للمنطقه الحساسه شنو بتنصحيني استخدم ..خاصه منطقة المهبل ( اسفه علي جراءتي بس لازم اكون دقيقه علشان انا وانتي عارفين انها منطقه حساسه جدا )

[هنودة هنانيدو]

السلام عليكم .. ازيكم يا قمرات وحشتونى معلش الايام فاتت مكنتش عارفة ادخل كتير على النت كان عندى ضيوف .. قولت النهاردة ارجع معاكم تانى بموضوع يارب يكون مفيد لنا قبل ماتش مصر وامريكا يااااااااااااااارب نهاردة نكسب ونجيب كام جول ونقابل اسبانيا بس ربنا يستر بحس ان حيجيلى القلب من كتر التوتر طول الماتش ربنا يكرمنا نهاردة ويكرم الحضرى وابو تريكة وكلهم

يالالا نبتدى نهاردة وان شاء الله نرد بعدها على كل الاسئلة اللى فاتت معلش انا لسه شايفها

حنتكلم على اهم حاجة بتحصل لينا بعد الجواز وهى """ زيادة الوزن """
طبعا اللى بيحصل ساعتها ان قبل الجواز اى بنت بتخس بشكل طبيعى بسبب كتر المشواير وانها بتجهز بيتها وانها نازلة بتشترى حاجات وطلبات وتشوف فستان فرحها والقلق والتور كل ده بيخلى اى بنت قبل فرحها لازم تخس مش اقل من 5 كيلو
وفيه نوع بنات بيكون وزنها زائدج تيجى قبل الفرح بشهرين وتعمل دايت وتنزل 10 كيلو واكتر .....

تيجى بعد الجواز ايه اللى بيحصل ؟؟؟؟
طبعا اول الجواز واقصد شهر العسل وقت الاجازة والفسح والسفر حنلاقى ان العروسة حترجع لوزنها الطبيعى اللى فقدته قبل الفرح بسبب المجهود يعنى اللى كانت وزنها 35 وخست وبقيت 60 بسبب المجهود حتلاقى نفسها فى الشهر ده رجعت 5 كيلو تانى ليه ؟؟؟

لان طبعا بقى قيه راحة وبقى النوم اكتر والاكل كتير وبتخرجى وتتفسحى وبالتالى بتاكلوا فى مطاعم برا وطبعا الاكل المطاعم الفاست فود مش محتاج توصية كمية الدهون اللى فيه من مايونيز
وكاتشب والزيوت وغيره ومواد الحافظة كل ده طبعا فيه كميات الدهون كبير ...

طبيعى ان الاجازة والراحة والاكل لازم يخليكى ترجعى للوزن اللى فقدتيه قبل الجواز حتى تلاقى الناس واهلك واصحابك يقولوا انتى شكلك بقى حلو انتى وشك رجع احلى انتى جيتى على الجواز وفعلا بيبقى وقتها مفيش مشكلة فى الوزن بالعكس بتكون البنت رجعت تانى لوزنها الطبيعى

طيب امتى تبتدى المشكلة ؟؟؟
تبتدى المشكلة فيما بعد انتهاء شهر العسل اول ما جوزك يرجع شغله اللى بيحصل كالتالى :::::

اولا انك بتكونى عايزة تعملى اكل واصناف كتير وتكون جامدة عشان تفرحى زوجك وتقولى انك بتعرفى تعملى اكل وتخليه مبسوط ( ده حاجة حلوة بس لو زادت بتقلب العكس ) طبعا الفطار تلاقيه مليان حاجات كتير والغداء طبعا بالسمن والدهون ونشويات وفراخ بانية وكفتة وممكن تلاقى اكتر من نوع فى الوقت الواحد وتقولى اصل الاكل موجود عندى كتير عايزة اخلصه ...؟؟؟؟

وبعد الغداء قبل ما يغسل جوزك ايده تنزلى بالعصاير وطبق الفاكهة ونشغل تى فى وننطلق شوية ننزل بطبق حيلى وام على وعندنا جاتوة فى الثلاجة طيب نعمل نسكافيه معه وبعد كل ده العشاء يا
حبيبى طبعا الصيبة هى العشاء ليه ؟؟؟

