محتاجة لآرائكم اخواني اخواتي..ممكن؟
السلام عليكم ورحمة الله وبركاته
اتمنى ان تستمعوا لي فأنا بحاجة شديدة لأذن صاغية وليد حنونة وبارك الله فيك وفرج عليكم كرب يوم القيامة ان شاء الله
"انا بنت ملتزمة عندي 19 سنة مش مصرية طالبة
مشكلتي ابتدت من لما كان عندي 15 او حوالي 16 كده كنت لسه مش ملتزمة ولا محجبة (كنت في اولى ثانوي)
وحصل مرة اني كنت قاعدة وسط صحباتي وجيه شاب وقعد بنتكلم وكده ويانا وكان بيبصلي نظرات غريبة وطويلة
ومن يومها بقى كل يوم بيجي يوقف ويانا في ساعات البريك وكده لغاية ما بقينا اصحاب وساعات كان بيقلي من فضلك عاوزك في كلمتين ويقعد بقى يتكلم هنا وهنا (عشان عاوز بقى ايه يقربني منه ويعودني عليه وده اللي فهمت بعد ما خلصت الحكاية)
ومع الايام بقينا زي الانتيم وبقت نزرات الناس بتابعنا واتحولت الى علاقة ورسائل غرامية وكنا بنمشي سوا من البيت للمدرسة وده شيء كان غلط من وجهة نظر تربيتي وظروفي يعني بابا او ماما كانت حتبقى مصيبة لقدر الله بس ربنا ستر
بس اشهد الله اني وانا في وسط العلاقة دي كنت بتصرف بسذاجة وببراءة يعني مكنتش بعرف ان اللي بعمله ده فعلا غلط من وجهة نظر الدين اونه زي اخويا مع ان اللي في الرسايل كان غير
والعجيب ان لما بفتكر بلاقي نفسي كنت بكتب عن الحب والكلام ده كله وانا لحد دلوقت معتقدش اني حبيت حد بجد يعني لسه عمري ما حبيت
يعني دي كانت مجرد مراهقة
جيت بقى في لحظة كنت بمر بظروف إيمانية شديدة وكانت بداية تحول في حياتي كان عندي 16 سنة وكنت بسمع شرايط دينية وكنت حاسة بعذاب شديد عشان بعمل حاجة من ورا اهلي وهما اللي وثقوا في وربوني وكده
فجيت في لحظة كنت اتحجبت قلت انا النهاردة حقطع العلاقة التافهة دي لأن لا ربنا بيرضى بكده ولا حرضى لنفسي اني اخون اهلي
لأني صدقوني انا مكنتش بفكر بالطريقة دي قبل يعني مكنتش بفكر اني بخون اهلي واني بعمل حاجة من وراهم وده ممكن يكون له عواقب خطيرة لأنه بحكم تربيتي احنا من اسرة محافظة نسبيا وعلاقتنا مع الناس محدودة
وانا دلوقت بقيت اجتماعية بس قبل كانوا عدد صحباتي محدودين ومكنتش بفهم في الدنيا خالص
يعني اللي كنت بعمل والله من غير اقتناع ورضى وهو كان بيجرني
ولما فقت ..كانت اختي بتساندني يعني كانت بتقلي ان اللي بعمله غلط وان بابايا ومامتي لو عرفوا حتبقى حكاية ...و....و وتزامن ده (مع زي ما ذكرت ) بداية التزامي فخلاص قطعت كل حاجة من غير ولا اواجهه ولا اي كلمة يعني خلاص خلاص
فحاول يتصل بي حاول يجيلي معرفش......حاول كتيييير وانا استغربت انه مملش
ده حتى كان بيرن للبيت (بس دي مش انا اللي عملتها يعني جاب نمرة البيت من مصدر غيري مع انه حاول كتير ورفضت)
والرنات المتواصة كانت بتيجي البيت في ساعات متأخرة من الليل فمرة بابا شك وقال الرنات دي مش عاوزة تخلص ده حد قاصدنا بقى
قمت انا نزلت واتصلت بيه وقلتله انت يا اللي فاكر نفسك محدش قدك يا إما توقف الاساليب السخيفة دي يا إما حردلك الصاع صاعين؟ (عشان مديلوش فرصة انه يهددني) عشان الجوابات بتاعتي لسه معاه ومكتب ابويا بيعرفه ويقدر في اي وقت يديهمله
