استفتاء: تدخلي ولادك مدارس .............................. [الأرشيف] - منتديات لكِ النسائية

bero333

03-09-2009, 03:33 AM

السلام عليكم يا بنات

عندي سؤال مهم جدا
أرجو من كل واحدة تشارك في الاستفتاء تذكر لنا وجهة نظرها

تختاري تدخلي ابنك او بنتك

مدارس لغات
مدارس حكومية
مدارس أزهرية
مدارس أزهرية تجريبية

شوفوا بقي
انا عايزة أبني يتعلم لغات أكيد بس قبل اللغات عيزاه يتعلم دينه يحفظ القران ويتعلم أصول دينه
ففكرت كيف أجمع بين الأثنين
هل أدخله مدارس لغات و أهتم بالدين عن طريق المؤسسات الغير حكومية مثل معاهد تحفيظ القران أو المساجد أو حتي أجيب محفظة له في البيت
أو أدخله مدارس أزهرية و فكرت انه لو كان الموضوع اجباري يمكن مش يحبه و ياخده علي انه واجب و بيقضيه بعقله و بس مش بقلبه و عقله

ففكرت اني أطرح عليكم الاستفتاء ده عشان أستفيد من تجاربكم
و الله المستعان

talha_alkhair

03-09-2009, 05:24 AM

بصي أنا سمعت كلام ناس كتير بالنسبة للأزهري إن مناهج الدين عبارة حشو و مفيش روح الإسلام و هلم جرا بس أنا قناعتي الخاصة إنك لما بتختاري الأزهري بتختاري ولادك بيتعاملوا مع مين مع أولاد ناس يهمهم الدين و حاطينه في أولوياتهم أكتر من ناس بيحفظوا أولادهم قرآن علشان ما يحسوش بالذنب بس العلوم التانية عندهم أهم طبعا

يا بنتي الرك على التربية
الأزهر زمان الناس كانوا بيدخلوا أولادهم فيه علشان رخيص و بيدوا الطلبة وجبات غذائية و لأسباب ليس لها علاقة بالدين
الناس دلوقتي بتدفع ألوف علشان تدخل عيالها مدرسة أزهرية(مع اعتراضي على الألوف :( )

مروة ابراهيم

03-09-2009, 04:58 PM

بصى يا عبير انت ظروفك زى ظروفى انت عارفه فى بورقؤاد مفيش مدارس عدله انا هنا كنت مدخلاها امون السنه اللى فاتت بس السنه دى فتحت مدرسه تجريبيه مطوره مميزه هى اخده مبنى فى بورفؤاد الثانويه بنات و السنه الجايه هاتنقل مبنى جديد عند نادى سبورتنج هى مدرسه حكوميه بس بمصاريف حوالى 1150 بس مختاره طاقم تدريس على مستوى خريجى تربيه تقدير امتياز و يكون معاهم دبلومه او ماجيستير و كورسات متخصصه و عاملينلهم لبس سبورتس وير و تريننج للفن داى و كمان انهارده الناظره قالتلى ان المدرسه اللى بتتبنى فيها بسين و جيم و حاجه زى الاكاديميه حاجه على مستوى فنقلت هنا بس هاتعيد كى جى وان مش مشكله بس احسن كمان مناهجهم احسن من التجريبيه التانيه و بما انها اول سنه فالاثاث جديد و الفصول جديده اما بالنسبه للقران هاجيبلها محفظه تحفظها فى البيت ده احسن من مدرسه الازهر اللى عندنا عشان مافيهاش تعليم ووحشه جدا

سكون الخريف

03-09-2009, 06:54 PM

و عليكم السلام و رحمة الله و بركاته

أنا صوت للأزهري و هقول لك وجهة نظري

أصل العلم هو علم الدين و ده اللي الأمهات كانوا بيشيلوا أولادهم على ظهورهم علشانه و في الآخر بيلاقوا النتيجة أئمة الحديث اللي مفيش مسلم مايعرفهمش
القرءان لو علمتيه لإبنك تبقي أعديتي مقدمة بس فين باقي علوم الدين
للأسف لأن كتير مننا اتعلم تعليم عادي مالهوش صلة بالدين فبقت معلوماتنا عن الدين قشور ..و بقينا نقول على علوم الدين ثقافة دينية..حاجة ما تساعدش إنسان إنه يفهم حتى إيه الفرق بين الفقه و الشريعة .. و صدقي أنا نفسي معرفش إيه الفرق
ناس هتقول إن مش كل الناس زمان كانت بتعرف علوم الدين و مش مكلفين

أكيد صح .. بس ده لما كانت الغالبية أمية و ما كانوش أصلا بيروحوا مدارس و لا يستهلكوا 20 سنة من عمرهم في المدارس
لكن إحنا صحيناه من الساعة 7 و يمكن قبل كده و عملنا له 8 شهور و أحيانا أكتر معسكر و يلاقي نفسه بعد 20 سنة زي اللي صحى من النوم فجأة علشان يشوف لسه هيعمل ايه
لما يتسأل عن العشرين سنة دول للأسف مش هيلاقي حاجة يقولها غير "هذا ما جناه علي أبوي" لأنه حتى ماعلمناهوش طلب العلم اللي هيتسأل عنه يوم القيامة

تخيلي لما يقابل ربنا هيقوله أنا أستاذ في الكيمياء و لا الطبيعة أو الجيولوجيا أو حتى طلعت القمر.. وبعدين؟؟؟!! ده فين في الميزان
علشان يرفع شأن الأمة؟؟؟ هل دي النية اللي اتربى عليها فعلا ..و هل في كل الوقت ده خصص الوقت المطلوب لعلم الدين اللي على الأقل يخليه يؤدي فروضه صح؟طالما إنه قاريء مش أمي