اصل العشاء الاقى بنات كتير يبقى جزء من العداء يعنى بيتزا وفراخ بانية وكبدة ومكرون ة بشاميل وتقولك البنت اصل ده كان باقى الغداء قولت استغله ونتعشى بيه وكمان جوزى بيحب ياكل ؟؟ طبعا جوزو ياكل على عينا بس مش على حساي صحتنا وطبعا بعد المكرونة عايزين نشرب عصير او ناكل ايس كريم عشان نهدى معدتنا ونغسل ايدنيا وجرى نروح ننام يعنى الاكل كمان ملحقش يتهضم

يفضل الموال ده شهر واثنين وثلاتة بالاضافة انه مفيش حركة الزوج مجهود فى الشغل والزوجة قاعدة فى البيت او بتروح شغلها يعنى مفيش حركة تحرق الدهون والنتيجة ؟؟ تلاقى الزوجة تقولك ايه ده انا اتصدمت وزنت نفسى لقيت نفسى زدت 10 كيلو انا معرفش حصلى ده امتى انا ازاى تخنت كدا ؟؟؟

طبعا هى مازادتش فجاة ده زيادة تدريجية وفى الاخر تكتشف البنت انها زادت مكنتش بتلاحظ ده الاول عشان الاكل والدهون بيترسب ويتجمع شوية فى البطن والارداف وشوية فى الرجل واللايد فى الاخر تلاقى وتلاحظ انه تخنت اوى وتقول السبب ؟؟؟


تغير هرمونات بعد الجواز

الهرمونات والله برئية باللى بنعمله فى نفسنا ؟؟؟ طبعا ايوة الهرموانت بتتغير بس مش هى السبب انك تزيدى 10 كيلو هى مجرد تغير بسيط بس مش السبب الرئيسى ...

الاسباب هما 2
1- الاكل بنظام غلط
2 - قلة الحركة

بالاضافة تغير هرمونات ده اللى يعمل زيادة الوزن بعد الجواز ,.....

طيب ايه الحل ؟؟؟؟؟؟
الحل يا بنات فى ايدينا وبسيط بس محتاج تغيير افكارنا فى الاكل ومحتاج تغيير الكسل لو انتى اخدتى نية انى لازم احافظ على صحتى ورشاقتى عشان احاتفظ على صحة جوزى واولادى فى المستقبل ربنا اكيد حيسهل الامور عليكى

الموضوع مش صحتك انتى وخلاص لا ده متعلق بنظام غذاتى لبيتك كله لزوجك ولاولادك ومتقوليش جوزى بيحب الاكل ما هو طبيعى ان اى رجل مصرى ولا سعودى ولا ايطالى كل الرجال بتحب الاكل واحتنا مش عايزين ننمنع الاكل لان ده استحالة ولا عايزين نعمل ريجيم .. لان بردو محدش حيحعيش على الرجيم بس محتاجين نظام غذائى نمشى عليه مجرد تعديل افكار غذائية غلط فى حياتنا ومفروض نعملها كلنا من دلوقتى عشان يبقى سيستم حياتنا .....

حنكمل ان شاء الله مع بعض بس معلش مبارة مصر وايطاليا بتتعاد حاروح اشوفها بسرعة وارجعلكم مع انى 5 مرة اشوفها

[solitair_sam]

هههههههههههه

مصر وايطاليا يانوودى

عامله زى بابا و اخواتى .. قاعدين متسمرييييييييييييييييييييين

ساعة الغدا كانت مباراة مصر وايطاليا بتتعاد على قناة .. وعلى قناه تانيه مصر و البرازيل ههههه
وطبعا الكل قاعد باصص للتى فى وبؤه مفتوووح..وقاعد مزبهل كاننا اول مره نشوفها








