"عروسات المستقبل تعالوا اقولكم".. جزء ( 6 )

[هنودة هنانيدو]

نودا يا قمرايه ازيك وازاى كل البنات عاملين ايه
ملوكه ازيك ياقمر معلش هتعبك ياريت تكتبيلى عنوان الدكتور

التوبيكات جامده يا نودا فعلا ضرورى نركز فى ماسك معين مش نقعد نعمل نفسنا حقل تجارب
وكمان موضوع الاسنان مهم اووى انا رحت للدكتور عشان كان نفسى اعمل تبييض اللى هو زى الممثلين بس قالى ضار جدا لانه بيشيل طبقات من السنه وبيضعفها
ع فكره انا جربت السمنه البلدى لشعرى وفعلا حلو اوووى انا سمعتك بتتكلمى عن ماسك الميونيز ممكن تكلمينى عنه اول مره اسمع الماسك ده
نودا انا كنت عاوزه اسالك عن كريم ليوكسيد ده ايه استخدماته بالظبط لانى احترت
وكمان هو لازم بعد السويت استخدم زيت الزيتون مش ينفع لوز طيب زيت الزيتون ده اللى هو بتاع الاكل ولا الشعر واجيبه من الماركتات الكبيره ولا منين بالظبط
وبصى يانودا انا كنت بستخدم صن بلوك لونا بس بحس وانا حطاه بيسمرنى وبيخلى طبقه ع وشى زى زيت انا اصلا بشرتى دهنيه ومش بحب يبقى ع وشى طبقه الزيت دى بتضايقنى وبحش انى شكلى بيخليه مش حلو ممكن تقوليلى اى صن بلوك كويس او مثلا كريم يكون بديل يحمى من الشمس ويكون بينشف ع الوش
ع فكره انا رجلى فى تقدم بس بحس ان فيها كده خطوط مش عارفه ايه ده بستخدم كريم لوكس كمرطب لو فى كريم احسن ممكن تقوليلى وسورى ع الاطال

سوما عاملة ايه ؟؟؟ بقالك مدة مختفية ...
ماسك المياونيز بتجيبى مايونيز وتحطيه على شعرك وعلى فروة الاس وتسبيه ساعتين وتغسلية كويس .. بيطرى الشعرى وبيرطبه

ليكوسيد ده مرهم مقشر مناسب للركب والكوع عشان يقشرها ويشيل السواد

زيت الزيتون بعد السويت هدفه انه يقلل الشعر عشان ميطلعش ده موجود عند العطار مخصص للبشرة والشعر حتلاقيه عند اى عطار
زيت اللوز طبعا حلو جدا للبشرة بس مش بعد السويت الافضل بعد السويت قفلى المسام وقللى الشعر بزيت الزيتون او ماء ورد ديه تقفل المسام وفى لوشن من جونسون بيقلل الشعر وبيتحط بعد السويت


لونا وحش جدا انا جربته وبيعمل زى ما بتقولى طبقة دهنية وبيسمر .. انتى بما ان بشرتك دهنية تجيبى صن بلوك اويل فرى oil free يعنى ميكونش فى زيوت خالص عندك ماركة نتروجينا وفى قوتوديرم دول نوعين حلوين صن بلوك

الخطوط اللى على رجلك بيضا ؟؟؟؟

[هنودة هنانيدو]

