"عروسات المستقبل تعالوا اقولكم".. جزء ( 7 )

[so0oma_the cat]

ايك يانوده وعامله ايه يا قمرااااااااااااايه وحشتينى

princess_sarah
حبايب قلبى احلى بناتيت فى الدنيا ازيكم كلكم
انا حبيت ادخل افرحكم معايا لانى نجحت النهارده و اخيرا اتخرجت
و دلوقتى اقدر ابدأ تمارين الرقص بجد ورقصنى يا جدع ...واحد اتنين
هنوده..حبيبتى لما حكيتى عن جوزك جيتى ع الجرح...تصدقى انا قربت انسى ملامحه..الظاهر البعاد ده لا مفر منه
ربنا يقربلك البعيد و يجمع شملكم على خير ....هانت يا نوده ان شاء الله كل الشوق ده هيتحول لفرحة كبيرة وقت اللقاء و السعادة الدايمة باذن الله

الف الف الف مليون وتلاتلاف مليون مبروك ياجميل انا كمان نجحت عقبالى اما اتخرج زيك ويارب يرجعلك جوزك وتتجوزو

سومة أزيك انتى ونورتى ومبروك نجاحك ودايما بالتوفيق

ميرسى ياملوكه حمدالله ع سلامتك ياقمرايه

هنودبالنسبة لموضوع البطن المشى مش هاينفع معايا..امارس رياضة بس؟واجيب التمارين من
اليوتيوب ولافي حاجة تانية؟اعمل دايت كمان ولالأ؟ارجوكى فاهمينى اعمل اية بالظبط لأنى مش عارفة ابدأ أزاى..ممكن اتطفل عليكى بمااننابقينااصحاب وتقوللي انتي منين؟عندك كم سنة؟ يعني شوية معلومات تكمل صورتك الرائعة في خيالي..بجدنفسي اشوفك واتكلم معاكى ويابخت كل اللي يعرفوكي ياملاك

ازيك ياقمرايه عامله ايه معلش يانودا هرد عليها بعد ازنك ياجميل بصى نصيحه من اخت لا للدايت ده غللللللط جدا الدايت بينزللك وزنك بسرعه ويرجعهولك زياده ع طول نصيحه انت كل تلت ساعات تاكلى كميات بسيطه اظبطى نفسك بكميات معينه كل تلت ساعات مع الرياضه وبعد كل مره تعملى الرياضه اللى نودا قالت عليها وهتحسى بفرق ان شاء الله انما دايت كميائى ودايت كامل ويوم فرى والعبط ده كله كلام فارغ والله

[so0oma_the cat]

ميرسىىى يا نودا ع المعلومات الجامده دى ربنا يخليكى لينا
دومتى متالقه
للامام

[مرمرالمصريه]

السلام عليكم ورحمه الله وبركاته
مبروك يا قمرات وحشتونى جدااااااااااااااااااااااااااااااااااااااا
مبروك الجزء الجديد لسه مقريتش كل الى فاتنى بصراحه بس بجد وحشتونى هحاول اجى واكلمكو اكتر باذن الله يالا لا اله الا الله احسن مروحه دلوقتى تصبحو على الف خير

[tala1234]

صباح العسل يا بنات
دودو انتي فين؟؟؟؟

[princess_sarah]

ربنا يخليكم ليا يا احلى بنات فى الدنيا وربنا يفرحكم كلكم لانكم فعلا اصحاب قلوب طيبة و جميلة
هنوده و سماح و كل بنت جوزها بعيد عنها...ربنا يقرب البعيد و يكمل فرحكم
و كل البنات اللى لسه مش متجوزة...ربنا يرزقكم الزوج الصالح اللى يستحقكم و يحافظ عليكم
سوما اللى لسه مش متخرجين...ربنا ينجحكم و نفرح بتخرجكم
هنوده....احنا طلعنا زمايل لحد ما انا دلوقتى ليسانس اداب و التربية تخصص لغة انجليزية

[alzaa]

الف مبروك علي نجاح سارة وسوما يارب عقبال الجواز انشاء الله

[alzaa]