فقعد يحلفلي انه مش هو اللي بيعمل كده
فأختي كانت بتحاول انها هي ترجع الجوابات دي عشان العبيطة كنت بكتب حاجات عن البيت وبعض الحاجات خاصة بينا كأسرة او خلافات حصلت مابيني وبين اختي
ومؤخرا قلتلي انها عرفت تجيبهم بفضل الله وبفضل احد الاخوان معاها في الجماعة شرحت له المشكلة وقرر فورا انه يروحله عشان عز عليه حالي لأن كان مر سنتين على انتهاء علاقتنا والرنات لسه بتيجي
بس بصراحة انا مبوثقش في كلام الشاب ده لأن (وده موضوع ثاني) هو عاوز يتقدم لها فمش عارفة اذا كانت حكاية انه رجع الجوابات صح او غلط خصوصا نها مورتهمليش قلتلي انهم قطعوهم سوا ورموهم ومقلتليش في ساعتها لأ بعد ما سألتها بالصدفة
وكمان حاجة تانية حكاية الرنات دي بقالها مصدر تاني هو الشخص ده اللي بيعرف اختي عشان فيه علاقة سطحية بينهم على اساس انه حيتقدم لها قريب بس فيه اشارات كده بينهم بتتم عن طريق انه يرنلها للبيت
وبكده ابقى مش عارفة حاجتين: ايه هو مصدر الرنات اللي لسه بتيجي من الاخ ده او من الشخص اللي انهيت علاقتي بيه من اكتر من 3 سنين ومفيش اي كلام بينا لأني خلاص تبت لربنا
وكمان مش واثقة اذا كان فعلا ادالهم الجوابات علما ان جواباته لسه عندي محتفظة بيهم عشان خاطر لو حصل حاجة اعرف ادافع عن نفسي(عشان هو كمان كاتب حاجات كتيرة عن اسرته وفيه كمان اسرار محدش من اخواته يعرفهم)
ولما بفكر في المستقبل ...بيعز علي نفسي الحقيقة ...بقول انا ايه اللي وداني لحاجة زي دي..بس بفكر وبقول انا مكنتش عارفة نفسي بحط رجلي فين...وبعدين محدش كان بيقلي ان ده غلط..صحباتي كانوا واخدني المسألة ببساطة واواخواتي كانوا محايدين في الاول بس لما تطورت المسألة لعلاقة اتدخلوا
وبفكر ان لما حيتقدملي حد أقله ايه او اعمل ايه وانا لسه مش واثقة اذا حكايتي خلصت ولا لسه (علما انه بيجي لكليتي مع انه مبدرسش فيها وكل ما دور لناحية الاقيه واقف قصادي فأغير المكان مع صحباتي)
بابا وماما مش حقدر اقلهم حاجة والا حيفقدوا الثقة في نهائيا انا عارفة بابا وماما كويس ويمكن كمان مأخلصش دراستي
طيب لو حد اتقدملي اقله على الحكاية دي؟ ولا استر على نفسي زي ما ربنا سترها علي ؟
طيب ...اقلك على حاجة حطلعها من جوات قلبي
انا الموضوع ده بصراحة عاملي كابوس في حياتي ... معدتش بحس بآمان
بقت بتهز لما بسمع تلفون البيت بيرن...بخاف من المستقبل لأني لسسه متعلقة بالماضي
وخايفة ليكون لسه مترصدلي لأنه دايما كان بيقلي احنا لبعض ومحدش حيتجوزك غيري
طب اواجهه؟ طيب هو ممكن جدا يفتكر اني خايفة منه عشان كده رجعت اكلمه بعد كل المدة دي
طب اعمل ايه بس
انا محتاجة حد يفكر معايا ويلاقيلي حل لمشكلتي
وحسبي الله ونعم الوكيل
ولا حول ولا قوة إلا بالله
وجزاكن الله خيرا ويا ريت مأكنش ثقلت عليكي بمشكلتي دي العويصة
وربنا يجعله في ميزان حسناتكم يا رب"
رد مع الاستدلال
كتبت بواسطة alezea
وكلمناها انا واختي الثانية كذا مرة ومسمتعتش كلام ومعرفناش نعمل معاها ايه خصوصا انها أكبرنا 
الروابط المفضلة