حبيبة قلبى متشكرة اوى على الرد و الاهتمام
انا كده معاكى تمام فى الخطوات من غسيل الشعر وحمام بوناويل و المشط الخشبى ده فعلا نظامى بس امبارح بعد الخطوات دى استخدمت لاول مرة زيت جوز الهند(باراشوت انتاج الهند) حلو اوى يا نوده (نقطته على فروة الراس) و قصيت الاطراف و غطيت الاطراف فى اول الشعر و فى اخر الشعر بكريم(بونا ) ده موجود فى الصيدليات كانت قالتلى عليه دكتورة فعلا ممتاز و لفيت شعرى
الحمد لله النهارده حاسة بتحسن ممكن بعد الظهر لو حبيت اعمل تسريحة مثلا بدل الكحكة اللى عملاها دايما استخدم السيروم...ايه رايك كده صح؟
انا شعرى جاف يا نوده يبقى هاغسله مرة واحدة زى ما قلتى و ان شاء الله ناوية الاسبوع الجاى استخدم المايونيز و بعدها نجرب الزبادى و العسل...صح كده يا مس؟
بس عندى سؤال مجننى ..الاطراف المتقصفة نقصها ...طيب لو فيه تقصف فى شوية شعر بس من قدام (تقصف جامد و مش بيتقبلوا اى حاجة لانى حرقتهم بالسشوار من كام سنة ) هما مش كتير اوى زى مايكونوا قصة ...يا ترى ايه اقتراحك؟؟
باكرر شكرى ليكى يا هنوده و اسفة لانى دايما مصدعاكى

تمام يا سارة لو شعرك بعد ما تفكيه حاسة انه طرى بلاش تحطى حاجة كفاية كدا لو حاسة انه ناشف حطى سيروم

انتى طالبة شطورة خالص الميس مبسوطة منك ههههههههه حلو نظامك يا ساسو

بصراحة مش عارفة تقصف الشعر من ادام حله ايه ير انه بيتسخدمى زيوت ليه او ماسكات عشان يقل التقصف لانه مش حينفع يتقص

[Noura89]

ازيك يا هنوده
معلش عندى سؤال كده على السريع
كنت عايزاكى تقوليلى على سن بلوك حلو عشان انا مسافره مصيف قريب ان شاء الله

[هنودة هنانيدو]

العرايس الحلوين ايه اخباركم ؟؟؟
النهاردة نتكلم على الميكب زى ما طلبت سارة وكمان زى ما اقترحت lonelygirl
ان يبقى فى توبيكات عشان تبقى اسهل

احنا قبل كدا اتكلمنا على ميكب بس تعالوا نتكلم تانى وبالتفصيل واللى عندها اسئلة تقولنا عشان نستفيد لان ممكن يكون فى حاجات انا ناسيها وبفتكرها معاكم ومن الاسئلة اوك ؟؟؟ والاسئلة هى اللى بتخلينى افتح مواضيع نتكلم فيها مش مهم انا اتكلم المهم تبقى الكلام مفيد ومناسب


نبتدى نتكلم بقى
الميكب طبعا من حاجات المهمة والحلوة واى بنوتة بتحبها جدا تحس انها دلوعة وهى حاطة ميكب كمان ممكن تخفى عيوب بالميكب وبيبقى شكلها حلو

بس الاول معلش نصيحة من اختكم هنودة الميكب يا بنات فى البيت ولزوجك بس عشان ميتفهمش من الكلام ان ميكب حلو ننزل بيه .. هدفنا كلنا نعمل حاجات حلوة عشان نرضى ربنا ونبقى زى القمر فى عيون ازواجنا وبردو عشان نرضى ربنا ...

طولت عليكم معلش ..
الميكب للعروسة مش مهم يبقى كتير المهم يبقى نوعه وماركة كويسة وحاجات تليق عليكى
اصل كدا كدا الميكب بيقعد معاكى كتير مهما استعملتى يعنى صعب اوى تلاقى روج خلص منك وجلوس خلص بسرعة لانك بستخدمى حاجات بسيطة فى كل مرة لانه مش ميكب الفرح ده ميكب اليومى الطبيعى وحتى لو عندك سهرة او حفلة حتبقى مش كل يوم

طيب معنى كدا علبة ميكب زى ما كانت ساسو بتسال عليها هى حلوة ولا
فى رايى انها مش عملية ليه ؟؟
اولا معظم شتط ميكب مش حتبقى ماركة حلوة قليل لما تلاقى ماركة معروفة عاملة شنطة ميكب
ثانيا احتمال كبير تبقى مواد بتاعتها مش مناسبة ليكى او مش تحبيها فكدا حترميها
ثالثا الوان كتير فيها مش بتبقى مستعملة يعنى بتتحط الوان قليلة الاستعمال وتلاقى الالوان اللى انتى عايزها خلصت وبقية علبة زى ما هى
رابعا اوقات بتبقى عجباكى مثلا ايشادو لماركة تانية حتبقى متحيرة اجيب تانى ولا التزم بالعلبة الشاملة