لما نشيل الحمل ده من على ظهورنا نسيب ولادنا إن شاء الله في الدنيا و إحنا مطمنين إننا أدينا الأمانة قدر المستطاع و مانخافش عليهم بإذن الله

احسبي نفس حسبتك بس بالعكس
لو كان العادي مدارس بتعلم الدين و في قلة أو شيء مش منتشر بيدرس علوم و إنجليزي و كيمياء و ما إلى ذلك ..كنتي ممكن تقولي برضه انه لو كان الموضوع اجباري يمكن مش يحبه و ياخده علي انه واجب و بيقضيه بعقله و بس مش بقلبه و عقله

اللي الطفل بيفتح عينه عليه بيبقى هو الطبيعي و خصوصا إذا كنتي مقتنعة و ربيتيه على كده

لأن أكيد ناس هتقابلنا في الدنيا و يقولوا ليه و عقدتيه و طبعا يلوموا بكل الطرق الممكنة
لو انتي مقتنعة هتربيه على إن هو ده الرقي و إنه ما شاء الله كده أحسن كتير و ما شاءالله ذهنه أكبر و علمه أوسع لأن معاه اللي الأطفال التانيين بيتعلموه و كمان معاه علم الدين

قبل ما يتعرض للموقف ده من أطفال أقارب دايما حسسيه إنك بتعتزي بيه كده و إن في أطفال تانيين للأسف معندهمش الفرصة دي
حسسيه بالتميز دايما (بس احرصي إنك ما توصليهوش لا قدر الله للغرور)علشان يوم ما يقابل أي اعتراض من حد يكون من جواه مقتنع إن تعليمه هو الصح و الأصل

معلش لو كان كلامي تقيل و طولت عليكي .. بس كلامي لنفسي قبل أي حد
دلوقتي الكلام أسهل من بعد 20 سنة إن شاء الله لما يكون اللي اتعمل اتعمل خلاص و مفيش مجال للتغيير

دي وجهة نظري و ربنا يغفر لي أي خطأ أو تقصير

ربنا معاكي و يعينك و يوجهكم للخير

هندةالمغربية

04-09-2009, 01:34 AM

الصراحة الموضوع هام ومحير انا بالنسبالي بقول ان المدارس الحكومية تعتبر هيصة وزنبليطة هههه وبقول اني المدارس دي بالنسبة للناس الي لاحول ولا قوة الا لهم في مدارس حكومية تجريبية هنا ممكن نقول اني فيها حلو وفيها الوحش لكن الاغلبية عادي والمدارس دي تعتبر للناس الي دخلوهم وسط مساكين عايزين يدخلو ولادهم لغات بس مش قدرين على الغلا ده وفي ناس مستواهم العلمي في اللغات قليل هنا بقا مبيعرفوش هل يترا اولادهم مستواهم ايه في اللغة احنا في العيلة في نموذج من كدة ابن امو بتقولي مستواه انجليزي ممتاز جيت اراجع معاه مش عارف حتى who's that ويعيني في 5 ابتدائي اما النطق من غير تعليق يبقا لو هنعمل مقارنة يبقا المقرنة مابين الحكومي نختار التجريبي بالنسبة للازهر في كمان نموذج في العيلة ام خريجة ازهر عيزة في نفس الوقت ابنها يكون ازهري ويواكب العصر بالغات كانت الطامة الكبرى لنو الازهر بيدو مواد اسلامية اشي عقيدة وقران وعبادات ويييييييي والطفل مش لاقي حتا يتنفس وتلاقيه مش مركز في حاجة بيحفظ وسلام وطبعا ميغريكيش ازهري لغات مهما كان فهما بركزو اكتر على القران فقط اما المدارس اللغات فبالنسبالي هي الافضل لانها تواكب العصر هنا بقا هيبقا عندنا اختيار اما ازهري او لغات لو انا في محلك هختار لغات ليه بقا طبعا لو اخترت ازهري هطر ادخل ابني كورسات لغات وممكن من كتر المنهج الازهري مش هيقضر يكمل معاكي الافضل لغات لانها لغة العصر لكن احنا عيزين ابننا ندرسو في ازهر علشان تربية مش علشان عيزينو يبقا شيخ جامع او اي حاجة من كدة المهم نختار ونتوكل على الله لغات وطبعا مش اي لغات مدرسة تخلي الام مرتاحة اوي في المذكرة يعني تدي قلبة وقومة في المدكرة علشان تتفرخ للتربية الدينية لابنها مثلا نبتدي مع العيل خطوة خطوة في تحبيب الدين نخليه يتسلة وفي نفس الوقت يستفاد اسيبو يتفرج على كرتون ديني ونا معاه اتفرج كمان ومافيش حاجة لو اشركو وفي الخر اقولو شفتي الحكاية دي موجودة في القران ايه رايك اورهالك وتروحو مع بعض وتقروها في القران وخطوة خطوة تحبيه في القران غير قصص الحيوانات والانبياء طبعا اخونا عمرو خالد مش سايب حد ميتعلمش نستفاد من قصص القران الي بيديها وبعد كده هيجي وقت القران وطبعا الولد عايز قدوة في البيت هنا بقا هتحسي اني الاولاد الي بربونا مثلا عندك قصة اليوم الصدق ونتي بتعلميه الصدق هتحسي انك مراقبة منو كلي ساعة هيقلك حرام الكذب يا ماما هتطري نفسك تعملي كنترول على نفسك ومش هتقضري تقوليلو قول لطنط ماما مش موجودة لنو هييكسفك وقوليك كدا عيب كدب وهكدا وده كويس الدنيا تربية وليه لاء انا لو ابني رباني دنا اكون ممتنة ليه كمان لو مقدرتيش تكوني قدوة ليه اخترعي لو قدوة في الحياة مثلا جيبي قصص لبنتك لاسماء بنت بكر الصديق وشوقيها في قراءة واحكلها كانت ازاي اختاري قدوة مش دينيا بس لاء يكون جامع كولو على بعضو تحسي اني الولد بعد الحكاية عايز يقلد ويارب يخللنا ويحفظلنا ولادنا
حضرتك متطرقتيش لمدارس الراهبات لو حد مسلم وعايز يدخل ابنو لمدارس راهبات يعمل ايه فيدونا يا امهات ويا مربيات

