..احـكـى ياشـهـرزاد ...

[هنودة هنانيدو]

احكى ياشهرزاد ... احكى لشهريار
اشغليله ليله لطلوع النهار
حيرلى باله غيرله حاله
خلى عقله دايما فى حالة انبهار

احكى ياشهرزاد حيبقى موضوعنا الجديد خاص لكل عروسة مقبلة على الزواج
ولكل عروسة اتجوزت

نتكلم فيه على كل الامور الاجتماعية للعروسة والزوجة
احكى ياشهرزاد .. حنحكى ازاى نتعامل مع ازواجنا
احكى ياشهرزاد ... حنحكى ازاى ننجح فى علاقتنا مع ازواجنا
احكى ياشهرزاد .. حنحكى فيه مشاكل اللى تواجهنا
احكى ياشهرزاد .. حنحكى اتعلمنا ايه من التجارب
احكى ياشهرزاد ...حنحكى نتعامل ازاى مع الاهل

احكى ياشهرزاد ... حنحكى كل حاجة خاصة بعلاقتتنا مع ازواجنا
والهدف ان كل بيوتنا تبقى بيوت سعيدة

احنا بدانها سوا فى الجزء "" عروسات المستقبل تعالوا اقولكم """
ودلوقتى بنكملها بالجزء الاجتماعى "" احكى يا شهرزاد """

نبتدى نهاردة اول يوم فى حكاية شهرزاد ونكمل سوا مع بعض لغاية ما نصل الف ليلة وليلة من الفرحة والسعادة فى بيوتنا .. ونيجى فى الجنة كلنا نبقى مع ازواجنا واولادنا عايشين مبسوطين زى ما كنا فى الدنيا فرحانين

[lonleygirl]

هنوده يا جميله الف مبروك على التوبيك الجديد ومزيد من الابداع يا قمر

[غريبه منسيه]

مبروك يا قمر الموضوع الجديد وانشالله يارب ينجح زى اللى قبله وطبعا كلنا مع بعض عاوزين تبأى حياتنا 1000 ليله وليله من السعاده والهنا

[saroow]

الف مبرووووووووووووووووووووك ياهنــــــــــــــــــــــــــوده ياقمر

ويارب ينجح زى عروسات المستقبل واكتر لانه بجد موضوع تحفه

وعقبال بقى ما تفتحلنا موضوع كمان فقسم الطبخ تعلمى البنات ازاى تطبخ عشان كدا ميبقاش نقصنا حاجه

مبروك تانى ياقمر

[نداء الحياه]

موضوع جميل يا هنوده
وبما انى لسه متجوزتش يبفى اكيد هستفاد منه
واسم الموضوع جميل وان شاء الله ينجح زى عروسات المستقبل

[ملوكة 12]

الففففففففف مليوووون مبروك يا هنووودة
وان شاء الله موضوع ناجح زى اللى قبله
وكلنا نستفيد معاكى يا بروفيسووور

[the 1st queen]

مبروك يانودى ياقمر ومستنييين مواضيعك الجامده انا خلاص هدخل عش الزوجيه عن قريب ادعولى يلا ادونى شويه خبرات

[سماح عزت]

هنودة هنانيدوو ايه الجمال ده بسم الله ما شاء الله عليكى كلامك كامل من مجميعه زى ما بتعلمينا ازاى نهتم بنفسنا ان شاء الله نستفاد كلنا من الموضوع الجميل ده لانها دايرة متكامله مش ينفع المعاملة الكويسة واكون مهملة فى نفسى ولا اهتم بنفسى واكون مش عندى تواصل اجتماعى هى دايرة متكاملة وربنا يعينك على فعل الخير وزى ما قالت saroowمعدش فاضل غير تعلمينا المطبخ عن قريب ان شاء الله ههههههه...مبروك حبيبى على الموضوع الجميل واستحملى كلمنا الكتير باه هنا وهناك

[هنودة هنانيدو]

ازيكم ياقمرات

حابة نبتدى اول حاجة فى احكى ياشهرزاد اننا نتكلم احنا ليه اصلا بنتجوز ؟؟؟
او بمعنى تانى هو ايه هدفنا من الجواز ؟؟؟

طبعا حنقول كلنا عارفين ايه الهدف واننا عايزين نكون اسر سعيدة وصالحة

ده كويس جدا وده الصح بس خلينا نتكلم شوية بالتفصيل عن النقطة ديه لانها بجد هى اساس الموضوع كله لو مفيش هدف من الجواز يبقى ملهوش لازمة اننا نتكلم ونحكى