عشان كدا موضوع علبة ميكب الكاملة مش عملية هى مقيدة وحتلاقى فى الاخر انك بتجيبى حاجات فردانية وبتدفعى فلوس تانية

طيب نيجى بقى لصلاحية الميكب
اختارى دايما صلاحية مش اقل من 3 سنوات وتكون لسه جديدة يعنى حتجيبى بلاشر انتاج 2009 وصالح 3 سنوات
متجبيش بلاشر انتاج 2008 وصالح 3 سنوات لان سنة حتفرق معاكى وانتى لسه مش فتحتيها وزى ماقولنا الميكب بيقعد كاير حرام تجيبى حاجة صلاحيتها عدت عليها سنة

طيب نجيب اد ايه ميكب ؟؟؟
طبعا عشان ميكب بيقعد كتير واواقات حتلاقوا بنات تقولك انا رميت ميكب كتير كنت حايباه لان صلاحيت خلصت ومكنتش استخدمته او لحق يخلص
عشان كدا حنجيب حاجات معقولة اللى حنستخدمها كتير وتكون عدد قليل ولما تخلص نبقى نشترى تانى
اصل بردو مشكلتنا بنتخيل اننا لازم نعمل احتياطى كتير كاننا مش حنلاقى ميكب كتير فى السوق مع انك ممكن بعد فترة من الجواز تلاقى نفسك حاجات والوان تانية عجبتك او طلع زوجك مش بيحب حاجة معينة حتعملى ايه ؟؟
طبعا حترميها وتروحى تشترى تانى ,, حرام انك تبقى جايبة حاجات بفلوس كتير وترميها عشان كدا هاتى عدد معقول يكفيكى من غير ما تخسرى

طيب امتى اجيب الميكب قبل الفرح بمدة اد ايه ؟؟؟
فى غلطة كتير بنقع فيها وانا اولكم اننا بنشترى ميكب بدرى يعنى قبل الفرح ب 3 شهور واكتر وبتكون صلاحية لسه بدرى عليها بس اوقات بيحصل تاجيل فى ميعاد الفرح حتلاقى ان حاجاتك لاية ما تتجوزى تكون نص وقت صلاحية خلص
عشان كدا يابنات هاتى ميكب قبل فرحك بشهر حتقولى وقتها مش حيبقى معايا فلوس حاكون خلصتتها على حاجات تانية حاقولك شيلى مبلغ للميكب على جنب واتعاملى كانه مش موجود وقبل فرحك انزلى هاتى اللى عايزة

ماركات الميكب ...
طبعا ماركات كتيرة وهى اختلاف اذواق وتجارب يعنى ممكن اكون بحب ماركة معينة وتبقى حلوة جدا بس غيرى ميكنش بيحبها ويكون مجرب حاجة تانية
عشان كدا حكاية ماركات ده اقتراحات يعنى الافضل تشوفى اراء ناس كتير اعملى سيرش على النت وشةوفى لو انتى عايزة حاجة من ماركة معينة شوفى اراء بتقول عليها ايه
ماركات حلوة كتير زى فورايفر من اجمل ماركات انا عن نفسى بحبها جدا ولانكوم وماكس فاكتور وريميل وبورجوا ولوريال وفلورمار

اختلاف الاسعار طبعا بيبقى بين ماركات
يعنى فورايفر تعتبر من اغلى ماركات وحتلاقى نفس مستوى الاسعار لانكوم ولوريال وشانيل

مستوى اللى بعده من الاسعار ماكس فكتور وبورجوا وريميل وفلورمار


حنجيب ايه فى الميكب ؟؟
فى حاجات فى ميكب اللى بتستخدم بشكل يومى وتبقى بتدى شكل طبيعى
وفى حاجات فى ميكب مخصصة اكتر للسهرات وحفلات او ميكب تقيل