شكرا هنودة حبيبتي واختي الحلوة علي فكرة انا امبارح سالت علي السلك بيل لقيتها اللي بشفرتين قاللي 215 وفي اللي بالمساج مع الشفرتين 245 هي لونها لبني وقالي الماني وضمان سنتين اية رئيك يعني المساج دي تعمل اية اة وكمان يعني لما اعمل المنطقة اياها اعمل علي قد ماقدر وممكن مكملش يعني كدة الشعر ميطلعش مع بعض ولا قصدق كل يوم اعمل حاجة ومقولتليش علي العجانة وكمان بالنسبة للاجهزة اية احسن الانواع امبارح لقيت حاجات كتير واحترت اوي وكمان بالنسبة للمسكات انا بشرتي دهنية اية اكتر ماسك مفيد انا كمان بسمع كلامك في شرب المياة بس يعني مش 8 اقل 3كوبيات كدة بس هتعود معلش يانودي طولت عليكي

[هنودة هنانيدو]

ازيكم يا بنات ده ماسكات للبشرة من نانيس سليم

ماسك اللبن
للبشرة العادية

الماسك ده بالذات مناسب جدا لأصحاب البشرة العادية، لأنه بينقي البشرة من أي شوائب ممكن تتجمع عليها نتيجة التلوث وكمان بيغذيها.

المكونات:-

• 5 معالق لبن حليب.
• 5 معالق عسل نحل.

طريقة تحضير الماسك:-
حطي العسل على اللبن، لغاية ما يصبحوا مزيجا واحدا، وبعدين حطي الماسك على وجهك لمدة 10 دقائق، بعد كده اغسلي وجهك بالميه الفاترة
.
غسول النعناع
للبشرة الدهنية

لو كانت بشرتك دهنية فأنت أكيد محتاجة إلى حاجة تخلصك من الدهون والزيوت... وأحسن حاجة إنك تستخدمي غسول النعناع

المكونات:-

• نعناع أخضر أو مجفف.
• ميه.
طريقة تحضير الماسك:-
بتغلي شوية نعناع طازة مع الميه، وبعدين تستني شوية لما الميه دي تبرد، وبعد كده تغسلي وجهك بيهم مرتين في اليوم مرة الصبح ومرة بالليل.
ماسك عصير الخيار

للبشرة الدهنية الجافة

الماسك ده ممكن تستخدميه لو كانت بشرتك دهنية جافة بس بشرط إنها تكون خالية من الحبوب...

المكونات:

• معلقتين عصير خيار.
• معلقة ماء ورد.
• معلقة زيت زيتون.
• معلقتين دقيق.
• شرائح خيار.

طريقة تحضير الماسك:-
بتخلطي المكونات كلها مع بعضها ما عدا شرائح الخيار، وبتحطي الماسك على بشرتك، وبتحطي شرائح الخيار عليه لمدة 10 دقائق، بعد كده بتغسلي وجهك بالميه الباردة، على فكرة الماسك ده بيساعد على ترطيب البشرة.


ماسك التفاح
لشد البشرة الدهنية المترهلة

لو كنت فوق الثلاثين وبتعاني من وجود ترهلات في بشرتك ممكن تستعملي الماسك ده...

المكونات:-

• قلب التفاحة.
• معلقة كبيرة نشا مدوبة في معلقتين ميه.
• 3 معالق عصير تفاح.
• معلقة كبيرة عصير خس.
• نقطتين عصير ليمون.
• معلقتين كبار دقيق.
طريقة تحضير الماسك:-
بتحطي التفاحة بعد ما تقشريها في الخلاط، وبتضيفي إليها كل المكونات السابقة، وفي الآخر الدقيق واحدة واحدة لغاية ما الخليط يتماسك في الخلاط، بتحطي الماسك على وشك لمدة 10 دقايق وبتشيليه بالميه الفاترة، وعلى فكرة ده مش بيشد البشرة وبس ده كمان بيشيل البقع الموجودة في الوجه.


ماسك الليمون
لسد مسام البشرة الدهنية

لو كانت بشرتك دهنية وبتعاني من مشكلة المسام الواسعة فالحل في الماسك ده...

المكونات:-
• 3نقط عصير ليمون.
• معلقة كبيرة خميرة مدوبة في معلقتين ميه.
• معلقة نشا مدوبة مع معلقة ماء ورد.
• معلقتين لبن.
طريقة تحضير الماسك:-
بتحطي المكونات كلها مع بعضها لغاية ما يبقوا مزيج متماسك، ولو المزيج ناشف شوية ممكن تحطي شوية لبن، ولو المزيج طري بتحطي شوية دقيق...