الهدف من الجواز زى اساس اللى يتبنى عليه العمارة يعنى لو بتبنى عمارة ملهاش اساس قوى لاقدر الله حتقع او تبقى مهزوزة ومش ثابتة وتخافى انها تقع فى اى وقت

نفس الكلام فى الجواز لو انتى وجوزك ونحط خط تحت جوزك مش ليكم هدف واضح من جوازكم لاقدر الله مشاكل بتاثر على حياتكم

طبعا احنا هنا كلام للبنات على اعتبار ده منتدى نسائى بس انتوا مسئولين انك تتكلموا مع ازواجكم مش مهم انك تعرفوا معلومة وخلاص المهم انك تعرفى معلومة وتعرفى جوزك بيها

لان بردو ديه مشكلة تانية نلاقى البنت بتقرا وتفهم عن الزواج وجوزها ولا بتقولة اى حاجة فطبيعى ان الرجل مش بيهتم بالنقط ديه وتيجى بعد الجواز تقول انا اتعلمت كل حاجة وانت مش مهمتم بعلاقتنا
هو حيعرف منين اذكا كان من النوع اللى مش بيهتم او شغله اخد كل وقته .. مسئولية بتاعتك انتى عرفيه لو قريتى كتاب وعرفتى حاجات مهمة ببساطة احكياهله المهم دخليه معاكى مود ان الجواز حاجة كبيرة مهمة عايزك تشاركنى فيها

نرجع تانى لهدف ؟؟
هدفنا ان كل بنوتة تتجوز الشخص مناسب اللى تبقى معه مرتاحة وديه مرحلة الاختبيار وهى اهم حاجة مينفعش اكون بتجوز عشان انا بنت ولازم اتجوز بصرف النظر هو مين
او اتجوز عشان املى وقت فراغى
او اتجوز عشان اصحابى واهلى وناس تعرف انى مخطوبة وابقى عروسة
ومينفعش اتجوز عشان عريسى شكله لذيذ والبنات كلها حتحسدنى عليه

والله يا بنات اللى بيتجوز ويبقى ده هدفه العلاقة بتدمر بعد فترة قليلة انا مش بغلس غليكم وبقولكم كلام دمه تقيل ونكدى لا .. بس واجب عليا زى ما هو واجب عليكم اننا نفهم بعض ونتعلم

الجواز مش مجاملة اعملها او مرحلة تنتهى بعد وقت لا ده مستقبل حياتك مش حابقى مبالغة لو قولت انه هو طريقك للجنة

عارفين ليه طريقنا للجنة ؟؟؟
عشان لو هدفنا اكبر من الامور العادية حيبقى انتى فاهمة انك عايزة ترتبطى بخطيبك عشان طبعا بتحبيه وعشان الحب ده تحافظى عليه ويزيد يبقى لازم حترضى ربنا انتى وهو وتجيبوا اطفال حلوين تخلوهم طالعين مسلمين بجد وتيجى يوم القيامة ايدك فى ايد زوجك واطفالكم وداخلة الجنة وعيشى بقى فى قصرك وارتاحى مع اسرتك الجميلة

كل ده بيحصل لو محددة هدفك غير كدا تعالوا نتخيل اسرة هدفها انه ولا حاجة هدفهم يتجوزوا وعلاقة زوجية واكل ونوم وفسح دول بعد وقت صغير حيحسوا بايه ؟؟

تخيلوا انك مش بتعملى حاجة غير حاجات ديه اول حاجة تحسى بيها ملل وزهق عرفتوا ليه يقولوا ان الزوجين عندهم حالة ملل
اصل مفيش حاجة مهمة كبيرة شاغلة بالهم بالتالى اى حاجة تانية حتبقى صغيرة حتخلص بسرعة وتزهقى وهو يزهق وتبتدى مشاكل

اما لو انتى وجوزك عندكم اهداف واحلام كتيرة كل ما تخلصوا حلم حتلاقوا نفسكم داخلين مرحلة تانية وهكذا دول بقى حيحسوا امتى بالمللل والزهق ويعدوا لبعض على كل صغيرة وكبيرة
ولو حتى حصل اى مشكلة حتلاقيهم من كتر ما عقولهم مليانة حاجات وطموحات حلوة حتلاقيهم اهدى وتفكيرهم اكبر