بس فعلا عندك حق ف موضوع النهارده دا .. و هو دا اللى بيحصل فعلاااااا


بس انتى ذكرتى معلومه كدا .. خير اللهم اجعله خير كدا ال ايه .. بتقوووولى

كل ده بيخلى اى بنت قبل فرحها لازم تخس مش اقل من 5 كيلو

ركزى اوى على حكاية مش اقل من 5ك دى



اماااااااااااااااااال انا مفيش حاجه من دى ليه ؟

هو انا مش زى اى حد ولا ايه يا ناس

مانا خرجت ورحت وجيت وطلبات وتجهيزات والله لغاية ما كنت هموووووووووت من كتر الخروج والتعب

ومع ذلك لا حياة لمن تنادى ..زى مايكون كدا جسمى معاند معايا .. اعمل ايييييييه يا ناااس

[lonleygirl]

انتى عندك حق يا هنوده انهارده يوم مهم جدا منتخبنا فى مرحله حاسمه ومهمه انا كمان على اعصابى ربنا يكرمنا ونكسب 3/0ومرسيى على المعلومات الحلوه دى ونشوفك بعد الماتش سلام

[هنودة هنانيدو]

تعالوا نكمل

نرجع نشوف ايه الحل؟؟

]

بصوا ياقمرات فيه نوعين اما تكون البنت وزنها طبيعى عادى وزادت بعد الجواز
اما بنت هى اصلا وزنها زائد وزادت اكتر بعد الجواز

اول نوع اللى ووزنها زاد كام كيلو بعد الجاوز وبقى فيه دهون فى الجسم ديه اكتر حنتكلم عليها

لان النوع التانى لازم يبقى يعمل رجيم بجانب النصائح الغذائية بس انا طبعا مش دكتورة عشان اقول يتعمل رجيم نوع معين

طيب نرجع تانى لكلامنا ... اولا عشان تحمى نفسك من انك تزيدى بعد الجواز نعمل ايه ؟؟؟

اول حاجة اعرفى ان وزنك الطبيعى اللى متعودة عليه كام يعنى لو انتى وزنك الطبيعى 65 او 70 خلاص يبقى مفروض عليكى انك متبقيش زايدة عن كدا

طيب ايه الخطوات ؟؟
1 - اولا وجبة العشاء لانها فعلا وجبة قاتلبة لما تققلب للعكس يعنى وجبة العشاء لازمممممممممم تكون قبل النوم اقل حاجة ساعتين ليه ؟؟
عشان الاكل لازم يتهضم لو نمتى وانتى لسه اكلة الجسم مش حيحرق لان معدلات الحرق اثناء النوم قليلة جدا تخيلى انك كل يوم تتعشى وتنامى وتفضلى كدا لمدة شهر يبقى ايه اللى حيحصل ؟؟
يبقى اول حاجة لازم ناكل قبل ما ننام بساعتين كمان عشان نحمى نفسنا من وجع المعدة والحرقان والحموضة دول كلها امراض بتيجى بسبب الاكل والنوم بعده وطبعا الاكل والنوم بعده من اسباب الكرش ويبقى فيها بطن

طيب تانى حاجة .:: وجبة العشاء لازم تبقى وجبة خفيفة ننسى بقى بيتزا وكفتة والحم والفراخ بانية ومكرونة مينفعش يا بنات يبقى الغداء والعشاء بنفس السعرات ونفس الدهون كدا يبقى اسمه غداء مرتين طبعا ده كتير وغلط لان اللى بيحصل ان المعدة خلاص بتوسع وتتعود على الاكل ده تيجى بعد كدا تاكلى جبنة مش حيعجبك لان اتعودتى وجوزك اتعود على سندوتشات الشاورامة وغيره خاصة
لو انتوا قعدتوا ادام تليفزيون مش بتحسى اكلتى ايه ...