بتحطي الماسك على بشرتك لمدة 5 دقائق، وبعد كده بتشيليه بالميه الفاترة، على فكرة الماسك ده بينظف البشرة وبيسد المسام الواسعة في منطقة الأنف أو الخدود وبيخفف الإفرازات الدهنية في الخدود.


ماسك عصير البرتقال
للبشرة الجافة

لو كانت بشرتك جافة ونفسك في حاجة تطريها يبقى ممكن تجربي الماسك ده...

المكونات:-

• معلقة كبيرة قشر ليمون مبشور.
• معلقة كبيرة قشر برتقال مبشور.
• معلقة دقيق.
• معلقة صغيرة عصير ليمون.
• معلقة صغيرة عصير برتقال.
• معلقة صغيرة زيت اللوز الحلو "موجود عند العطار".
طريقة تحضير الماسك:-
تخلطي المكونات كلها مع بعضها وتفركي وشك بيها، وعلى فكرة ممكن تغسلي وشك بالصابون الطبي في الأول، وبعدين تفركي وشك بالماسك بإيدك الاثنين بالراحة، وعلى فكرة الماسك ده مفيد جدا لأنه بيقضي على أي خلايا ميتة في البشرة، وممكن بعد الماسك ده تحطي على وشك قشطة اللبن لمدة 3 دقايق..



ماسك زيت الزيتون
للبشرة الجافة شديدة الجفاف

لو كانت بشرتك جافة وشديدة الجفاف فالحل إنك تستخدمي الماسك البسيط ده...

المكونات:-

• معلقة كبيرة زيت زيتون.
• معلقة كبيرة جلسرين أو فازلين طبي.
• معلقة كبيرة خميرة مدوبة في معلقتين لبن دافئ.
• 3 معالق دقيق.
طريقة تحضير الماسك:-
بتحطي الفازلين مع الزيت، وبتحطي عليهم الخميرة مع اللبن، بتزودي شوية دقيق مع اللبن لغاية ما يبقى المزيج متماسك، بتحطي الماسك على وشك لمدة ربع ساعة، وبعد كده بتغسلي وشك بالميه الفاترة.


ماسك بياض البيض
للبشرة المختلطة اللي بتميل إلى الدهنية

المكونات:

• بياض بيضة.
• 1/2 معلقة صغيرة عصير ليمون.
• معلقة كبيرة من البطاطس المسلوقة والمهروسة كويس.
• معلقة صغيرة عسل نحل.
• معلقة كبيرة نشا مدوبة في ماء ورد.

طريقة تحضير الماسك:-
بتحطي بياض البيضة في الخلاط، وبعدين بتضيفي إليه كل المكونات وتخلطيهم مع بعض كويس، هتحطي الماسك على وجهك لمدة 7 أو 8 دقائق، وبعدين هتغسلي وجهك بالميه الفاترة...
على فكرة الماسك ده هيساعد البشرة المختلطة على إنها تبقى عادية وما تبقاش دهنية..


ماسك بشر الصابون الطبي
للبشرة المختلطة

المكونات:-

• معلقة صابون طبي مبشور.
• 1/2 معلقة زيت زيتون.
• نصف كوباية ماء ورد.

طريقة تحضير الماسك:-
هتخلطي كل المكونات دي مع بعض، وهتفركي بيها وجهك كل يوم ، وبعد كده تغسلي وجهك بالميه الفاترة، على فكرة الماسك ده بينعش البشرة جدا وبينقيها.

[هنودة هنانيدو]

[quote=so0oma_the cat;8610473]ايك يانوده وعامله ايه يا قمرااااااااااااايه وحشتينى

انتى كمان وحشتنيى يا سوما والف مليون مبروك على النجاح ياقمر

[هنودة هنانيدو]

السلام عليكم ورحمه الله وبركاته
مبروك يا قمرات وحشتونى جدااااااااااااااااااااااااااااااااااااااا
مبروك الجزء الجديد لسه مقريتش كل الى فاتنى بصراحه بس بجد وحشتونى هحاول اجى واكلمكو اكتر باذن الله يالا لا اله الا الله احسن مروحه دلوقتى تصبحو على الف خير

مرمر ازيك ياقمراية واخبار الجواز ايه انتى خلاص سبقتينا
ربنا يفرحك دايما ويبسطك ومستنيناك عالطول تدخلى وتكلمينا