مروة ابراهيم

04-09-2009, 05:06 AM

بصى انا اعرف ان المدارس المسيحيه بتوحى فلوسها للكنيسه غير كده بعض المدارس بتعمل صلاه للمسيحيين فى الطابور و الفصول معلق فيها الصليب كمان الطفل بيطلع ولاؤه لهم كبير فعشان كده مش بفضلها و ان كان الانضباط فيها كبير على فكره انا لما قلت حكومى تجريبى عشان انا من نفس البلد اللى فيها صاحبه تاموضوع طبعا اللغات احسن بس احنا عندنا مدريه واحده بس لغات و بعيده عن بيوتنا بنضطر نركب لها معديه و ده فى الشتا صعب على الاطفال كمان مصاريفها عاليه جدا طب ليه اذا كنت اقدر احصل على نفس المميزات فى التجريبى انا بنتى كانت فى خاصه و حولتلها للتجريبى اللى جنب بيتنا

lolymd

04-09-2009, 11:57 AM

أنا رأيي أن الطفل لازم يكون حابب المدرسة اللي هو فيها وعلشان كده لازم المدرسة يكون فيها أنشطة كويسة بجانب الدراسة علشان الأولاد ميملوش منها وده موجود في بعض المدارس الأزهرية لكن فعلا غالية جدا
أنا كان نفسي أدخل بنتي مدرسة تاجان مثلا بس لاقتيها ب 12 ألف جنيه قلت وبعدين لما ربنا يكرمني ويبقى عندها أخوات تانيين واجي أدخلهم مدرسة هيبقى كتير أوي
علشان كدة قلت أخد حل وسط أخل بنتي مدرسة لغات وتكون إسلامي ويكونوا مهتمين بالدين وفي نفس الوقت باللغة علشان مكنش قصرت معاها في حاجة (أرجو هذا من الله)
أنا دخلتها مدرسة النزهة اللي في طريق مصر الاسماعيلية

bero333

04-09-2009, 04:37 PM

يا حبيباتي أنتم أحلي اخوات انا فعلا استفدت كثييييييييييييييييييير من ارائكم و فعلا المدارس اللغات أفضل عشان يطلع يواكب العصر لأن عندي ناس في العائلة أزهر و لكنهم لا يفقهوا يء و لما أسألهم انتم مش دارسين الكلام ده؟
يقولوا ايوة بس امتحنا و السنة خلصت خلاص
معاكم حق الدين ممكن يدرس خارج المدرسة أما اللغات و المواد الأخري صعب جدا

مروة انا هأبعتلك علي الخاص رسالة عشان أشوف حكاية المدرسة الجديدة اللي في بورفؤاد دي و ليه هتعيد كي جي وان؟
يعني المفروض ان مؤمن يروح كي جي وان هناك؟
هو في الفيروز زي ما انتي عارفة

قطرة ودق

05-09-2009, 08:25 PM

مدارس حكومية
هيك تربيت هههههههه
اكيد انا ما بحبها بس مجبوره هههههههه

هندةالمغربية

06-09-2009, 05:44 AM

ازيكو يا بنات انا امبارح للامانة سالت ام مدخلة ابنها ازهري لغات وحاولت اناقش معاها نفس الموضوع وقلتلي على حاجة مفكرناش فيها احنا خالص هي انها مش عيزة ابنها يكون فاشل في العربي وهي لغة الام عيب لدا مدخلتهوش لغات دولية وهو بيدرس رياضيات وعلوم بانجلش بس في مواد تانية عربي ازهرية وفي لغة عربية يعني مش ممسوحة خالص وقلتلي انها بنت فكرتها من زوجها لنو بيشتغل في فودفون وبشوف في توظيف بيطلبو وبركزو على عربي وانجلش يعني في ناس تقولو اكتب رسالة للمدير بالانجلش مبيعرفش بيحتار في الشركة بيطلبو اجادة اللغة العربية والانجليزية تحدث وكتابة وقالي انو بعدين في سن الاعدادي هيودي ابنو يعمل كورسات انجلش وصراحة حيرني خصوصا اني انا عزة اودي بنتي لمدرسة راهبات عجباني اوي وخيفة قلي لاولاد بيبقا ولاءهم للدين المسيحي انا مش عرفة اعمل ايه

loblob

12-09-2009, 06:42 PM

انا رأى ادخلهم راهبات لانها بجد تعليم ممتاز للالتزام واللغه وفى البيت اجيب ليهم محفطون قران لان للاسف الازهر كل اقاربى فيه ولا يعلمون شىء فى الدين ولا اللغات فلا انصحك بيه وشكرا

