السلام عليكم ورحمة الله و بركاته
اليوم ان شاءالله حقدم الكو 3 من اطباقي اللذيذة .... بمناسبة قرب العيد قلت اعمل فيكو خير يعني و احن عليكو بابداعاتي
اول طبق اخدته قبل عدة شهور وطبقته مرارا وتكرارا لانه جدا شهي ومختلف
روعة
هية صاحبة الموضوع مسمياها كبسة بالحشوة بس هية غير عن الكبسة العادية تماما
نبدأ بسم الله ... انا ماحقول مقادير معينة لانو كلها تقديرية حسب كميتك و زوقك في البهارات
أولا ::: نحتاج دجاج مسلوق ومرقته ولسلق الدجاج تضيفي مطيباتك الخاصة و البصل ويعني طريقتك المعتادة في سلق الدجاج
ثم تنزعلي الجلد والعظم من الدجاج و تقطعيه بايدك
ثانيا ::: لتحضير الحشوة
تحتاجي ثوم وبصل و مكعب ماجي و بهارات وفلفل اسود و فلفل اخضر حار وفلفل رومي ( اخضر حلو) و زيت نباتي وجزر مبشور
في مقلاية تضعي البصل والثوم مفروم ناعم و تقلبيهم بالزيت بعدين تضيفي الفلفل المفروم ناعم والفلفل الحار حسب مترغبي وانا طبعا ازوده لاني بموت في الحار .... والضحية زوجي
بعدين بتقلبيهم وبس يدبل بتضيفي الجزر المبشور وتقللبي وتضيفي البهارات و الفلفل الاسود و تضيفي بعدين الدجاج المقطع وتقلبيهم جميعا حتى يتمازجو و يتسبكو وتصبح بهالشكل ... سامحوني اضاءة المطبخ كانت خربانة اللمبة التانية مش راضية تفتح الصورة مش كتير واضحة
ثالثا ::: الارز : طبعا ارز بسمتي الاخت صاحبة المووضوع سلقته بمرقة الدجاج ولكن انا مابحب الرز مسلوق بالمرة طريقتي المفضلة في جميع انواع الارز سواء الي عليه حشوة او غيره اني اقلبه في الزيت شوي بعدين اضيف الماء او المرقة والملح وهيك فانا عملت هيك ولكن ماتخليه ينضج عالاخر لا يعني تلات ارباع نضج يكون في نفس انو ينحط في الفرن
خلصنا... الان بنجيب صنية قابلة الادخال بالفرن بايركس او تيفال
وبتحطي سمنة او زيت ... انا بحط احيانا سمنة واحيانا زيت صحيح السمنة مش صحية بس نادر جدا م اطبخ بسمنة والعلبة تخلص تاريخها ولسة مش مستهلكة نصها لهيك لما الاقي طبخة كل وين ووين اعملها بسمنة مافي مشكلة بكمية بسيطة او الزيت يؤدي الغرض لو عندك تشدد في قصة الريجيم
بتحطي معاه كم عود قرنفل وبتحطي الصنية على النار وبتخلي القرنفل شوي يتقلب في الزيت
وبتطفي
بتحطي طبقة رز ثم طبقة حشوة ثم طبقة ارز اخيرة
وبتكوني محتفظة بنص كوب مرق من سلق الدجاج وبترشيها عليهم
وبترشي صبغة زعفران انا ماعندي فبنقع زعفران في شوية مية ورد وبترشي ... وممكن تستغني عن هالخطوة لو مش حابة
وبتحطي عالوش زبيب منقوع بمية سخنة ومقلي بقليل من الزيت اوكي وبتحطي
وبتغلفيهم بالفويل بيبر( ورق القصدير او الالمنيوم او السولوفان .... هيك اسمه بكل اللهجات واللغات )
بتحطي في فرن مسبق اشعاله عشان يكون ساخن بس بتشعلي من تحت يعني تحت الصنية وبكون هادية النار وبتخليها علبال الارز يكمل استواء ... تقريبا نص ساعة
بس تخلص
بترشي صنوبر او لوز مقلي و كزبرة خضرة ... مابعرف ليش مش بقدونس ولكن انا التزمت بقصة الكزبرة ولاقيتها طيبة ومختلفة الطعم وهليومين عندي اعجاب بالكزبرة
وكليها بالهناء والشفا
انا اقدمها غالبا مع سلطة يمنية رووعة اسمها سَحَاوِق sahaweq طعمها لزيز جدا مع الكبسات والارز وهي عبارة عن في الخلاط تحطي بندورة و فلفل حااااااار طبعا حار وكزبرة خضرة وثوم وملح و بس
وبالهنا والشفا هي صورة الطبق تفضلوووو شاركوني والله الطعم لا يعلى عليه جدا شهييييييييييييية ومميزة وشكرا جزيل وخاص لصحابة الوصفة الاصلية بارك الله فيها
الطبق الثاني ::: دجاج محشي بالفريكة + فريكة + شوربة فريكة
طبعا بتحتاجي دجاج مع الجلد والعظم وانا سلقته نص سلقة كاني بسلق جاج عادي عشان اطلع مرقة اطبخ فيها الشوربة و الفريكة ...
