السلام عليكم
انا اعتبر هدية رمضان هو عثوري على هذا الموضوع المتكامل بكل ما تعني الكلمة
بارك الله فيكم لارشاد الصبايا الحلوين على العناية بانفسهن وجزاكن الله خيرا
انا يا حلوات عرسي بعد شهر ونصف باذن المولى وقد بدات اقرا هاد الموضوع قبل اسبوعين وهو الي خلاني انتبه لنفسي انه لحد اسا ما بلشت اهتم ببشرتي ولا بجسمي قبل العرس وانتبهت لعدة مشاكل:
وزني زاد ما يقارب ال 6 كيلو خلال عدة شهور بسبب الضغوطات التي مررت بها هذة السنة وضغط التعليم تحديدا
بشرتي مليئة بالبقع -بوست أكني- ما بعد الحبوب وهنالك اسمرار منطقة الذقن وهنالك المسام الواسعه--بشرتي دهنية
هنالك شعري الجاف والمتقصف الاطراف والخفيف والقصير
وهنالك اسوداد الركب والاكواع وتحت الابط والمنطقة الحساسة
وهنالك اسوداد اصابع رجلي
طبعا هاد سرد كامل للمشاكل لكن الحمدلله مع كل هيك انا ثقتي بنفسي عالية ربنا خلقني امورة ومحبوبة وخطيبي بحبني ولله الحمد
ما عرفتكو على نفسي انا من فلسطين واعمل اخصائية اجتماعية وادرس للقب الماجستير في الجامعة وعمري 25 سنة.
انا يا هند بحب كلامك كثير لكن ارجو انك تراعي اللهجة يعني انا فلسطينية ما بفهم كل مصطلحاتك المصرية وبالذات لما تحكي عن وصفة او عن لبس بحس اني بدي مترجم وكمان استخدامك للغة الانجليزية بالعربي مصعب عليي افهم كلشي يعني متت تني فهمت انه سكراب هو نفسو scrub يعني مش منتبهة لهاد الشي
بدي اقلكو اني بلشت استعمل كتير من الوصفات
استعلمت الخل وزيت الزيتون لطرد القشرة التي تحتل شعري منذ وقت طويل
استعملت لتحت الابط وضعت ليمون وبعد دقيقتين نشاء حتى اسود النشاء تقريبا وفركتو متل البيلينج وبلش تحت الابط يتفتح
استعملت قناع اللبن والنشاء للوجه وارتحت عليه
لكن في شغلة مغلبتني هو انا اشتريت زيت لوز حلو وبحط تحت عيوني قبل النوم للهالات والتنفيخ وانتو بتقولو انه زيت لوز المر لتحت العين. انا اعمل ايه؟
بالنسبة لازدياد الوزن انا بلشت برمضان احافظ والحمدلله مر اسبوع من رمضان ونزلت 2كيلو ونصف هو انا بعمل زي ما قلتي تقريبا يا هنودة انا بفطر على حبة تمر وكوب ماء,بشرب كاسة شوربة وصحن سلطة وبقوم اصلي يعني الصلاة بالنص بتخلي المعدة تتحرر شوي والجسم بيعمل حركات وبرتاح ولما برجع بحس معدتي ملانة بس عشان ماما ما تزعل بوكل شوي من الطبخة يعني صحن زغير. بعدها بنزل على صلاة التراويح مشي بالرجلين مش بالعربية وبصلي وبروح كمان ماشية وازا جعت بعديها بوكل سلطة او فواكه
انا لازم ابلش اعالج اسوداد الركب والمنطقة الحساسة بس حاسة انه مليش قوة وحيل في نهار رمضان والليل بيمضى بسرعة ما فيو وقت ومن ناحية تانية عرسي عمالو بقرب وما بدي يروح الوقت بدون ما استغلو
شعري كمان نفسي اطولو لانه قصيتو عشان كان مقصف كتير بعد الهايلايت ومش عارفة ايش وصفات لتطويل الشعر بسرعة
اقتراحات لمواضيع:
ليالي رومانسية- اقتراحات العضوات عن كيفية عمل ليلة رومانسية للزوج
موضوع كيف تجعلين زوجك رومانسي- يعني انا بعاني انه خطيبي مش كثير رومانس وبحس انو بيصير يتمسخر-يتمهزأ بالمصري على الحركات الرومانس وهاد اشي بجرحني وبخوفني انه بالمستقبل ابطل اعمل اي شي رومانس بسبب طبعه هاد
انا اسفة لاني طولت كثير بكلامي بس كمان انا لما رح اشوف مجال اساعدكم رح اكتب الي عندي وبلكي جبتلكم اكم طريقة للاسترخاء قبل العرس وممكن احط موضوع عن الضغط الاجتماعي على العروس قبل وبعد الزواج... معا سنتقدم باذن الله
فخورة بانضمامي لكن يا صبايا
وعلى قولة النمس بباب الحارة : أهلييييييييييييييييييييييييييييييييييين بالصبايا
كتبت بواسطة سجودا للرحمن
الروابط المفضلة