talha_alkhair

13-09-2009, 01:49 AM

أرجو أن تقرأوا هذا المقال يا أخوات و يا هندة بالخصوص علشان انتي سيدة فاضلة

http://www.zilalwarefa.net/?p=308

عاشقة فهدها

13-09-2009, 02:06 AM

بسم الله ابدأ : السلام عليكم ورحمة الله
انا ادخل اولادي مدارس لغات اولا للعلم والفائدهـ
وثانيا لمواكبة سير المجتمع وثالثا حتى يحصل على مجال وضيفي مميز
طبعا بالشهادهـ بما ان بهذا الوقت لابد من التميز والحصول على الحاسب واللغه الانجليزيه
ورابعا انا ام اتمنى افرح فيه باعلى المراتب لمايجيني عندهـ لغات ويقدر يتعامل مع كائن من يكون
وبالنسبه لامور دينه انا بالبيت ازرعها زراعه في دمه بالتربيه والنشئ منذو نعومة اضافره
اعلمه مبادئ الاسلام واعلمه اركان الاسلام والصلاة واحثه على التمسك بدينه فأنا مدرسه
ارسخ فيه دعائم ديننا الحنيف من البيت لربما يكون معلمه اجنبي او معلمته لا اسلم طفلي
للاجنبي يعلمه امور دينه وسامحوني على الاطاله

هندةالمغربية

13-09-2009, 08:07 PM

أرجو أن تقرأوا هذا المقال يا أخوات و يا هندة بالخصوص علشان انتي سيدة فاضلة

http://www.zilalwarefa.net/?p=308

مادا عساني ان اقول مش عرفة مالي هل يترا لاني انسانة حساسة جدا كل ما يمدحني حد عيني تدمع ليه والله مش عرفة اشكرك جدا يا طلحة
مادا عساني ان اقول وانا ارى ادبك وحسن اخلاقك متجسد في كلماتك وردك الجميل وان دل عن شيء فانه يدل على ذوقك والله انا كلمة الطيبة تؤثر فيا جدا لدرجة رديت على الموضوع قبل مشوف كمان الرابط الي حضرتك بعتيه اشوفو وردي عليكي شكرا شكرا مرة تانية على كلمتك الطيبة

هندةالمغربية

13-09-2009, 08:28 PM

بصي بعد مقرات موضوع عيزة اقول للعضوات حاجة مهمة انا صحبتي مغربية مقيمة في فرنسا ومشاء اله عليها متدينة وعندها بنت وولد بس مش قدرة تعد في فرنسا بسبب اني ولدها بيلقطو اوي منهم والدولة هناك محتقراهم خصوصا لنها عملة نقاب ودلوقتي بتقرر انهم يدخلو مصر ويعيشو فيها علشان في مصر مدارس ازهرية وبتقولي على لشي شفتو ميهماهاش لغات ولا حاجدة المهم الدين رغم انهم عيشين عيشة رفاهية ولما هتيجي المصر هتغامر وهي مستعدة لدلك مدام عيالها في حمى الرب لدرجة لما دخلت بمتها الحضانة حست انهم بيفرضو عليهم الدين وتقاليدهم ولبنت بقت تقول حاجات مينفعش تتقال وانشاء الله الشهر ليجاي هستقبلها

أم ملـك

24-09-2009, 12:46 PM

السلام عليكم إخوتي في الله

مدارس الراهبات ما هي إلا كنائس مصغرة تزرع في نفوس الأطفال بطرق غير مباشرة الولاء للمسيحية وهم عرفوا يسوقوا لأنفسهم جدا ويكونوا سمعة عنهم: تربيتهم أحسن وأخلاقهم أفضل وإنهم جاديين وملتزميين أكثر فهم فاصلين مدارس البنات عن البنين... ونحن المسلمين متناسيين إن هذه مبادىء ديننا الحنيف وإذا قلنا امنعوا إختلاط الفصول...رد عليك أحد من المتفلسفين: هذا تخلف بل يجب ان يختلطوا معا ...سبحان الله يفعله الغير مسلميين فننبهر بهم ونريد أن نسير خلفهم... وينادى به المسلمون الملتزمون فينهالوا عليهم بالسب؟!!! ليس من قلة المدارس الإسلامية أدخل عيالي مدارس مسيحية... سوف نحاسب عليهم

الملوك كانوا يعهدون إلى العلماء حتى يربوا أبنائهم على دين الإسلام..فسبحان مغير الأحوال

أختي الحبيبة... كلنا لابد أن تكون نيتنا هي الزواج من زوج صالح لإنجاب ذرية صالحة نربيها على مايرضي الله ورسوله وننفع بها ديننا ... ولا أقول أن كل اولادنا يصيروا شيوخا وعلماء دين فقط بل المسلمين بحاجة للطبيب والمهندس المسلم المخلص لله الذي يتقي الله في عمله ويفيده المسلمين... فجددوا نياتكم وأخلصوها لله

المدارس الحكومية: الدراسة بالعربي ، وهي خيار جيد لمن لا يملك مصاريف التعليم المتميز والحمدلله إنه متاح للغير قادرين فهو أفضل من عدم تعليمهم بالمرة.

المدارس التجريبية: هي حكومية مميزة الدراسة بالإنجليزي مع زيادة المصروفات ، وهي للقادر عليها نسبيا ولكن عيبها إنها تقبل من سن كبير (كي جي1 من 5سنين).