نبتدى باول نوع حاجات اللى نحتاجها بشكل يومى
فاندوشين "" كريم الاساس "" هو ده مش يومى بس يعتبر وسط بين حاجات الخفيفة وحاجات خاصة بالسهرات لو انتى بتحبى حاجات بسيطة فى ميكب هاتى فوندشين ليكويد اللى يبقى سائل عشان يبقى خفيف على بشرتك ولو بشرتك دهنية تجيبه اويل فرى خالى من الزيت

بلاشر ده من اجمل حاجات فى ميكب وبيدى شكل طبيعى وجميل اوى البلاشر اجمل الالوان وبنحتاجها عالطول الروز واللون الخوخى اللى يدى على درجات اورانج عشان معظم بشرتنا الخمرية القمحية الروز بيدى نور للوش ورقة والخوخى بيدى ميكب دافى

الجلوس والروج فى بنات مش تحب الروج زى سيادتى وفى بنات تحب الروج جدا
اللى بيحب الروج هاتى كام لون مختلفين يعنى روز واحمر وحاجة على بنيات زى الذهبى وعندك روج مات matte اللى بيبقى مفهوش اى لمعة وفى انواع روج بتدى شكل مضىء شوية كانها عليها طبقة جلوس خفيفة فيها زى بريق هاتى اللى تحبيه

اللى بيحب جلوس فقط هاتى الوانات جلوس اللى تحبيها ونوعى بردو كام واحد بين درجات الروز والاحمر او النبيتى والبنيات وعشان تثبتى لون الجلوس لانه بيبقى خفيف حطى طبقة بسيطة جدا من كونسلير على شفايف وتسبيها دقيقة وحطى جلوس حتلاقى لونه اوضح واثبت انا مجربها عالطول وحلوة

طيب ممكن كمان تعملى ميكس بين الروج والجلوس وطلعى الوان جديدة وده حلو للعاريس وعامةة لاى بنت انك اوقات زهقتى من الوان عادية وتلاقى بنات معاها الوان غريبة مش عارفة هما عاملينها ازاى
الطريقة بسيطة هما بيلعبوا فى درجات الالوان انك تجيبى روج الوان معينة وجلوسات درجات اغمق او افتح من الروج يعنى مثلا جبتى روج روز فاتح هاتى جلوس روز اغمق من روج لما تحطيهم على بعض تلاقى درجة روز مختلفة وتقدرى تزودى الجلوس او تقللى الجلوس

يعنى مثلا عندك روج احمر وحاسة انه احمر غامق وتقيل هاتى جلوس على درجات افتح من اللون الاحمر اول درجة لما تحطيه حيدى لون احمر اهدى واريح للعين

وممكن تلعبى الوان الفوشيا والموفات يعنى هاتى كام روج الوان مختلفة وهاتى جلوسات درجات من الروج

كحل طبعا كلنا بنحب الكحل ونازال الوان كتيرة منه بس الاسود ملك الالوان عشان كدا هاتى كحل اسود حلو وماركة كويسة لانه اكتر حاحة تستخدم .. بعدها هاتى لون او 2 من الالوان اللى محتاجها زى التراكوز والاخضر دول الوان كتير تستخدم

الماسكرا لو بتحبيها هاتى لون منها الاسود الاساسى وهاتيها بتطول وتكثف الرموش وممكن كمان تجيبى لون الازرق بس لو مش بتحبى ماسكرا ملهاش لازمة

الايشادو :: حتلاقى علب اللى فيها كل الالوان بس بردو مش ماركات بس فى ماركات بتعمل علبة صغيرة فيها 4 او 6 الوان وديه عملية جدا انك ممكن تجيبى علبتين اللى فيها 4 الوان بدرجات مختلفة والايشادو كريمى احلى نوع لانك سهل تستخدميع مش محتاج خبرة زى باقى الايشادو وبيكون ملمسه ناعم وثابت وبردو عشان تثبتى الايشادو حطى طبقة بسيطة جدا من كونسلير على الجفن وسبيه دقيقة وحطى الايشادو