وتلاقى الاهم

بركة ربنا نازلة عليهم اصل ربنا مش ممكن حيسيب اسرة هدفها حاجات كلها جميلة اكيد حتلاقوا البركة والرضا فى بيتهم وعلاقتهم

بشوف ازواج كتير يقولوا انا ومراتى بعاد عن بعض مع اننا بنحب بعض بس معرفش ايه اللى حصل ؟؟
اللى حصل ان مخزون الحب اللى بينهم بيقل مش عشان هما وحشين لا عشان ديه طبيعة الحياة ان كل حاجة بتقل ..بس فى حاجات تضمن الحب ده وتثبته وتزوده
انكم مشتركين فى حاجات كتير عشان كدا لو انتى وجوزك قعدتوا سوا وقولتوا احنا عايزين نعمل كذا وكذا حاجات ديه حتقربكم اكتر لبعض على الاقل حيبقى بينكم كلام

على فكرة الهدف اللى بكلم عليه مش مقتصر على الامور الدينية لا .. احنا عايزينه ان الهدف الكبير ادخل الجنة مع اسرتى

عشان احقق الهدف ده مش اقتصر انى اصلى انا وجوزى وخلاص لا طبعا
العبادات ده شىء مفروغ منه بتكلم على امور حياتية اليومية كلها
زى انى احب زوجى واخليه مبسوط .. انى اجيب اطفال واربيهم احسن تربية دينيه ودنيوية .. انى ابقى كويسة مع اهله وهو كويس مع اهلى ... اننا نتفسح ونخرج ... اننا نزود دحلنا ويبقى عندنا احلام نعمل بيزنس ويبقى مستوانا احسن ...وغيره وغيره .. كل ده عشان فى الاخر نبقى فى الجنة يعنى دول وسائل المساعدة اللى توصلنا فى الاخر لهدف الكبير

طبعا ان شاء الله حنتكلم على حاجات كتير بالتفصيل بس حبيت الاول نعمل مقدمة حاسة انها اهم من اى كلام تانى لان لو مفيش الهدف يبقى باقى كلام تضيع وقت ونضحك على بعض

اصل مش حاعرف اتكلم واقولكم احنا نعامل اهل جوزنا ازاى وتكون بنوتة اصلا مش حاطة هدف طيب ديه حنقنعها ازاى لو حد من اهل جوزها مش كويس حتقولك لا مع السلامة انا ليه استحمل اهله وتقلب الدنيا وتخرب البيت .. ديه مشكلتها انها معندهاش هدف لجوازها اصلا عشان كدا مش حتفكر ازاى تحافظ عليه . كل ما يبقى عندك هدف كبير كل ما خوفك وحرصك على جوازك حيبقى اكبر

زى بالظبط اللى بيشترى حاجة عارفة انها غالية اوى ودفع كتير ده عمرة ما حيضيعها حيحافظ عليها مهما حصل على عكس اللى اشترى حاجة عادية باى سعر مش حتفرق معه لانه نحسش باهميتها

اقعدى مع نفسك وفكرى وشوفى انتى عايزة ايه من جوازك وتقعدى مع خطيبك او مع جوزك وتتكلموا حتى لو هو معندهوش الاهتمام انتى لازم تخلى عنده الاهتمام

طولت عليكم بالكلام بس معلش استحملونى اصل شهرزاد عايزة تكلم كتير عشان خاطر لسه كتير فى الف ليلة وليلة

وعايزة اسمع افكاركم نبتدى نتكلم على ايه وايه اكتر مواضيع تحبوا نبتدى بيها ؟؟

[jwanaa]

السلام عليكم و رحمة الله و بركاته
بصراحة اختي هند انا من متابعة في صمت لمواضيعك وصلت الآن الجزء 3 في عروسات المستقبل و دائما ادعو لك بظاهر الغيب واعذري لي تقصيري في الردود و ذلك لاني بدأت اقرأ الاجزاء المغلقة و ايضا لست عروسة ولا مقبلة على الزواج حاليا لذا فضلت المتابعة في صمت لكن حين رأيت موضوعك هذا قررت ان اشكرك و اهنئك على مواضيعك الرائعة جعلها الله في ميزان حسناتك و تأكدي اني لن انساك من دعواتي حتى ان لم اقم بالرد على مواضيعك الهادفة
جزاك الله كل خير اختي الغالية و رزقك الذرية الصالحة