المدارس اللغات: ممتازة خلقا وتربيا وتهتم بالأنشطة والترفيه مع الدراسة الممتازة ولكن عليك حسن إختيار المدرسة ولكن طبعا مصاريفها غالية، ومنها انواع:
لغات إسلامي: تحفظ الطلبة القرآن (10 اجزاء من كي جي - ثانوي) - تفصل البنين عن البنات - تعلم الطلبة الصلاة في اوقاتها جماعة - تحفظهم الحاديث والأذكار وفيها الطلبة يتعلموا اللغات في جو إسلامي شرعي ولكن بعض المدارس تشترط السن الكبير...مثل منارة الفاروق الإسلامية بالتجمع الخامس.
أزهر لغات: هي مدارس أزهرية (ليست مثل الأزهر العادي القائم على الحفظ والرص) والدراسة باللغه الإنجليزية أو العربية ولا ينجح فيها إلا الطلبة الذكية الممتازة فالدراسة فيها ليست سهلة، لكنها مثل مدارس اللغات ولكن يضاف اليها اللغة وهذا مطلوب في زمننا فنريد العالم المتعلم الذي يهدي به الله الغير مسلمين من الغرب...مثل: مدرسة تاجان - الغد المشرق - معاهد البخاري بالتجمع الخامس
اللغات - الدولية: ممتازة ولكن عيبها الإختلاط ... وأن كان في مدارس عاملة مدرسة للبنات فقط : مدرسة المصرية للغات-بنات (أبنتي فيها) ومدرسة فيوتشر بحي السفارات والرحاب، وفيها طاقم التدريس نساء ولهم إدارة ومدخل خاص لهم خالي من الإختلاط.

تجربتي الشخصية: الحقت ابنتي بمدرسة لغات للبنات (من اجل العلم وايضا يقبلوا السن الصغير) ولكن حريصة على حفظها للقرآن في دار لحفظ القرآن (حفظ-تفسير) بالإضافة أنها ممكن أن تتعلم امور الدين الشرعية لما تنهي الجامعة فالحمدلله على عصر التكنولوجيا والأنترنت والقنوات الفضائية أصبح العلم الشرعي سهل الحصول عليه وكذلك إنتشار الجامعات المفتوحة مثل الجامعة الامريكية للدراسات الإسلامية والجمعيات الشرعية التي تمنح بكالوريوس وماجيستير ودكتوراه او بحضور دروس العلماء أو بالقنوات الفضائية الإسلامية مثل: قناة الرحمة - الحكمة - الناس - مكة - الخليجية .

خيرزاد

01-11-2009, 11:58 PM

جزاكم الله خيرا انا استفدت اكتير
جزتكى اله خيرا ام ملك عالفائده

أم سهيل هيثم

03-11-2009, 05:01 PM

أنا أعمل في المدارس الحكومية وأفضلها على الخاصة احنا ملناش المدارس الأزهرية ومع ذلك أحبذ الأولى الخاصة ماهي إلا مظاهر تجري وراءها الناس والنتائج دائما تكون من نصيب الحكومية والتلميذ في أي حال من الأحوال صار لازم يأخذ الدروس الخصوصية فلما ألجأ للثانية وفي الخصوصية يعتمدون اللغات التي تفقد الطفل اللغة العربية صدقوني فأنا أتكلم من حيث تجربتي في الميدان فابني الآن في تحضيري إصلاح وإرشاد رائع في الآداب الإسلامية واللغة العربية ولما يصير يأخذلغات نعمل دروس خصوصية و هكذا يحتك بكل أفراد المجتمع يؤثر ويتأثر وهو محصن إنشاء الله بالتربية الدينية و ناهيك عن المتابعة اليومية في كل المجالات وهذا هو المطلوب

صابر العموش

27-02-2010, 05:25 PM

واله اللي قالت المدارس الخاصة مظاهر انها صادقة ، واشد على ايدها والله مصروف عالفاضي

ياسمين العايدى

01-03-2010, 06:05 PM

ممكن نبقى واضحين و صريحين..

الموضوع انت هدفك ايه؟
بتربى اولادك لله و رسوله ام لدنيا يصيبوها؟

طبعا احنا عارفين ان الاهتمام الاكبر بيكون باللى بندرسه فى المدرسة يعنى نجاح و سقوط يعنى مجموع و مستقبل..و اللى بره ده بيبقى نشاط.

و بصوا للواقع .. الدراسة و المناهج صعبة و طبعا فى اللغات بتبقى اصعب الولد يا دوب يرجع من المدرسة و يتغدى و نبدأ فى الواجب و المذاكرة و يحين وقت النوم هو ده الواقع مفيش وقت تانى انه ياخد درس تحفيظ قرآن الا فى الاجازة مثلا او درس علوم شرعية اللى هى فرض عليه و على كل مسلم انه يتعلمها .

بنغرس فى اولادنا من صغرهم ان القرآن و الدين شئ ثانوى بعد اللغة و الدراسة يبقى يدرسوه فى وقت فراغهم.. ده لو فيه.

و مين اللى قال ان اللغات لا تُتقن إلا فى المدارس اللغات؟

و بعدين التقدم للوظايف مبيبقاش بمجموعة اوراق و شهادات فقط لأ بتبقى بمقابلة شخصية بيستشف فيها مستوى المتقدم للوظيف علميا و معمليا فى تخصصه و كذلك اجادته للغة لو مطلوبة سواء فى الحوار او يطلبوا منه يكتب حاجة و كذلك شخصيته. يعنى من نصيب المجتهد سواء كان خريج لغات او غير لغات . ده طبعا لو مفيش وسايط و كوسة.

انتوا مش واخدين بالكوا من حاجة؟
ان احنا مستعمرين..
مستعمرين فكريا و اقتصاديا ..

لو فيه دولة اجنبية استعمرتنا دلوقتى هتعمل ايه بعد ما تمص خير البلد؟ هتنشر لغتها و تستبدل اللغةالام بها علشان تزرع ثقافتها و تمحو هويتنا الاصلية.
و احنا بنجرى علشان نعلم ولادنا فى مدارس لغات .. و فى جلساتنا و حواراتنا اللى تلاقيه بيحشر كلمتين انجليزى فى وسط كلامه نحترمه اكتر و نعتبره مثقف و مواكب للعصر و اللى بيتكلم بالفصحى يبقى مش و لابد ..على قد حاله كده.. و رجعى و متخلف و مش بعيد يكون ارهابى لو ملتحى .