كونسلير ::: من حاجات مهمة عشان الهالات السوداء خاصة لو انتى مرهقة او مش نايمة كويس وعايزة شكلك حلو .. كونسلير الليكويد بيبقى افضل من الاستيك لان السائل تقدرى تتحكمى فيه بسهولة بتحطى منه طبقة بسيطة على شكل نقط تحت العين وتفرديها بصبعك اللى تلبسى فيه الدبلة كانك بتحطى كريم واستنى شوية لغاية مايهدى عشان تشوفى هو كتير ولا قليل

دول الاساسيات اللى تحتجايها يوميا طبعا مش لازم كله يتحط كل يوم .. انتى ممكن تستكفى بكجل مع روج او كونسلير مع جلوس او ماسكرا ع بلاشر وجلوس
يعنى على حسب ما تحبى حاجات خفيفة بتدى شكل اجمل

معلش يا بنات ايدى وجعتنى من كتابة حاكمل كمان شوية بقية ميكب اوك ؟؟؟

[هنودة هنانيدو]

ازيك يا هنوده
معلش عندى سؤال كده على السريع
كنت عايزاكى تقوليلى على سن بلوك حلو عشان انا مسافره مصيف قريب ان شاء الله

حتلاقى يانورا من نتروجينا حاجات حلوة وهاتى درجة حماية عالية اعلى من 45

[so0oma_the cat]

سوما عاملة ايه ؟؟؟ بقالك مدة مختفية ...

الحمد لله ياقمر انتى اللى عامله ايه لا مافيش اصلى بشتغل فكده يعنى
بس اكيد مااقدرش مادخلش نودا بقت جزء لايتجزء من حياتى
ميرسى يا نودا ياقمر ع ردك ع اسالتى بصى ياجميل لا مش خطوط بيضاء دى زى كده بحس ان جلد رجلى مكشش عامل خطوط فهمتى
طبعا قبل كل حاجه الموضوع جامد وف وقته بصى انا اول مره اعرف منك ع اويل فرى دى انها فى الميكب طيب بصى يانودا انا كنت بستخدم بودر مائى ووقفته لما عرفت انه غلط ع البشره فاستخدمت كريم اساس بس انا بشرتى دهنيه وكان برده بيسيح ويعمل ملمس دهنى
استخدمت برده بودر مضغوط بس بمجرد اشوف الشمس كان بيسيح ممكن يانودا تقوليلى ماركه كويسه وسعرها ايه ومنين ؟ وبصى انا اسمع انا كريمات التفتيح دى وحشه طيب انا سمعت ان اولاى ده حلو وبيخلى لون البشره موحد ومشباين فى ميكب وانا مش بحب احط ميكب اوفر بحب وشى يبان طبيعى ايه الفرق بين اولاى كريم التفتيح واولاى التانى وبصى انا مش بحب الروج بصى انا بجيب قلم اى شادو نبيتى بحطه فى شفايفى ع خفيف بيدى لون طبيعى اوووى كانه هو اللى كده ايه ر ايك غلط ده ولا ايه ؟ وع فكره انا جبت ماسكارا من ايفون كانت غاليه ووحشه اخر حاجه بجد واوك ميرسى ع نيتروجينا هجيبه بس قوليلى ايه درجه الحمايه ؟ ومعلش يانوده انى بطول باسالتى

[ملوكة 12]

هنوووودة أزيك ؟ يا رب تكونى بخير
كلامك حلو ومنظم جدااا طبعا انا ابتديت اجرب واتعلم بقى الواح مش هيفضل يتفرج
كتير ...انا جبت الماسكرا بتاعة أووريفليم طلعت حلوووة جداااا وان شاء الله بقى قريب
الواحد يبدأ ينظم حكاية ألوان الروج والجلوسر مع بعض ومستنين الباقى
والف سلامة على ايدك احنا تعبينك معانا
مع هنوووودة مش هتقدر تغمض عنيك

