صباح الخيرات على الجميلات
وجمعه مباركه ان شاء الله
((((((( المنديييييييييل)))))))


ده مش اغنيه
ده اسم غشاء خارجى لمعدة الخروف او العجل اللبانى


وبيتقدم مع المشويات زى المكس جريل او الكباب وعند الطلب بطلب


((الطرب))

وبعد التنظيف الجيد
يقطع مربعات صغيره


ويوضع بها حشوة اللحمه المفرومه
وحقولكم على طريقتى فى الحشوه
والف المنديل زى محشى الكرنب بالظبط



وبعدين شويته فى الفرن على الرف السيور
وانا سيبته فى التلاجه قبل الطبخ يومين لظروف
وكنت خايفه اطبخه لطعمه يغير
والعكس هو اللى حصل
كان طعمه لا يوصف واللحمه المفرومه كانت لوحدها كباب

وقدمتها مع طبق السلطه بتاعى المميز



وهو عباره عن اى نوع خضار عندك وانا بحب عليه البصل الاخضر ةقرن شطه
وبعد التتبيله قطع جبنه بيضه قديمه او اسكندرانى بالفلفل الاخضر













حنتكلم دلوقتى على حشوتى للطرب
وهى هى خلطة الكفته بتاعتى

1 لحمه مفرومه
بصله كبيره مفرومه
1/2 رغيف لبابه العيش الفينو
ملح وفلفل وبهارات لحمه

الطريقه
بخلط اللحمه وبقية المكونات
والعيش كان مجمد فطلعته وقشرة الطبقه الخارجيه بمقشرة البطاطس
وبليت اللبابه وقلبتها مع اللحمه
وتركتها ربع ساعه وحشيت بها المنديل


والباقى صبعتها على عصايه طويله علشان مخرومه من النص
ورصصتها فى صينيه وقطعت عليها قطع زبده

وحطيتها على النار
ولما الكفته نزلت ميتها وقبل ماتنشف عصرت ليمونه كبيره وكملت سويها وشويتها وكده بقت تمام

ملحوظه عصير الليمونه لازم تحطيها بعد الكفته ما تنزل مايتها
لانك لو حطيتيه قبل الكفته حتسيب من بعضها