" اعلموا أنما الحياة الدنيا لعب ولهو وزينة وتفاخر بينكم وتكاثر في الأموال والأولاد"

و احنا بنربى ولادنا علشان كده .. هدفنا..
يبقوا فى وظايف حلوة و معاهم فلوس و يعيشوا مستريحين
و يبقوا مرموقين نتفاخر بيهم قدام الناس

اللى عاملين نفسهم متدينين و هم فى منتهى الكسل و الخمول و متواكلين دول منبصلهمش اساسا.
لكن فيه النماذج الصح اللى هدفهم رضا الله و رسوله و علشان كده بيتقنوا عملهم و بيجتهدوا ليكونوا نماذج للمسلمين الاقوياء فربنا بيديهم الدنيا مش علشان هى هدفهم لأ.
و لو مش شايفين النماذج دى يبقى مسئوليتنا ان احنا اللى نبنيها.... مش نبقى كالقطيع مجرد امعات نتبع اى ناعق.

"من كانت الدنيا همّه ، فرّق الله عليه أمره ، وجعل فقره بين عينيه ، ولم يأته من الدنيا إلا ما كُتب له ، ومن كانت الآخرة همه ، جمع الله له أمره ، وجعل غناه في قلبه ، وأتته الدنيا وهي راغمة"

المؤمنين الدنيا فى ايديهم مش فى قلوبهم .

تحياتى للجميع

ياسمين العايدى

01-03-2010, 06:46 PM

مدارس اللغات المصرية والوهم الكبييييييييييييييير

أعزائى أولياء الأمور
لو ولادكم فى مدارس لغات – أو لو بتفكروا تدخلوا صغاركم مدارس لغات – إنجليزى أو فرنسى – عايز أسالكم سؤال
ليه؟ إيه اللى خلاكوا تفكروا فى كدة؟؟

مدارس اللغات فى مصرية مهزلة تعليمية – الوزارة ببساطة بتجيب الكتب المدرسية العربية وتعطيها لمترجم يترجمها من اعربية الى الإنجليزية أو الفرنسية
وعشان الأب أو الأم يساعدوا ولادهم بيشتروا كتب خارجية عربى عشان يترجموا الدروس ويفهموها لولادهم
هييييييييييه – بقينا إحنا كدة بقى متقدمين؟؟؟؟؟؟؟؟
يعنى ودنك منين ياجحا
مين بيضحك على مين هنا؟
المدارس بتضحك على أولياء الأمور؟ وللا أولياء الأمور بيضحكوا على ولادهم؟ وللا الوزير إنبه إخواته ومعجزة زمانه بيضحك على الجميع؟ طب ماهى المناهج العربى زفت – وبتجيب للولاد تخلف عقلى ولمباجو – نقوم نروح نترجمها ونديها لولادنا بعبلها وبسلطاتها وبابا غنوجها؟
والآسم إيه – الولد بيروح مدرسة لغات .. والبنت جاية من مدرسة لغات
طب ماهى هى هى المناهج المتخلفة – وهو هو اللت والعجن والشرح المتخلف والأخطاء العلمية واللغوية – بس زودنا عليها أخطاء المترجمين الضحكة – يافرحتى
حرام والله اللى بتعملوه فى ولادكوا ده
بتصعبوا الأشياء عليهم وطلاسم وزارة التربية والتعليم بتضاعفوها عليهم على يد مترجمين غير محترفين
ده حتى الإمتحانات فى الشهادات – الإمتحان بينحط فقط باللغة العربية وبعدين يبعتوه لمترجم بلدى يترجمه مرة بالإنجليزى ومرة بالفرنساوى – وكان الله بالسر عليما
ضحك على الدقون على أعلى مستوى
وحضراتكم بتشربوا كلكم المقلب بمنتهى الشياكة – لأ وإيه – بتكع يابطل مصاريف خيالية لمدارس اللغات – وباص رايح وباص جاي – وفى النهاية ولادكم بياخذوا نفس المنهج اللى فى المدارس أم أربعة جنيه فى السنة – بس بالإنجليزى يامرسى
أنا أفهم أن تعطى مدارس اللغات المناهج الحديثة المطبقة فى بلد اللغة الأم – إنجلترا – الولايات المتحدة – سنغافورة – حيث التعليم والكتب متعة ثقافية بلا حدود
لكن اللى بيحصل من عشرات السنين فى مصر شيئ ماسخ لامعنى له ويجب أن يدرك أولياء الأمور هذا الإستغفال الوزارى الرسمى الذى لايقابله مستوى مناظر من التخلف العقلى فى أى مكان آخر على كوكب الأرض – إلا هنا – فى أم الدنيا كلها وستها وتاج راسها كمان
.
عزيزى ولى الأمر – إبتسم للكاميرا – أنت فى مصر – هيييييييييييييييييييه

نصيحة للى اختاروا الدنيا.. متدخلوش ولادكوا لغات دخلوهم مدارس اجنبية احسن

رأى منقول

SALMA2003

10-03-2010, 10:30 PM

ياسمين ما شاء الله عليكى فعلا عندك حق فى كل اللى قولتيه
للاسف معظم الاهالى الا من رحم ربى بيدخلوا ولادهم مدارس لغات لمجرد التفاخر والتباهى بان ابنى فى مدرسة كذا وكل ما كانت المصاريف اغلى كل لما كان التباهى اعلى واكبر
وباشعر بحزن شديد لما الاقى امهات ومتدينات كمان وبيخلوا ولادهم يتكلموا معاهم حتى فى البيت بالانجليزى ويا حبذا لو قدام الناس لمزيد من الفشخرة وكأن التحدث باللغة العربية لغة القران سبة وحاجة متخلفة
انا اعرف ان الاولاد يتكلموا باللغة الانجليزية فى حصة اللغة
لكن بره الحصة ليه اتكلم انجليزى ليه ما اتكلمش لغة بلدى والنتيجة ايه
بتلاقى الاولاد للاسف طالعين ما بيعرفوش لا يتكلموا ولا يكتبوا عربى كويس