[solitair_sam]

حبيبتى نودى وربنا وحشانى ومعرفش هتجوز وهبعد عنك انتى والبنات ازااااااااى






بس برضو معرفش اسيبو لوحده كدا ازاااااااااااااااى (ياحرااااااااااااام ) ههههههههه


على فكره بمناسبة الميك اب فعلا انا اشتريته من اسبوعين كدا .. واهو لسه ع الفرح يجى اسبوعين تلاته ( يعنى كدا المده مناسبه ) مظبوط ولا نو ؟؟

عروستنا الجميلة منورة .. شوفى لو محتاجة اى نصايح اصحابك الحلوين موجودين
ولو فى اى حاجة شالة دماغك قولنا عليها نتكلم فيها وكلنا نستفيد
اصل العروسة دماغها بتضرب من كتر حاجات هههههههههههههه

والله انتى بتقولى فيها

دى مش ضربت .. تؤتؤتؤتؤ

دى لسعت خاااااااااااااااااااااااااااالص هههه


بصى يا نودى حمام كريم بوناويل ..بصراحه ملقيتوش عندنا ف البلد بس اللى ف الصيدليه قالت لى موجود منو ف اكياس .. المهم جبت واحد عشان اجربه


بس انا كنت سمعت بنات قالوا كلام كويس عن حمام كريم فاشكول ..وناس كانوا بيشكروا فيه اوى

فيه بالعسل و خلاصة التوم وزيت الحيه

وبما ان شعرى مقصف وهايش جبت اللى بخلاصة زيت الحيه (لانى سمعت انو بيخفف هيشان الشعر )
المشكله انى بقا من يومين كدا قريت موضوع وكانت فيه بنت بتسأل عن فاشكول بس اللى بخلاصة التوم ..والبنات قالولها بلاش تحطه على فروة الرأس لانو بيعمل على تساقط الشعر ..ودا قلقنى جدااااااااااااااااااااااااااااا من نوع اللى جبته ..اعمل ايه ..طمنينى بالله عليكى


وحاجه كمان .. انا كنت حابه اوى اجيب روج احمر ( عاوزه اعمل بقا حركات وحاجات كدا هههههه ) وجبت جلوس احمر لان قلم الروج ( اللى من غير لمعه دا )حسيت انو صارخ اوى
وبعد ما روحت ندمت انى جبت الاحمر ..عاوزاكى بقا بطريقتك المعهووووووووووده ف الاقناع تقنيعينى بيه تانى وتقوليلى لما احطه يبقى الميك اب عامل ازاى (بس يكون بسيط )وايه الالوان اللى اعملها معاه واللبس يكون على الوان ايه لان مهما كان دا احمررررررررررررررررررررررررررررررررررر ..فاهمانى طبعا




معلش رغيت كتير..بس انتى اللى قلتى هههه

[solitair_sam]

سموحه .. مليون حمدالله على سلامتك وحمد الله على سلامة ابن عمك

يالا بقا ارجعى ونورينا من تانى

[مسلمه_حره]

السلام عليكم
انا الحقيقه متابعه الموضوع ده وعاجبنى قوى
بس انا محتاجه مساعدتكم ضروووووووووووووووووووووووووووووووووووري جدا جدا جدا
ان شاء الله يابنات انا فرحى بعد العيد
وهنزل الاسبوع ده اشتري حاجة المطبخ
وعايزاكم تساعدونى
واشوف بقي جدهنة المصريات
معلش يمكن الموضوع مش مناسب بس فعلا محتاجاكم
عايزة اعرف الاماكن الكويسه للحاجات دى ولو فى ماركات لطقم الصينى
وياريت يابنات لو حد يعرف سعر التيفال
كمان سمعت ان فيه مكان فى الازهر كله مفروشات ياريت يابنات لو حد ممكن يوصفهولى

ضرووووووووووووووووووووووووري