طيب ما ناكل الطبيعى اللى هو جبنة وبيض وزبادى ولبن كلى اللى عايزة بس حاجات خفيفة ده الاكل الصح وده العشاء يعنى تعالوا شوفوا فى السيرة النبوية وشوفو سيدنا محمد بياكل ايه ونظام اكله ازاى فعلا والله حنلاقى ان سيدنا محمد عليه افضل والصلاة والسلام اقوى من اى خبير تغذية يعنى معنى كدا الاهتمام بصحتنا جزء من اسلامنا يبقى ربنا اكيد عارف ان الزيادة فيه غلط علينا

ده بخصوص العشاء

2 - نمنع عادات غذائية غلط فى يومنا ونلتزم بيها حتقولى اصله صعب حاقولك لا سهل جدا بس
محتاج تمرين وحتلاقيه حاجة بسيطة وده عن تجربتى وتجربة بنات كتير

اول حاجة زلام نتعود نشرب 8 كوب من الماء ختقولوا انا قولت ده كتير وبعديها تانى عشان 8 كوب ماء مهم جدا اولا انك بتحرقى جزء من الد هون اللى بتاكليها ازاى ؟؟؟
لو جسمك عنده نقص فى الماء عشان انتى مش بتشربى حتلاقيه ان اللاكل اللى بيدخلة فيه جزء من ماء الجسم بشكل طبيعى وسبحان الله يحتفظ بالماء اللى فى الاكل عشان يعوض النقص الماء اللى عندة كانه بيحميكى من الجفاف وطبعا كل ما تاملى كل ما يحتفظ بالماء فى جسمك وتتحول دهون
قاتلة وتتراكم وتعمل مشكلة..

عشان كدا لما تشربى ماء حتمنعى الجسم انه يخزن ماء ويبحولها دهون بالاضافة ان الماء بتسد الشهية يعنى قبل الاكل بنص ساعة اشربى وبعد الاكل بساعة يعنى قسمى 8 كوب من ماء على طول اليوم حتى لو شربتيها مرة واحدة مش مهم ...انا مكنتش بحب اشرب ماء نهائى وكنت بقعد بيومين مشربش بس لما قولت لازم اعود نفسى بقيت بشرب غصب عنى ماء لمدة اسبوع دلوقتى خلاص مقدرش اعدى اليوم قبل ما اشرب 8 كوبيات حطى جنبك فى الشغل او فى البيت زجاجة ماء
تانى عادة غلط اكل الفاكهة وشرب الشاى بعد الاكل اولا شرب الشاى بعد الاكل بيمنع ان الجسم يمتص اى حديد فى الاكل يعنى جسمك مش حيستفاد بالفوائد بتاعة الاكل يعنى حرام تاكلى سمك مليان فوسفور وحديد وتضيبعه بكوب شاى لازم بعد ساعتين

والفاكهة نفس النظام حتى دكاترة التغذية بيقولوا ان الفاكهة بعد الاكل اشبه بالسم القاتل لازم يكون بعد الاكل بساعتين

طبعا حتقولى ان العادات بتقول ناكل بعد الاكل وصعب نغيرها لا سهل الاول كنت باكل فاكهة بعد الاكل عالطول واقول استحالة مكلش فاكهة بعد كدا مرنت نفسى انى اكل فاكهة بعد الاكل بساعة وبعدها عودت نفسى بعد الاكل بساعتين ودلوقتى خلاص اتعودت والاهم انك انتى اللى تاثرى على اللى حواليكى يعنى اخوكى واهلم لما يلاقوكى بتعملى كدا يبتدوا يعملوا هما كمان كدا وده المهم انك تهتمى بصحة حواليكى

3 - الرياضة مهما قلت مهمة مش حيكفى طبعا كلنا بصوت عالى حنقول مفييش ووووووووووووقت
بس اللى اكتشفته اننا عندنا ووووووقت بس احنا اللى بنكسل ونقنع نفسنا نقول مفيش وقت زى ما قولنا البنات بعد الجواز اما جزء بيشاغل او جزء قاعد فى البيت اللى بشتغل تقول انا بروح الشغل برجع اعمل واجابتى فى البيت معنديش ثانية فاضية واللى قاعدة فى البيت تقولك انا طول اليوم بشتغل قى البيت معنديش وقت طيب الاثنين معندهومش وقت بيتكلموا فى تليفون مكالمة توصل لساعة ومعندكيش وفت وانتى ببتفرجى على مسلسل تركى حلقيتن استحالة كلنا عندنا وقت بس احنا بنكسل
مطلوب بسيط اوى حاجتين ::