انا نفسى اعرف هل فى بلد زى انجلترا او المانيا بيعملوا كدة بيغلبوا اللغة التانية على اللغة الام
يعنى الالمان داخل بلدهم هل بيتكلموا بالانجليزى مع انهم بيبقوا عارفينه كويس والا معتزين بلغة بلدهم وبيتكلموا بيها
اشمعنى احنا مش معتزين بلغة بلدنا لغة القران الكريم
ولا حول ولا قوة الا بالله

doma

16-04-2010, 03:07 AM

كلامك حلو ياسمين وسلمى انا فعلا محتاره من دلوقتى وياريت توضحوا رايكم في اي المدارس احسنا بعد اللغات للفائده

talha_alkhair

18-04-2010, 05:05 PM

ام ياسـ مريوم ـر

26-05-2010, 07:09 AM

لو اتيحت لي الفرصة اختار مدرسة تعلم الدين واللغات مع بعض

أودي

29-05-2010, 07:57 AM

بصوا ياجماعه انا مش هتكلم كتير بس هقول ما قل ودل وده اللي بيخليني اقبل على الازهري اللغات... مع ان ابني في مدرسه لغات اسلاميه نوعا ما

قال الله تعالى "وما خلقت الجن والانس الا ليعبدون" ومعنى هذا العباده مهمه وضروريه ويجب ان تبنى على العلم ... وهذا ايضا لا ينفي اهميه العلم الدنيوي الهام لتقدم الامه ورقيها ونكون ساهمنا في اثرائها وارتفاع شأنها العلم في حد ذاته ... ان نربي ابنائنا على حب العلم والتعلم بما يخدم عقيدته ودينه ومجتمه بما يؤدي في النهايه ان يتعلم العلم الدنيوي والاخروي ليدعم عبادته ويرقى بها ...

ومقوله اخرى اثرت في "الدين غايه وليس وسيله" انما اللغه "وسيله لخدمه الدين وليست غايه"

الازهري انا حسه اتغير تماما تماما عن زمان بدليل اللغات والمدارس على احسن مستوى متسئلوش خرجين قدام لان النظام الجديد مستحدث وجميل تخيلي ابنك في بيئه اسلاميه وسط اصحاب الخير مش هقولك كلهم 10 على 10 بس الاغلب ... هتبقى مطمنه عليه اد ايه والمدارس كلها بلا استثناء فيها الكويس وفيها الوحش وفيها الفظيع الذي لا يقبل فكروا كويس انتوا عايزين ايه وجهي طفلك وجهه صح لان الله هيسألنا عنهم يوم القيامه وهيسألهم "عن عمره فيما افناه" هل افناه في التعمق في دين الله والعلوم الاخرى ام سار كالجميع مدارس لغات وصدقوني كتير الا من رحم ربي بيتخرجوا بردوا من مدارس لغات ومبيعرفوش كتير بالضافه الى الحريه الزائده التي لن تكوني على علم بها في معظم الاحيان لانك مش معاه 8 ساعات في اليوم اللي بيقضيها في المدرسه ... انا هدفي اني اخليه يتكلم انجليزي كويس طيب مهو هيتحقق في مدارس الازهريه لغات

اللي شجعني اني ابحث في الازهري اللغات ... لغه عربيه احسن من اللغات بميت مره ويشتهجى من كجي 1 لاني لما شفت مدارس ازهري قالولي ابنك اضعف في العربي وفعلا انا حساها لانه مفيش وقت اذاكرله الاثنين فكنت طبعا بهتم بالانجليزي وجه على حساب العربي وبيحفظوه قران في مدرسته العاديه ولكن طبعا فيه ضعف واضح في الحفظ في المدرسه فبردوا كنت بحفظ ... وبردوا كنا مش بنلحق نخلص الحفظ فقلت اركز وانتبه ده مستقبله وربنا يحفظه ويرعاه وشكرا حبيبي انا قلت مش هتكلم كتير بس رغيت اهو وصدعتكوا ولي عوده ان شاء الله والله الموفق

shaimaa 78

11-06-2010, 01:43 AM

السلام عليكم جميعا
انا قرأت كل ارائكم واحب اعلق على المدارس الازهرية
انا خريجة الازهر وما ادراكم المدارس الازهرية
الابتدائى عباره عن كتاب مفتوح طول اليوم وحفظ كتاب الله بدون تجويد بجانب المواد الاخرى

الاعدادى عبارة عن المواد الاساسية والرياضيات والعلوم والدراسات
العربى يتقسم مادةنحو وصرف مادة وبلاغة مادة مطالعة ونصوص
الدين ينقسم القرآن الكريم مادة السيرة مادة الفقة مادة التوحيد مادة التجويد
كل مادة ليها امتحان منفصل والقرآن شفوى وتحريرى

الثانوى عبارة عن كل مواد الاعدادى اضافة مادة التفسير ومادة النحو ومادة الصرف تنقسموا الى اتنين ومادة الادب ومادة النصوص ومادة الميراث
بجانب المواد الاساسية الكيمياء والفيزياء والاحياء والجبر والتفاضل والتكامل والانجليزى لا يوجد لغة تانية
يعنى وانا فى الثانوية كان عندى للعربى 5 مواد بامتحانات منفصلة
الدين بجانب اجزاء القرآن 6 مواد منفصلة بامتحانتهم
العلوم الاخرى الاساسية والمشتركة بينى وبين التربية والتعليم 6