نحتاج للحشوة ::: فريكة منقوعة قبل بوقت و بصل و ممكن ثوم وبهارات وملح وفلفل
على النار بتحطي زيت و بصل والتوم لو حبيتي وبتقلبي وبتضيفي الفريكة المنقوعة والبهارات و الفلفل وبتقلبي بعدين بتغمريها بالمية وبتخليها تنشف ... وبهيك بتكون نضجت نصف نضوج عشان الفريكة صعبة في النضج فعلشان تحشيها وتكمل طبخ في الفرن مع الدجاجة لو من غير هالطريقة صعب حتطلع مش مستوية منيح
كمية الفريكة حسب حجم دجاجتك....طبعا الجاج بتدهني من برة وجوة بشوية زيت زيتون و ملح وبهارات وفلفل اسود بس مش اكتر وبتحشي الفريكة وبتسكريها بحذرررر لانو الجلد تعرض للماء المغلي فحيكون سهل جدا انو يتقطع فبالراحة جدا سكريها بالخيطان او العيدان
وحطيها في فرن وسط حامي وسكري عليها لغاية متحسي الدجاجة نضحت والفريكة نضجت و حمريها من فوق
لطبخ الفريكة ::: قلبت في حلة تيفال بصل واضفت فريكة منقوعة وقلبتهم بالزيت ممكن زيت عادي او زيت زيتون بيطلع كتير مختلف بالطعم ومميز ... بعدين اضفت من مرق السلق مع زيادة البهارات والفلفل ((( معلش انا مهووسة بهار وفلفل بحس الحياة من غيرهم مابتسوا )))
وخليتهم لغاية منضجت
بعدين زينتها باللوز و الصنوبر المقلي
شوربة الفريكة ::: بسيطة قلبي بصل وفريكة منقوعة واضيفي كمية مرقة كبيرة طبعا عشان هاي حتكون شوربة مش فريكة زي الي قبل وبس بتخلص وبتكون شوربة ولا اطيب
قدمتهم مع سلطة زبادي بالنعناع والخيار وكان زايد حشوة حطيتها في ورق فويل وسكرت عليهم و حطيت عليهم برضو شوية مرقة جاج وحطيتها بنفس صنية الجاج وكان طعمها كتير حلو
وتفضلووووو والله يومها تعبت واكلت من غير نفس لانو انهلكت بس كانت اكلة تستحق التعب
الطبق الثالث::: طبخة من لاطبخة له هههههههه سريعة وبسيطة وللزهقانة و مش طايقة المطبخ وبدها تسكت الافواه الجائعة عندها بدون متكون عاملة شي اي كلام
صنية دجاج بالخضار
قلبت جاج صدور مخلية ممكن اي جاج متوفر عندك مع شرايح بصل قلبته بزيت زيتون وبس تحمرت شوي حطيت معها خضار مشكلة
ذرة- جزر- بازيلا-بطاطا- كوسا ... الي عندك
واضفت فوقهم مية مغلية و بهارات وملح وفلفل اسود وسكرت عليهم بالفويل بيبر وحطيتهم بالفرن وبس استووو حطيتهم يتحمرو من فوق ومع رز ابيض او رز بشعرية وخلصصصص طلعت كتير لزيزةوسهلة وسريعة مش حكتلكو طبخة من لاطبخة له
وبس كل عام وانتو بخير ويلا انتظرو طبخاتي عالمناسبة الجاي مممم عيد الفطر يمكن ههههه لا ان شاءالله اتنشط دايما في هالقسم فاتح الشهية
دعواتكم ...
الروابط المفضلة