اما تكون عندك فى البيت اى جهاز رياضى زى السير الكهربائى او العجلة او اوربت تراك العبى عليه لمدة ساعة 3 ايام فى الاسبوع او نص ساعة لمدة 4 ايام سواء بقى بتشغلى او قاعدة فى البيت نص ساعة مش حتفرق معاكى مش بقولك روحى جيم عشان عارفة انه صعب مع المسئولية والوقت بقولك العبى فى بيتك نص ساعة يعنى شغلى مسلسل بتاعك واتفرجى عليه وانتى على السير حلقة حتحلص وانتى حتفقدى دهون

طيب لو معندكيش اى جهاز يبقى سياداك حتلعبى تمارين فى البيت وتجرى فى البيت بردو ساعة لمدة 3 ايام او نص ساعة لمدة 4 ايام طيب الاول نجرى او نمشى ازاى فى البيت ؟؟ عادى جدا شغلى اى حاجة تحبى تسمعيها وامشى واجرى جوا البيت بتعمل فرق انا بعمل كدا يعنى بقالى مدة مش بروح
الجيم بقيت بجرى وبمشى جوا البيت

طيب والتمارين حتنزلى كليبات ايربوبكس على النت وتتفرجى عليها وتعملى وهى شاغله يعنى تشوفى مدربة بتعمل تمرين ايه وتوقفيها وتعملى تمرين وتشغليها تانى وهكذا ايه الفرق انك تتفرجى
على فيديو او انك تعملى مع نفسك ؟؟

الفرق يبقى نفسى لما تحسى ان فيه حد بيعمل ادامك تمارين تتشجعى اكتر كمان تعرفى تعمليها صح مش غلط وكمان تلاقى بنات ادامك جسمها مشدود ده بيحفزك تعملى اكتر وده بعمله بقيت بشغل يوتيوب واتفرج على فيديو واقعد العب الاقى نص ساعة عدت سريع واحس انى كنت فى جيم ومبسوطة ونشيطة وطبعا اى تمارين او جرى او مشى يبقى يعد الاكل بساعتين مش تاكلى وتعملى تمارين غلط ......

عندك كمان تمرين سهل وبنحبه نط الحبل كذا دكتور تغذية قايل ان نط الحبل 100 مرة فى اليوم بيشد عضلات البطن والظهر وينزل الوزن وكل ما تزودى كل ما تحرقى اكتر هاتى حبل والعبى مرتين فى اليوم مش حياخد منك 5 دقايق بلاش نكسل

يبقى كدا اول حاجة
وجبة العشاء وميعادها تتعدل
نغير عادات غذائية
الرياضة والحركة

طيب فى الاخر ايه مفروض نعمله عشان يفضل وزنننا ثابت ومظبوط من غير زيادة ون غير ريجيم
الحل نسبة وتناسب فى الاكل ازاى ؟؟ انا وزنى العادى 62 ولما يزيد 64 وتثبت على كدا من سنتين وزنى زاد نتيجة عادات غذائية غلط كنت بفطر غلط واكل حلويات كتير واعمل عادات كلها غلط وكنت زهقانة اطلع همى فى الاكل لغاية ما وصلت 70 طبعا اتضيقت من نفسى جدا قررت انزل ل 60 وانى مش حاعمل ريجيم لانى بصراحة مش بحب الريجيم اوى لان فكرته تعتمد على تنزيل الوزن لمدة معينة وممكن لو سبتيه ترجعى تانى لقيت ان اهم من الرجيم هو الثبات على الوزن اللى هو نسبة وتناسب فى الاكل بس طبعا الرجيم مهم لو البنت وزنها زائد اصلا يعنى 80 وطالع ومعمتدة على الطول المهم انى عملت نظام نسبة وتناسب ورياضة بالشكل اللى كنتت بقول عليه وانا فى ابليت خلال شهرين كنت وصلت لوزنى 60 من غير دايت ولا حاجة والحمد لله عدت سنتين وانا زى ما انا 60 واواقات ابقى 56 لانى بقيت بتحكم فى نفسى امتى عايزة اخس وامتى عايزة اكل