المجموع حوالى 17 او 18 مادة فى الثانوية العامة

وطبعا الغش وسيلة متاحة وكل طالب ازهرى يعلم ذلك فى امتحانات النقل يدخل الاستاذ ويغشش
فى الشهادات لأ لذلك تلاقى 1/3 المعاهد لم ينجح احد .... بس الطريقة البديلة اللى لية معارف الازهر بيجيلوا بعض اسئلة الامتحان فى بيتة

هل تعلموا ان شهادة الازهر غير معترف بيها فى التربية والتعليم يعنى لو حبيتى تنقلى ابنك من الازهر لتربية وتعليم لازم قبل سنة 6 ابتدائى ... لو بعد كدة مايقبلهوش

هل تعلموا ان طلبة الازهر مش من حقها وممنوعة من القبول فى اى جامعة حكومية

لكن الازهر كل سنة بيملى كلية ترجمة فورية من طلبة التربية والتعليم لانة معترف ان طلبة الازهر لا يفقهوا اى شىء فى اى لغة وليس عنده غير الانجليزى فقط
لكن الفرنساوى وباقى اللغات مانعهم وفاتح بيهم اقسام للتربية والتعليم

طبعا مبدأ الاهالى ادخلة ازهر عشان رخيص وكمان يدخل جامعة
عشان الازهر معندوش حكاية مجموع الاعدادية عشان تخشى ثانوى

كفاية بلاش غم اكتر من كدة عشان انا بزعل على سنين عمرى الى قاضتها فى المكان ده ....

انا دخلت ابنى مدرسة لغات اسلامية الحمد لله رب العالمين احسن من الازهر بكتييييييييير
لانها بتعلم مكارم الاخلاق اللى الاسف غير موجود فى الازهر
وبتعلم الدين الاسلامى الصحيح ....
ودى كانت تجربتى ارجوكم فكروا 100 مرة قبل مادخلوا اولادكم الازهر

rania 9

11-06-2010, 11:34 AM

كلام الأخت ياسمين صحيح جدا نظريا و لكن للأسف الجانب العملي عليه حمل كبير جدا

أنا مقتنعة مية في المية إن الأمل في تعريب العلوم بوجه عام و لكن في حاجات كتير مش في إيدنا بتاتا

للأسف أنا لما بدخل أولادي مدرسة لغات مش فشخرة و لا حب في لغات الغير أو تفضيلها على لغة القرآن
أنا حاليا أختار الشريحة اللي بيتعامل معاها أولادي
شوفي مدارس الحكومة شكل الطلاب فيها عامل إزاي و المدارس الخاصة عاملة إزاي
أنا كنت في مدرسة إسلامية و مش لغات بس مستوى رفيع شوفي أخلاقيات الطالبات عاملة إزاي

حاليا مجبر أخاك لا بطل بختار الشريحة اللي بيتعامل معاها أولادي
اللي بيتعلم منها الألفاظ اللي بيقولها
أما المدارس العالمية فطبعا مصاريفها فوق الطاقة و لازالت مشكلة الشريحة قائمة فالشريحة لما تبقى أعلى ده شيء برضه مش صحي
للأسف إحنا مش محتاجين كلام إنشا و آراء غير واقعية إحنا عايزين تغيير فعلى
آه ممكن نقول التغيير حيبقى برفضنا للأمر المفروض علينا و السباحة عكس التيار
بس للأسف ده غير مجدي
العلم لايزال غربيا و المناهج الجامعية لازالت بالإنجليزي
الي عايز يحسن يعلم أولاده الاتنين ناهيك عن اللغة اللي بيدرس بيها
بس يبقى ظلم أولاده لو دخلهم مدارس حكومية أو مدارس البون الاجتماعي فيها شاسع
انتي تقريبا قلتي كل اللي انا عايزة اقوله ... الله ينور عليكي ..... حاضيف حاجة صغيرة غير ان التعليم في الجامعة بالانجليزي و انا شوفت بعيني ما حدش قاللي ازاي الطلبه اللي كانوا في مدارس عربي تعبوا اوي في اول سنتين في الكلية بسبب اللغة .... كمان جيل ولادنا لما يتخرجوا حيبقى في عدد كبير خريجي لغات و حيبقى فرص العمل متاحة اكتر لخريجي اللغات لان طبعا اغلب اصحاب الاعمال و الشركات الكبيرة و المدارس الكبيرة ( اللي من الاخر بتدي مرتبات عدلة ) اكيد حيفضلوا خريج اللغات في التوظيف عندهم فكده ولادنا ممكن يلوموا علينا في يوم من الايام لان مش حيكون فيه تكافؤ فرص بينهم و بين غيرهم..
.. انا عارفة طبعا ان الارزاق بأيد الله لكن احنا بناخد بالاسباب ... علشان كده انا حانقلهم السنة دي من مدرستهم اللي اسمها بيدعوا للفشخرة و العوجان لمدرسة لغات اسلامية لسه جديدة و مستواها في اللغة اقل بس انا عايزة احاول اوازن بين الدين و اللغة ... و صدقيني لو لقيت مدرسة IG و اسلامية و مصاريفها اقدر عليها حانقلهم من بكرة علشان زي ما قلتي مناهجنا عقيمة بس احنا للاسف بنختار من المتاح يعني احسن الوحشين ..
و ادعو الله انه يوفقني لما يحب و يرضى و يعيننا جميعا على المسؤلية العظيمة اللي حنسئل عنها يوم القيامة