نسبة وتناسب فى الاكل فكرتها بسيطة انك تاكلى كل حاجة من غير افراط يعنى تفطرى عادى وتتغدى عادى وتتعشى بس من غير ما ازودها يعنى مثلا بلاش افطر بعيش فينو خليها عيش اسمر لان الفينو طبعا بيتخن جدا ومش بيشبع اما الخبز العادى فوائدة احسن لو فطرتى سندوتش وشربتى شاى بلبن واكلتى بسكوت معه يبقى بين الفطار والغداء لو جوعتى فاكهة واتغدى عادى بس بدل ما تاكلى طبق مكرونة كامل خيه طبق الا ربع حتقولى يعنى ربع حيفرق حاقولك ايوة عشان لو كل وجبة نقصتى منها ربع يبقى نقصتى طول اليوم دهون وسعرات كتير يبقى اخر شهر حميتى نقفسك من زيادة الوزن لو فى يوم حاسة انك اكلتى كتير وحلويات وكدا يبقى العشاء زبادى وخلاص لو اتغديتى كويس اوى حاجات دسمة يبقى بلاش اليوم ده حلويات شرقية وجاتوه لو جبتى شيكولاتة مش لازم تخلص كلها نفس اليوم كترى الفاكهة كل ده بيفرق ..

يعنى بنت صاحبتى معايا فى الشغل وزنها كان 85 بعد ما اهطبت حسيت ان جسمها مش حلو وقررت تنزل دلوقتى وزنها بعد 3 شهور 70 كيلو وجسمها بقى تحفة ماشاء الله لما اصحابى سالهوها انتى ىروحتى دكتور ايه قالت مع نفسى عملت نسبة وتناسب فى الاكل وامشى ساعة لمدة 3 ايام فى
الاسبوع او على السير وغيرها وغيرها

الهدف من الكلام ان موضوع بسيط مشكلتنا يابنات نطلع نجرى وراء الوصفات سمعتوا وصفة خل التفاح مع ايع تخسس لالالا فيه وصفة كمون تنزل البطن لا فيه الزتجبيل هو اللى ينزل طيب الشاى الاخضر وهكذا نجرى وراء الوصفات وننسى ان مشكلة مش حتتحل بالوصفة المشروبات ديه عامل مساعد احنا ولا بنلعب رياضة ولا ننتبع نظام صح ونرجع نقول كوب الشاى الاخضر حيحل المشكلة.. عمرها ما حتتحل ابدات كا ازاى دهون البطن حتنزل من غير رياضة ولا مشى وحتنزل بالكمون

لازم نعرف ان الكمون والزنجبيل والشاى الاخضر وكريمات الشد وغيره عوامل مساعدة مش اساسية

يعنى الشاى الاخضر او الزنجبيل فعلا بيحرق السعرات الحراية تكون 3 كوب فى اليوم بس الشاى الاخضر من غير سكر اصل الاقى بنات تحط سكر وتشرب طيب يبقى انتى عملتى ايه انتى كدا زودتى السعرات

ان شاء الله نكمل باقى الكلام لسه فى كلام تانى سلام

[سماح عزت]

حنكمل ان شاء الله مع بعض بس معلش مبارة مصر وايطاليا بتتعاد حاروح اشوفها بسرعة وارجعلكم مع انى 5 مرة اشوفها ..5 مرة يانودى يا سلام على اولاد البلد الاصيلين دى انتى على كده المفروض يدوكى من الجوايز بتاعتهم على المتابعة دى كلها هههههه... يارب يفرح كل المصرين وكل العرب والمسلمين بالفوز النهارده يااااااااااااارب ... احلى حاجة فى الفوز هى فرحة الناس وخصوصا الغلابة الى محوطاهم كتير من المشاكل بس بتدخل قلوبهم الفرحة مع الفوز يااارب اكرمنا... موضوعك يانودى بداية موشوقة للغاية وبيوضح الحقائيق الى بنتجاهلها ونقو ده حصل ازاى ؟؟ ربنا يستر لانى اصلا عندى قابلية جمدة للزيادة ليه لانها وراثة ....مستنينك بعض الفاصل بس مش تتاخرى علينا عشان احنا بنستناكى زى ما طلبة الثانوية العامة بيستنوا الدرس بتاعهم ههههههه ...